Woo u Yéhôva u ta bé kidik

1. Lelaa Môsi a bi unda le a mbôdôl Yéhôva ñem i ngéda a bi nyodna bon ba Israel i Égiptô?

MÔSI a yé mut wada ikété bôt kaat Lôk Héber i nkal le ba yé bôt ba hémle. (Lôk Héber 3:2-5; 11:23-25) A bi unda hémle i ngui i ngéda a bi nyodna bon ba Israel i Égiptô. A bi kon bé Faraô, to ntôñ wé gwét woñi. A bi bôdôl Yéhôva ñem, a hôla bon ba Israel i yap tuye Nkôibaga ni i yap ñoñ. (Lôk Héber 11:27-29) Ngandak bon ba Israel i bi waa bôdôl Yéhôva ñem, ndi Môsi nye a bi waa bé bôdôl Nyambe wé ñem. Môsi a bé a kôli toi bôdôl Yéhôva ñem, Yéhôva a bi wéha bé nye nyuu, a bi ti bo bijek ni malép i ñoñ.a—Manyodi 15:22-25; Tjémbi 78:23-25.

2. Inyuki Nyambe a bi bat Môsi le: “Baa woo u Yéhôva u yé kidik”? (Ñañga bôt 11:21-23)

² To hala kii Môsi a bééna hémle i ngui, bebee le nwii wada i mbus manyodi ma bon ba Israel i loñ Égiptô, a bi badba too Yéhôva a bé le a ti bo nuga. Môsi a bé nok bé lelaa Yéhôva a bé le a ti limut li bôt li jolisôna li li bé i ñoñ nuga. Ha nyen inyu timbhe nye, Yéhôva a bi bat nye le: “Baa woo u Yéhôva u yé kidik?” (Añ Ñañga bôt 11:21-23.) Hana, “woo u Yéhôva” u yé mbuu wé mpubi tole ngui yé a ngwélél inyu boñ mam. A yé wengoñle Yéhôva a bé kal Môsi le: ‘U nhoñol le ibale me nkal le me mboñ jam, m’a la bé boñ jo?’

3. Inyuki di nlama yoñ ngéda i ôt pék mu ñañ u Môsi ni bon ba Israel?

³ Baa u ma badba le: “Yéhôva a ga tééda me ni lihaa jem?” Too u ma badba i mbadga i, too u yé ngi badba yo, di béñge biniigana di nla ôt mu ñañ u Môsi ni bon ba Israel, ba ba bi hoñol le Yéhôva a bé bé le a ti bo kii yosôna i bé béda bo. I ñañ u, u ga hôla bés i nok le woo u Yéhôva u ta u bak bé kidik.

DI ÔT BINIIGANA MU ÑAÑ U MÔSI NI BON BA ISRAEL

4. Kii i bi tinde limut likeñi li mintén mi bôt nwominsôna ni bon ba Israel i hoñol le Yéhôva a bé bé le a tééda bo?

⁴ Inyuki bon ba Israel ba bi hoñol le Yéhôva a bé bé le a ti bo kii yosôna i bé béda bo? Bon ba Israel, ni “limut likeñi li mintén mi bôt nwominsôna” ba bé i ñoñ, ba lôlak i Égiptô, ba kenek i Hisi Likak. (Manyodi 12:38; Ndiimba Mbén 8:15) I limut li bôt li, li bi tjelel le li nwaa je mana, yak ngandak bon ba Israel i bôdôl tjelel. (Ñañga bôt 11:4-6) Ba bi bôdôl tam bijek ba bi yék i Égiptô. Njelel yap i bi lôôha tééñga Môsi, a kahal boñ wengoñle nyen a nlama jés bo.—Ñañga bôt 11:13, 14.

5-6. Njelel i limut likeñi li mintén mi bôt nwominsôna i bi tinde bon ba Israel i tjelel, hala a niiga kii bés?

⁵ I mpôna le njelel i limut likeñi li mintén mi bôt nwominsôna yon i bi tinde yak bon ba Israel i tjelel. Ibale di nyoñ bé yihe, yak bés di nla kahal yan i mam Yéhôva a nti bés kiki bôt ba nkoñ ’isi unu ba mboñ. Di nla kwo mu hiandi hi ibale di mbôdôl hoñol i mam di bééna behee, tole ibale di mbôdôl tam gwom bi bôt bape. Ndi ibale di nkon maséé ni i mam di gwé, ha nyen di ga ba toi maséé.

⁶ I bé béda le bon ba Israel ba bigda le Yéhôva a bi bôn bo le i ngéda ba ga pam i Hisi Likak, ha nyen ba ga bana i mam momasôna ma mbéda bo. Yéhôva a bi kal bé bo le i ñoñ nyen a ga ti bo kii yosôna i mbéda bo. To bés di nlama bé tjelel inyu mam di gwé bé nano, ndi di nlama hoñol bisai Yéhôva a mbôn bés i mbok yondo. Di ôt yak pék mu minlôñ mi Bibel mi mi nla hôla bés i bôdôl Yéhôva ñem.

7. Kii i ñunda le woo u Yéhôva u ta u bak bé kidik?

⁷ Ndi di yé le di badba le, inyuki Nyambe a bi bat Môsi le: “Baa woo u Yéhôva u yé kidik?” I mpôna le Yéhôva a bé gwés yis Môsi le a gwé ngui i boñ mam momasôna, yak mam a bé bé le a hégda. To hala kii bon ba Israel ba bé i ñoñ, Yéhôva a bé le a ti bo nuga. Ni “woo wé ngui, yak ni woo wé u lipémba,” Yéhôva a bi unda ngui yé. (Tjémbi 136:11, 12) Inyu hala nyen, i ngéda di gwé ndutu, di péénaga bañ le Yéhôva a ga hôla bés.—Tjémbi 138:6, 7.

8. Kii i ga hôla bés le di kwo bañ i hiandi hi huluk ñem? (Béñge yak titii.)

⁸ Yéhôva a bi ti bo nuga; a ti bo ngandak dikwaa. Ndi bon ba Israel ba bi ti bé Yéhôva mayéga inyu manyaga ma. Ngandak i bi nai ni huluk ñem. Ba bé ba kenek ba lok, juu ni njamuha, inyu bada ngandak dikwaa. Yéhôva a bi unbene i bôt “ba bééna huluk ñem ikeñi,” a kogse bo. (Ñañga bôt 11:31-34) Yak bés di nla ôt biniigana mu. Di yoñ yihe ni huluk ñem. Too di nyep, too di yé ngwañ, jam li bisu i niñ yés li nlama ba le di tééda “nkus i ngii,” hala wee di ba mawanda ma Yéhôva bo Yésu. (Matéô 6:19, 20; Lukas 16:9) Ibale di mboñ hala, ibabé pééna, Yéhôva a ga tééda bés.

9. Kii di nyi inyu Yéhôva?

⁹ Yak i len ini, Yéhôva a yé bebee i hôla bagwélél bé. Ndi hala a nkobla bé le di nla bé yep, to le njal i nla bé gwel bés.b Di nyi yaa le Yéhôva a’ tjôô bé bés kekikel. To imbe ndutu di mboma, a ga ba ni bés. Inyu tibil nok i jam li, di béñge mam ima i niñ yés, di tehe lelaa Yéhôva a ntééda bés: (1) i ngéda di nyep (2) i ngéda di mbadba le “d’a boñ lelaa i ngéda di ga un?”

I NGÉDA LIYEP LI NAI

10. Lelaa liyep li nla tééñga bés?

¹⁰ Di yé i kôôge bebee ni lisuk li nkoñ ’isi, inyu hala nyen di nla kônde sôôbe ikété liyep. Yubda, gwét, dimala tole bikuu bi nla boñ le di pémés moni yañga, di nimis bôlô yés, nkus wés, tole ndap yés. Di nla kahal yéñ bôlô ipe i homa di nyééne, tole di nla ke homa numpe ni lihaa jés inyu boñ le di laa tééda jo. Kii i yé le i hôla bés i bôdôl Yéhôva ñem ha ngéda i?

11. Kii i nla hôla we i ngéda u nyep? (Lukas 12:29-31)

¹¹ Jam li bisu li yé le: yible Yéhôva ñem. (Bingéngén 16:3) Bat nye pék inyu boñ le u yoñ makidik malam, u bat ki nye le a ti we ñem nwee inyu boñ le u ‘tôñ bañ iloo hihéga.’ (Añ Lukas 12:29-31.) Soohe nye le a hôla we i kon maséé ni mam u gwé. (1 Timôtéô 6:7, 8) Yéñ mu bikaat bi ntôñ inyu yi kii u nlama boñ i ngéda u nyep. Ngandak lôk kéé i yé i léba maéba malam mu jw.org, ma ma nhôla bo i ngéda ba nyep.

12. Mambe mambadga di yé le di badba inyu yoñ makidik malam?

¹² Bôt bahogi ba yé ba bana ngôñ i ke i sal haa ni lihaa jap, ndi ba yé ba sôk yimbe le hala a ta bé makidik malam. I ngéda u nyéñ bôlô, u nlama ndik bé hoñol moni, ndi hoñol yak hémle i lihaa joñ. (Lukas 14:28) Badba le: ‘Nwaa wem tole nlô wem a ga boñ lelaa ibale me ta bé ha? Lelaa m’a boñ ni makoda ni likalô?’ Ibale u gwé bon, badba yak i mbadga ini le: ‘Lelaa m’a néñés bo “ikété biniigana ni mabéhna ma Yéhôva” ibale me ta bé ha?’ (Éfésô 6:4) Nwas le Yéhôva nyen a éga we, u emble bañ lihaa joñ tole mawanda moñ ma ma ndiihe bé matiñ ma Yéhôva.c Ba bi kal Tony, nu a yé i Asia, le a ke a sal i mbeñge. A bi soohe mu jam li, a kwel ki ni nwaa. I mbus, a tjél bibôlô gwobisôna ba bé le ba ti nye ibale a neebe le a nke i mbeñge, a kit le nye ni lihaa jé, ba ga tibil gwélél i ndék moni ba gwé. Tony a nkal le: “Hala a bi hôla me i niiga ngandak bôt Bibel, yak bon bés ba ngwés Yéhôva ngandak. Me ni lihaa jem di bi pam i nok le ibale di noñ maéba ma kaat Matéô 6:33, Yéhôva a ga tééda ndik bés.”

I NGÉDA DI MBADBA LE: “D’A BOÑ LELAA I NGÉDA DI GA UN?”

13. Kii di yé le di boñ nano le ndi liyep li nol bañ bés i ngéda di ga un?

¹³ I nla ki ba bés ndutu i bôdôl Yéhôva ñem i ngéda di mbadba le: “D’a boñ lelaa i ngéda di ga un?” Bibel i nkal le di nlama tumbba ni nson inyu boñ le njal i nol bañ bés i dilo di nlo. (Bingéngén 6:6-11) Hala a ta bé béba i tééda moni ibale di gwé bigwel moo. Moni mi yé nseñ. (Ñañal 7:12) Ndi nyiña moni bé won u nlama ba jam li bisu i niñ yés.

14. I ngéda di ntôñ inyu dilo di nlo, lelaa kaat Lôk Héber 13:5 i nla hôla bés?

¹⁴ Yésu a bi kal le ibale mut a ntééda moni ndi a bak bé “ngwañ i bisu bi Nyambe,” hala a yé bijôñ. (Lukas 12:16-21) Mut a nyi bé lelaa kel y’a ye. (Bingéngén 23:4, 5; Yakôbô 4:13-15) Yésu a bi kal le di nlama ba bebee i “tjôô” nkus wés wonsôna ibale di nsômbôl ba banigil bé. (Lukas 14:33, buk isi lipep.) Banigil ba Yésu ba ba bé i Yudéa i hiai bisu ba bi neebe i jam li ni maséé momasôna. (Lôk Héber 10:34) Yak munu ngéda yés, ngim lôk kéé i bi neebe le liyep li tét bo, inyule ba bi tjél jôp i mam ma m’bô. (Masoola 13:16, 17) Kii i bi hôla bo? Ba bé bigda mbônga u Yéhôva unu le: “Me yé mbén i yék we, to tjôô me yé mbén i tjôô we.” (Añ Lôk Héber 13:5.) Di mboñ kii yosôna di nla inyu boñ le liyep li nol bañ bés. Ndi ibale mam ma mpuhe bés, di nyi le Yéhôva a yé ni bés.

15. Lelaa bagwal ba nlama tehe bon bap? (Béñge yak titii.)

¹⁵ I ngim biloñ, bagwal ba nhoo gwal inyu boñ le bon bap ba pala nañ, ba kahal sal, ba tééda ki bo i ngéda ba ga un. Ba nkal le bon bap ba yé “retraite” yap. Bibel i nkal le bagwal bon ba nlama tééda bon bap. (2 Korintô 12:14) I yé maliga le bagwal ba gwé ngôñ ni mahôla i ngéda ba ñun, ngandak boñge i yé ki maséé i hôla bagwal bap. (1 Timôtéô 5:4) Ndi bagwal ba nyi le maséé map ma yé le bon bap ba gwés Yéhôva, maséé map ma tane bé i moni bon bap ba yé le ba ti bo.—3 Yôhanes 4.

16. Lelaa bagwal ba nla niiga bon bap i yéñ koga kel? (Éfésô 4:28)

¹⁶ Unda bon boñ ni njel ndémbél yoñ le ba nlama bôdôl Yéhôva ñem, u niiga ki bo i sal bôlô i i nla ti bo koga kel. I ngéda ba yii disii, niiga bo le ba nlama sal ni ngui. (Bingéngén 29:21; añ Éfésô 4:28.) Kiki ba nañ, hôla bo i sal loñge i suklu. Bagwal ba ba ngwélél Yéhôva ba nlama yéñ matiñ ma Bibel mu bikaat bi ntôñ, ma ba nla gwélél inyu hôla bon bap i pohol suklu i i nla hôla bo i kôs koga kel, ni i ti libim jap li ngéda i nson u ñañ nlam.

17. Di nlama yi le kii?

¹⁷ I bés ba di ngwélél Yéhôva, di pééna bañ kekikel le Yéhôva a nla ti bés kii yosôna i mbéda bés, a gwé ki ngôñ i boñ hala. Lisuk li nkoñ ’isi unu li nkôôge bebee, jon manoodana ma ga hañ bé. Ndi to kii i mpémél bés, di bôdôl ndik Yéhôva ñem, di yik le a ga unda bés ngui yé, a ti ki bés i ni i i mbéda bés. Di hôya bañ le woo wé ngui, yak ni woo wé u lipémba u ta u bak bé kidik.