Lelaa di nla yémbél pééna

1-2. (a) Kii i nla lona bagwélél ba Yéhôva pééna? (b) Kii di ga tehe munu yigil ini?

BÉSBOBASÔNA di nla bana péénaa ngim mangéda. Kiki hihéga, mañge wanda nu a yé Mbôgi Yéhôva a nla badba too Yéhôva a ntôñ toi nye. A nla hoñol le a kôli bé kôs sôble. Mankéé nu munlôm numpe, i ngéda a bé mañge wanda a bi pohol i yéñ ndugi Ane iloole a bana ngandak moni. Nano nu a nlama bépba inyu jés lihaa jé, a nla kahal badba too a bi yoñ makidik malam i ngéda a bé njohok. Hégda le sita yada i i yé ñunuk, i i gwé ha bé ngui. I nla bôdôl nimis makénd inyule i nla ha bé boñ i mam i bé boñ behee. Baa u ma badba i nya mambadga ini le: ‘Baa Yéhôva a nyimbe me? Baa i bé toi nseñ le me boñ bisesema bi inyu Yéhôva? Baa me nginda yii nseñ inyu Yéhôva?’

² Ibale di nyéñ bé mandimbhe ma mambadga mana, hala a nla boñ le ndék ni ndék, di nimis maada més malam ni Yéhôva. Munu yigil ini, di ga wan matiñ ma Bibel ma ma nla hôla bés ibale di mpééna (1) le Yéhôva a ntôñ bés, (2)  le makidik di bi yoñ i gwélél nye ma yé malam, tole (3) di ngi yii nseñ i mis ma Yéhôva.

KII I NLA HÔLA BÉS I NGEÑ DI MBADBA NGIM MAMBADGA

3. Sima jam jada di nla boñ i ngéda ngim mambadga i ntééñga bés.

³ Jam jada di nla boñ li yé le di yéñ mandimbhe ikété Bibel. Ibale di mboñ hala, di ga pam i hol i pes mbuu, di ga ba ki nkôôbaga inyu ‘telep siñ siñ ikété hémle.’​—1 Korintô 16:13.

4. Lelaa di nla ‘wan mam momasôna’? (1 Tésalônika 5:21)

⁴ Añ 1 Tésalônika 5:21. Yimbe le Bibel i nti bés makénd i ‘wan mam momasôna.’ Lelaa di nla pam i boñ hala? Di nlama kwés bésbomede nkaa le i jam di nhémle, jon Bibel i niiga. Di yoñ hihéga hi mañge wanda wada nu a mbadba too a yé nseñ i mis ma Nyambe. Kiki a nhoñol hala, wee hala a yé maliga? To jam. A nlama ‘wan mam momasôna,’ a yéñ yi mahoñol ma Yéhôva mu i jam li.

5. Lelaa di ‘nok’ Yéhôva a ntimbhe mambadga més?

⁵ I ngéda di ñañ bañga i Nyambe, di ‘nok’ Yéhôva a mpôdôs bés. Ndi hala a kôli bé inyu pam i nok mahoñol mé. Di nlama boñ le lisoñgol jés li Bibel li kiha ni mambadga di mbadba. Di nla boñ nyiña mu i jam li ni bisélél ntôñ u Yéhôva u nti bés. (Bingéngén 2:​3-6) Di nla soohe Yéhôva le a éga bés mu nyiña wés, a hôla ki bés i yi mahoñol mé mu i jam li. I mbus hala, di yéñ matiñ ma Bibel ni maéba ma ma mpôdôl i jam li. Di nla ki ôt nseñ ni miñañ mi bagwélél ba Djob ba kôba ba ba bi boma minlélém mi mam.

6. Lelaa makoda ma nla hôla bés i kôhna ndimbhe i mambadga di mbadga?

⁶ Di nla yak “nok” Yéhôva a mpôdôs bés i makoda. Ibale di mbéna ke makoda, di nla nok ngim jam i nkwel u mankéé wada tole i ndimbhe i mankéé numpe, i i nla ba ndimbhe i mbadga yada di mbadba. (Bingéngén 27:17) Nano di béñge lelaa di nla mélés ngim pééna i tôbôtôbô di nla bana mu ñem.

I NGÉDA U MPÉÉNA LE YÉHÔVA A NTÔÑ WE

7. Imbe mbadga bôt bahogi ba mbadba?

⁷ Baa u ma badba le: ‘Baa Yéhôva a ntehe toi me?’ Ibale u nhoñol le u gwé bé mahee, u nla hoñol le u ta bé le u yila liwanda li Nhek ngiinda yosôna. I jam li li bi pémél Kiñe David. A bi ba nhelek i yi le Yéhôva a nyimbe bôt ba binam, jon a bat le: “Éé a Yéhôva, mut binam a yé kii le u yimbe nye, to man mut le u yoñ ngéda ni nye?” (Tjémbi 144:3) Hee u nla léba ndimbhe i mbadga ini?

8. Inoñnaga ni 1 Samuel 16:​6, 7, 10-12, kii Yéhôva a nyimbe yak bôt ba binam?

⁸ Bibel i niiga bés le Yéhôva a ntehe i bet bôt bape ba nyan. Kiki hihéga, Yéhôva a bi om Samuel i ndap Yésé inyu hoo man wé munlôm wada nu a ga yila kiñe Israel. Yésé a bi sébél bon bé bôlôm basaambok i bisu bi Samuel, ndi a bi sébél bé David, nu a bé yak man nu nsôk.b Ndi David nyen Yéhôva a bi pohol. (Añ 1 Samuel 16:​6, 7, 10-12.) Yéhôva a bi tehe i yom i bé David ikétékété, i mañge wanda nu a bé diihe mam ma mbuu.

9. Kii i nla kwés we nkaa le u yé nseñ i mis ma Yéhôva? (Béñge yak titii.)

⁹ Hoñol i mam Yéhôva a ma boñ inyu unda le a nyimbe we. A nti bés maéba ma ma nkiha ni i mam ma mpémél bés. (Tjémbi 32:8) Lelaa a yé le a boñ hala ibale a nyi bé bés loñge? (Tjémbi 139:1) I ngéda u nha maéba ma Yéhôva i bibôñôl, u tehge lelaa ma nhôla we, hala a nkônde kwés we nkaa le u yé nseñ i mis mé. (1 Miñañ 28:9; Minson mi baôma 17:​26, 27) Yéhôva a ntehe biliya u mboñ. A nyimbe bilem bilam u gwé, a nsômbôl yila liwanda joñ. (Yérémia 17:10) Kinje maséé a ga nôgda ibale u neebe ba liwanda ni nye.​—1 Yôhanes 4:19.

I NGÉDA U MBADBA TOO MAKIDIK U BI YOÑ MA BÉ MALAM

10. I ngéda di mbigda makidik di bi yoñ behee, mambe mambadga di nla badba?

¹⁰ I mbus ngandak nwii, bôt bahogi ba yé le ba badba too ba bi yoñ makidik malam. Bebek le ba bi tjôô ngim bôlô, tole ngim nyuñga i i bé le i ti bo ngandak moni inyu kônde bana ngéda i gwélél Yéhôva. Nano a yé ntandaa ngéda le ba bi yoñ makidik ma. I nla pam le i ngéda ba mbéñge mawanda map, ndi ba tehe le ba gwé niñ i mbomboo, ba yé le ba badba le: ‘Baa bisesema gwobisôna me bi boñ inyu Yéhôva bi bé toi nseñ? Tole baa ibale me yoñ bé makidik ma ki me gwé ngandak moni len?’

11. Kii i bé tééñga ntila Tjémbi 73?

¹¹ Ibale i nya mambadga i i ntééñga we, béñge i yom ntila Tjémbi 73 a bé nôgda. A bé tehe le i bôt ba ngwélél bé Yéhôva ba yé mbôô, ba bak mingwañ, i nen-ge wengoñle ba gwé bé ndutu yo ki yo. (Tjémbi 73:​3-5, 12) Mu kiki niñ yap i bé nene ilam i mis mé, a bé nôgda wengoñle makidik a bi yoñ i gwélél Yéhôva ma bé bé malam. Mahoñol ma ma bé boñ le a bana ‘nduña kel yosôna.’ (Tjémbi 73:​13, 14) Lelaa a bi yémbél i nduña i?

12. Inoñnaga ni Tjémbi 73:​16-18, lelaa ntôp tjémbi a bi yémbél ndutu yé?

¹² Añ Tjémbi 73:​16-18. Ntôp tjémbi a bi ke i homa mpubhaga nu Yéhôva. Nyoo nyen a bé le a ôt pék loñge. A bi pam i nok le, to hala kiki niñ i ngim bôt i nene ilam, ba gwé bé botñem inyu dilo di nlo. Litehge li mam li, li bi hôla nye i témbna nsañ wé, a yik le i noñ mam ma mbuu i yé makidik ma nlôôha malam. Hala a bi lédés makidik mé i ke ni bisu i gwélél Yéhôva.​—Tjémbi 73:​23-28.

13. Kii u nla boñ inyu bana ñem nwee, ibale u mbadba too makidik u bi yoñ behee ma yé malam? (Béñge yak titii.)

¹³ Ni mahôla ma Bañga i Djob, u nla bana ñem nwee. Lelaa hala a nla bôña? Hoñol i mam malam u gwé nano, ni bisai Yéhôva nkôp we, hégha gwo ni i ndék gwom bilam i bet ba nyi bé nye ba nla bana munu nkoñ ’isi unu. Bo ba nsal ni ngui inyu bok nkus nano inyule ba mbem bé yom yo ki yo ipe i dilo di nlo. Ndi ki le mam ma yé maselna inyu yoñ, u héya bisai u gwé nano, Yéhôva a ntéédana we bibom bi mbuma ñañ i dilo di nlo. (Tjémbi 145:16) Hégda ki lelaa niñ yoñ i bé le i ba, ibale u yoñ makidik mape? I jam di nyi li yé le, ibale gwéha inyu Nyambe ni inyu mut wés libôk yon i ñéga makidik més, kekikel di ga hañ bé mam ma yé toi malam.

I NGÉDA U MPÉÉNA LE U YÉ NSEÑ I MIS MA YÉHÔVA

14. Inyuki bôt bahogi ba nhoñol le ba ta bé nseñ, mambe mahoñol ma nla tééñga bo?

¹⁴ Bagwélél ba Yéhôva ba ba yé ñunuk ba mboma ngim mandutu ma ma nlôl biuni kiki bo makon, tole ba bi yila bibôk bi bôt. I mam ma ma nla boñ le ba nôgda wee ba ta ha bé nseñ i mis ma Yéhôva. Ba nla yak badba le: ‘Baa me ngi gwé mahee i mis ma Yéhôva?’

15. Ntila Tjémbi 71 a bé nkwoog nkaa ni kii?

¹⁵ Ntila Tjémbi 71 a bi boma nlélém ndutu. A soohe Yéhôva le: “U tjôô bañ me i ngéda me nimis ngui yem.” (Tjémbi 71:​9, 18) Ndi to hala ntôp tjémbi a bé nkwoog nkaa le ibale a ntéñbe ni Nyambe wé, Yéhôva a ga éga nye, a nit ki nye. Ntôp tjémbi a bi sôk nok le, Yéhôva a nkon maséé ni ba bobasôna ba mboñ kii yosôna ba nla inyu gwélél nye to ibale ba nla ha bé boñ mam kiki ba bé boñ behee.​—Tjémbi 37:​23-25.

16. Lelaa lôk kéé i i yé ñunuk i yé nseñ i mis ma Yéhôva? (Tjémbi 92:​12-15)

¹⁶ A lôk kéé i i ñun, ni tehe bébomede kiki Yéhôva a ntehe bé. A nla hôla bé i téñbe ni nye to ibale ni gwé ha bé ngui kiki ni bééna behee. (Añ Tjémbi 92:​12-15.) Iloole u béñge i mam u nla ha bé boñ, bok mahoñol moñ i mam u nla boñ nano. Kiki hihéga, ndémbél yoñ ilam i nla lédés bôt bape. U nla añle bo lelaa Yéhôva a nit we mu i nwii nwominsôna mi ntagbe, ni i botñem ikeñi u gwé le mimbônga mi Yéhôva nwominsôna mi ga yon. U nhôya bañ le masoohe u nsoohe inyu bôt bape ma gwé ngui ngandak. (1 Pétrô 3:12) To di mboma mambe mam i niñ yés, bésbobasôna di gwé ngim jam i ti Yéhôva ni bôt bape.

17. Inyuki di nlama bé hégha bésbomede ni bôt bape?

¹⁷ Ibale hala a ntééñga we le u nla ha bé boñ i yom u bé boñ i nson u Yéhôva behee, ba nkwoog nkaa le a ndiihe kii yosôna u mboñ. I nla pam le u yéñ hégha wemede ni bôt bape. Soho u boñok bañ hala. Inyuki? Inyule Yéhôva a nhégha bé bés ni bôt bape. (Galatia 6:4) Kiki hihéga, Maria a bi ti Yésu bañga njahba i i nlôôha hee diye. (Yôhanes 12:​3-5) Ndi hiyeyeba hi yik muda hi bi ti batjañtjañ iba ba ba bééna yaga bé bañga nseñ. (Lukas 21:​1-4) Yésu a bi unda le makébla ma i bôda ba bo iba ma bé unda le ba bééna hémle i ngui. Yéhôva, Isañ Yésu, a ndiihe makébla momasôna di nti, téntén i ngéda gwéha yon i ntinde bés i ti mo, to ibale ma nene bés matitigi lelaa.

18. Kii i nla hôla bés i ke ni bisu i téñbe i ngeñ di mbadba ngim mambadga? (Béñge yak minkéñék mi matila le “Bañga i Yéhôva i nla hôla we i yémbél pééna..”)

¹⁸ Bésbobasôna di ma bana pééna ñem. Ndi kiki di ntehe, Bañga i Djob le Bibel, i nla hôla bés i jôs yo. Jon, boñ biliya bi ngui i léba mandimbhe ma mambadga u mbadba, kayéle u kônde kwés wemede nkaa. Yéhôva a ndiihe bisesema u mboñ, a yé ki bebee i bom we. Ba nkwoog nkaa le Yéhôva a ntehe ba bobasôna ba tiñi ni nye, a ngwés ki bo iloo hihéga.