YIGIL 21
HIÉMBI 107 Yéhôva, ndémbél i gwéha
Lelaa di nla léba sobiina
“Njee a nla léba bañga muda? I muda nu a yé nseñ iloo tik ngok i tuye huum.”—BINGÉNGÉN 31:10.
NLÔM JAM
Di tehe matiñ ma Bibel ma ma nla hôla bés i yi njee a yé le a ba loñge sobiina, ni lelaa bilôk bikéé ikété likoda bi nla hôla i bet ba ngwés biiba.
1-2. (a) Mambe mam mankéé nu a nsômbôl biiba a nlama ndugi wan ilole a mbat mut inyu libii? (b) “I béñgna inyu libii” wee kii? (Béñge “Ndoñi bibuk.”)
BAA u gwé ngôñ i biiba? Tolakii mut a ta bé nyégsaga i biiba inyu ba maséé, ngandak bikristen, njohok tole mimañ mi bôt i i yé ngi biiba, i nyéñ sobiina. Maliga ma yé le, ilole u mbôdôl béñge mut inyu yi too ni nla biiba, u nlama badba le: Baa me gwé maada malam ni Yéhôva? Baa me nyi memede? Baa me gwé moni inyu yoñ ndun ni nwaa wem?a (1 Korintô 7:36) Ibale ndimbhe yoñ i yé le ñ, wee u yé toi le u bana loñge libii.
2 Ndi, hala a mbéna bé tomb i léba loñge sobiina. (Bingéngén 31:10) Yak i ngéda u mboma mut a nlémél we, i ta bé bun i kal nye le u gwé ngôñ le ni béñge too ni nla biiba.b Munu yigil ini, di ga tehe kii i nla hôla bikristen bi bi yé ngi bii i léba sobiina, ni i bôdôl béñgna inyu yi too ba nla biiba. Di ga tehe ki i yom bilôk bikéé bi nla boñ inyu nit i bet ba nsômbôl biiba.
I LÉBA LOÑGE SOBIINA
3. Mambe mam kristen i i nsômbôl biiba i nlama béñge yak nwet a nsômbôl bii?
3 Ibale u nsômbôl biiba, i yé loñge i yi umbe ntén mut u ngwés bii ilole ni mbôdôl béñgna.c Ibale hala bé, u yé le u nwas mut nu a bak le a ba loñge sobiina, tole u mbôdôl béñge nu a ta bé loñge inyu yoñ. I yé maliga le, ibale u nyéñ béñge mut, a nlama ba nsôblege kristen. (1 Korintô 7:39) Ndi to umbe nsôblege mankéé bé won u nla ba loñge inyu yoñ. Jon badba le: ‘Mambe mam me ngwés boñ i niñ yem? Bimbe bilem bilam bi mbéda yak nwet me ngwés bii? I ngéda me nhoñol i mam me mbémél nye, baa me nlôôha?’
4. Mambe mam ngim bôt i yé i mbat ikété masoohe map?
4 Bebek, u nsoohe inyu léba sobiina. (Filipi 4:6) Maliga ma yé le, Yéhôva a mbôn bé ngim mut le, a ntéédana nye sobiina nu tôbôtôbô. Ndi a nok i yom u nôgda, a nyi ki i yom u gwé ngôñ, a nla ki hôla we i léba sobiina. Jon u waa bañ yiblene nye ñem woñ mu jam li. (Tjémbi 62:8) Bat nye le a hôla we i bem ni wongut, ni i bana pék. (Yakôbô 1:5) John,d mankéé wada i loñ Amérika nu a yé ngi bii, a ñañle bés i mam a yé a nkal ikété masoohe mé: “Me yé me nkal Yéhôva bilem me gwé ngôñ le muda me mbii a bana. Me nsoohe Yéhôva le a yiblene me ngandak manjel inyu boma loñge sobiina. Me nsoohe ki nye le a hôla me i bana bilem bi bi ga boñ le me ba loñge nlôm.” Sita yada i loñ Sri Lañka le Tanya a nkal le: “Ntel ngéda wonsôna me nyéñ sobiina, me mbat Yéhôva le a hôla me i téñbe ni nye, i bana mahoñol malam ni i ba maséé.” To ibale u yé ngi léba sobiina, Yéhôva a mbôn le a ga tééda we i pes minsôn ni i mahoñol.—Tjémbi 55:22.
5. Imbe pôla kristen i i ta bé mbiibaga i gwé i boma mut nu a ngwés Yéhôva? (1 Korintô 15:58) (Béñge yak titii.)
5 Bibel i nti bés makénd i bana “ngandak mam i boñ ikété nson u Nwet.” (Añ 1 Korintô 15:58.) Ibale u mboñ hala, u ga tégbaha ngéda ni ngandak bilôk bikéé bi bôlôm ni bi bôda, bi bi yé bilôñ bilam kiyaga, hala a ga ti ki we pôla i sal ni bilôk bikéé bi bi yé ngi biiba kiki we, ni bi bi bi yoñ makidik le, nson u Yéhôva u ba jam li bisu i niñ yap. Kiki u mboñ kii yosôna u nla inyu lémél Yéhôva, hala nyen w’a ba toi maséé.
I ngéda u pégi i nson u Yéhôva ni le u ntégbaha ngéda ni ngandak lôk kéé, i nla pam le u boma ihogi mu le i gwé ngôñ i biiba (Béñge liben 5)
6. I ngéda mut a nyéñ biiba, kii a nlama bé hôya?
6 Di yoñ yihe le: Nyiña u sobiina u ba bañ jam li bisu i niñ yés. (Filipi 1:10) Bañga maséé i nlôl bé libak le di yé mbiibaga tole heni, ndi i maada malam di gwé ni Yéhôva. (Matéô 5:3) Kiki u yé ngi biiba, hala a nla ti we pôla i kéñbaha nson woñ u likalô. (1 Korintô 7:32, 33) Tibil gwélél i ngéda ini. Sita yada le Jessica, nu a yé i loñ Amérika, ni nu a bi biiba a ban-ga bebee le 40 nwii, a nkal le: “Me bé ti ngéda yem yosôna i nson likalô, hala a bi hôla me i tééda maséé mem tolakii me bé yéñ biiba.”
YOÑ NGÉDA I BÉÑGE I NWET A NLÉMÉL WE
7. Inyuki i yé loñge i yoñ ngéda i béñge i mut a nlémél we bisôsôli ilole u nke i pôdôs nye? (Bingéngén 13:16)
7 W’a boñ lelaa ibale u nôgda le ngim mut i yé le i ba loñge sobiina? Baa u ga ke u kal nye kunda yada le a nlémél we? Bibel i nkal le mut pék a mboñ mam lôñni yi. (Añ Bingéngén 13:16.) Jon, ilole u ñañle mut i yom u nôgda, yoñ ngéda i béñge nye ibabé le a yi. Mankéé Aschwin nu a niñ i Ôland a nkal le: “U nla nôgda le u ngwés mut nano, ndi i mbus ndék ngéda, i gwéha i i mal. I ngeñ u nyoñ ngéda i béñge mut, w’a pala bé kal nye le ni béñgna inyu libii ndik inyule u nkwo jép jép.” Ni ki le, i ngéda u mbéñge nye ibabé le a yi, u nla léba le nye bé nyen i mbéda we inyu libii.
8. Lelaa mut a nyéñ biiba a nla béñge i mut a nlémél nye? (Béñge yak titii.)
8 Lelaa u nla béñge mut a nlémél we ibabé le a yi? I makoda tole i ngéda di ntégbaha loñge ngéda ni bôt bape, u nla yimbe bilem gwé i pes i mbuu, libak jé ni maboñok mé. Mambe mawanda a gwé, mimbe minkwel a ngwés? (Lukas 6:45) Baa i mam a nkit le a mboñ ma nkiha ni ma u ngwés? U nla kwel ni mimañ mi likoda jé tole ni minhôôlak mi bikristen mi mi nyi nye loñge. (Bingéngén 20:18) U nla yéñ yi lelaa bôt bape ba ntehe nye, yak bilem gwé. (Ruth 2:11) Mu kiki u mbéñge nye, yoñ yihe le hala a tééñga bañ nye. I ngéda u mboñ hala, yoñ yihe le u bat bañ nye mambadga ma ma nla tééñga nye, u odop bañ to nye i mbus hiki ngéda.
Ilole u nkal mut le a nlémél we, béñge ndugi nye ibabé le a yi (Béñge maben 7-8)
9. Ilole u nkwélés i mut a nlémél we, u nlama ba nkwoog nkaa ni kii?
9 Ipam imbe ngéda u nla béñge mut ibabé le a yi? Ibale u mpala kwélés i nwet a nlémél we, i nla nene wee u nyoñ bé ngéda i ôt pék. (Bingéngén 29:20) Ndi ibale u nlôôha ki nom, i nla nene wee u nkon woñi i yoñ ngim makidik, téntén ibale i nwet u mbéñge a nyimbe le a nlémél we. (Ñañal 11:4) U hôya bañ le u gwé bé ngôñ i ba nkwoog nkaa le nyen u ga bii, inyu kwélés nye. Ndi u nlama ba nkwoog nkaa le wemede u yé nkôôbaga inyu libii, ni le i mut u mbéñge a nla ba loñge sobiina inyu yoñ.
10. Kii u nla boñ ibale u nôgda le ngim mut i mbéñge we, ki le we u ta bé bebee?
10 Nano, kii u nla boñ ibale u nôgda le ngim mut i mbéñge we? Ibale u nôgda bé nlélém jam inyu yé, yis nye hala ni maboñok moñ. I ta bé loñge le u nwas le ngim mut i hoñol le, we ni nye ni nla béñgna inyu libii ki le u ta bé bebee i neebe.—1 Korintô 10:24; Éfésô 4:25.
11. I biloñ i het bôt ba gwé lem i boñ le bôt iba ba bomna inyu tehe too ba nla biiba, mambe mam di nlama bé hôya?
11 I ngim biloñ, ba nla bem le bagwal tole bôt bape ba pohlene bôt bap ba lihaa balôm tole baa. I biloñ bipe, mahaa tole mawanda ma nyiñil mut wap munlôm tole muda a nla bii, ndi ba yoñ bitelbene le bo iba ba bomna inyu tehe too ba nla bôdôl béñgna inyu libii. Ibale mut a mbat we le u yiñil nye mut inyu libii, yéñ yi kii hiki wada wap a ngwés boñ i niñ yé. Ibale u nlébna nye mut, noode yi libak li mut nu, bilem gwé, téntén maada mé ni Yéhôva. Maada mé ni Yéhôva ma nlôôha ba nseñ iloo i bana ngandak moni, i ke haa i suklu tole i ba bañga mut. Ndi u hôya bañ le i bôt ba bo iba, bon ba nlama yoñ makidik ma nsôk inyu yi too ba ga biiba.—Galatia 6:5.
LELAA NI NLA BÔDÔL BÉÑGNA INYU LIBII?
12. Ibale u gwé ngôñ le we ni mut ni bôdôl béñgna inyu libii, lelaa u nla yis nye hala?
12 Ibale u gwé ngôñ le we ni mut u béñgege bisôsôli ni bôdôl béñgna inyu libii, lelaa u nla yis nye hala?e U nla yoñ bitelbene le ni kwel i mbom ni mbom, tole u sébél nye i téléfôn. Tibil toñle nye i yom u nôgda. (1 Korintô 14:9) Ibale hala a yé nseñ, ti nye ngéda i ôt pék inyu timbhe we. (Bingéngén 15:28) Ibale ndimbhe yé i yé le to, neebe hala.
13. Kii u nla boñ ibale mut a nkal we le u nlémél nye? (Kôlôsé 4:6)
13 Kii u nla boñ ibale mut a nkal we le u nlémél nye? I mbéda nye ñem ngui ngandak inyu añle we hala, jon timbhe nye ni loñgeñem lôñni ngandak lipém. (Añ Kôlôsé 4:6.) Ibale u gwé ngôñ ni ngéda inyu yi kii u ga timbhe, kal nye hala. Ndi, soho u tiñha bañ ngandak. (Bingéngén 13:12) Ibale u ta bé bebee i neebe, ni bibuk bilam, añle nye hala loñge loñge. Di tehe lelaa mankéé wada i loñ Autriche le Hans a bi timbhe ngéda sita yada i bi kal nye le i ngwés nye: “Ni loñgeñem, me bi kal nye i jam me nôgda toi. Me bi boñ ki hala ibabé i tiñha, ndik inyule me bé gwés bé le a bana mapida. Hala a bi boñ ki le, me yoñ yihe le maboñok mem ni bibuk gwem bi tinde bañ nye i hoñol le me nhéñha mahoñol.” Ndi ibale u neebe le ni béñgna, añle nye i yom u nôgda toi, u toñle ki nye i mam u ngwés le ni boñ mu ngéda ni mbéñgna. Litehge linan li mam li nla ba mahéñha inyule ni gwé bé minlélém mi bilem bi loñ, tole inyu manjom mape.
LELAA BINI BIKRISTEN BIPE BI NLA NIT I BET BA YÉ NGI BIIBA?
14. Lelaa di nla ti lôk kéé i i yé ngi biiba makénd ni bibuk gwés?
14 Lelaa bésbobasôna di nla nit bikristen bi bi gwé ngôñ i biiba? Di nla boñ hala i ngéda di nyoñ yihe ni mam di nkal bo. (Éfésô 4:29) Di nla badba le: ‘Baa me gwé lem i bana ngim minjôha i i nla tééñga i bet ba nsômbôl biiba? I ngéda me ntehe mankéé nu muda ni mankéé nu munlôm ba ba yé ngi biiba ba nkwel, baa me gwé ndigi mu mahoñol mem le, bo bo la ba ngwéhna?’ (1 Timôtéô 5:13) Ni ki le, di nlama bé boñ le bilôk bikéé bi bi yé ngi biiba bi nôgda wee jam li nhéñél bo inyule ba ta bé mbiibaga. Hans, nu di mbôk di sima, a nkal le: “Ngim lôk kéé i yé i nkal le: ‘Inyuki u mbiiba bé, ngo u ta ha bé mañge?’ I nya bipôdôl i, i nla boñ le i lôk kéé i ta bé mbiibaga i kahal hoñol le bebek i ta bé nseñ, tole hala a tinde bo i yéñ biiba, ki le ba yé ngi ba bebee.” I nlôôha ba nseñ i yéñ manjel inyu bégés lôk kéé yés i i yé ngi biiba!—1 Tésalônika 5:11.
15. (a) Inoñnaga ni litiñ di nléba i kaat Rôma 15:2, di nlama yoñ yihe ni kii i ngéda di ngwés hôla mankéé i léba sobiina? (Béñge yak titii.) (b) Kii u nigil mu vidéô?
15 Kii u nla boñ ibale u nhoñol le ngim mankéé nu munlôm i nla ba loñge sobiina inyu ngim sita? Bibel i nkal le di nlama nok mahoñol ma bôt bape. (Añ Rôma 15:2.) Ngandak bilôk bikéé i i yé ngi biiba i ngwés bé le bôt bape bon ba yiñil bo sobiina, di nlama neebe hala. (2 Tésalônika 3:11) Bape ba yé le ba neebe mahôla mu jam li, ndi di nlama boñ hala ndik ibale bon ba mbat bés.f (Bingéngén 3:27) Ngim lôk kéé i i ta bé mbiibaga, i ngwés bé i ngéda di mboñ le ba bomna ndigi bo iba. Sita Lydia nu a yé ngi biiba, a niñik i loñ Jaman a nkal le: “Di nla naña bo i tégbaha loñge ngéda lôñni lôk kéé ipe. Bés di boñ ndigi le mankéé nu munlôm ni nu muda ba bomna, i mbus di nwas bo.”
I ngéda ngandak lôk kéé i kôdi, hala a nti lôk kéé i i yé ngi biiba pôla i bomna (Béñge liben 15)
16. Kii bikristen bi bi yé ngi biiba bi nlama bé hôya?
16 Bésbobasôna di nla bana niñ i mbomboo ni i maséé, too di yé mbiibaga tole heni! (Tjémbi 128:1) Jon ibale u nyéñ biiba, ndi u lébga bé mut, kee ni bisu i boñ le nson u Yéhôva u ba jam li bisu i niñ yoñ. Sita yada le Sin Yi a nkal le: “Hégha i ndék ngéda u yé le u tégbaha nano nu u yé ngi biiba, ni i ngéda yosôna u ga tégbaha ni sobiina woñ i Paradis. Diihe i ngéda ini u yé wetama, u gwélél ki yo loñge.” Ndi kii u nla boñ ibale u nléba mut, ni bôdôl ki béñgna inyu libii? I yigil i noñ, di ga tehe lelaa di nla tibil gwélél i ngéda i.
HIÉMBI 137 Bikristen bi bôda, bôda ba hémle
a Inyu nyi too u yé bebee inyu biiba, i jw.org béñge i yigil ini le: “Fréquenter (partie 1) : Suis-je prêt ?”
b NDOÑI I BUK: Munu yigil ini ni i i noñ, i béñgna inyu libii i yé ngéda munlôm ni muda ba ntégbaha ntôñ inyu yina loñge loñge, ni i yi too ba nla ba loñge nlôm tole loñge nwaa inyu nuu numpe. I ngim biloñ, i ngéda i i yé i ngeñ u nigil i yi mut, tole i ngeñ bôt ba nyegna libii. I béñgna inyu libii i mbôdôl i ngéda munlôm ni muda ba mpahlana le ba ngwéhna, letee ba yoñ makidik i biiba tole ba nkit le ba nke ha bé ni bisu.
c Inyu tômbôs mam, munu maben ma noñ, di ga lôôha pôdôl mankéé nu munlôm. Ndi, matiñ di ga tehe ma mbéñge yak bisita.
d Di nhéñha ngim môl.
e I ngim biloñ, mankéé nu munlôm nyen a mbéna bat sita libii. Ndi, sita i nla kal mankéé nu munlôm le i gwé ngôñ le ba béñgna inyu libii. (Ruth 3:1-13) Inyu kôhna biniigana bipe, béñge i yigil ini “Les jeunes s’interrogent . . . Comment lui dire ce que je ressens pour lui ?” i Réveillez-vous ! i 22 octobre, 2004.
f Béñge i jw.org i vidéô ini le, Ni hémle, ba nyémbél sañ—I bet ba yé ngi biiba.