Nniiga wés Nunkeñi a niiga bés niñ yés yosôna

NDÉMBÉL I BAGWAL BEM

I nwii 1957, bagwal bem ba bi nyodi i Italia, ba ke i Kindersley, nyoo i Saskatchewan, i Kanada. I mbus ndék ngéda, ba yila Mbôgi Yéhôva. Nson u Yéhôva won u bé jam li bisu i niñ yés. I ngéda me bé mañge, me bé nom ngandak i likalô ni bagwal bem, yak ni lôk kéé yem, jon me yé me njôha le me bé “nsañal nu pes ngéda,” me ban-ga nwii juem!

Bagwal bem ba bé yep, ndi ba bi ti bés ndémbél ilam inyule ba bé ti ngéda yap yosôna i nson u Yéhôva. Kiki hihéga, i nwii 1963, ba bi nuñul ngandak gwom ba bééna le ndi ba bana moni inyu ke i likoda likeñi i Pasadena, nyoo i California, i Amérika. I nwii 1972, di bi ke liké bebee le 1 000 kilôméta inyu bol i Trail, nyoo i British Columbia, i Kanada; di bi ke i hôla likoda jada ni hop Italia. Pua yem a bé sal i mbôm sabe yada, a bé pubus yo, a bôñglak yo. A bé le a boñ mam mape inyu bana ngandak moni, ndi a bi tjél inyule a bé sômbôl ti ngéda yé i nson u Yéhôva.

Me nti bagwal bem mayéga inyu ndémbél ba bi unda me ni lôk kéé yem yo aa. Hala a bi boñ le me bôdôl nson wem loñge i ntôñ u Yéhôva. Ba bi niiga me jam jada me yé mbén i hôya, jon li yé le: ibale me nyéñ ndugi Ane, Yéhôva a ga kônde me mana mam mape momasôna.​—Matéô 6:33.

BIBÔDLE BI NSON WÉS U NSAÑAL

I nwii 1980, me bi bii Debbie, nlam mankéé nu muda wada, nu a bé ti ngéda yé i nson u Yéhôva. Ngôñ yés i bé le di yila basañal. Jon, sôñ aa i mbus libii jés, Debbie a bi yoñ nson nsañal. Nwii wada i mbus libii jés, di bi ke i hôla man likoda wada i het ngôñ i bé, ha nyen yak me me bi yila nsañal.

I mbus ngéda, di bi kahal tomb, di yéñ le di nyodi nyoo. Ndi di bi bôk ndugi di kwel lôñni ngwélél makiiña wada. A kal bés ni gwéha le: “Ni noode le béñge ibale bé bé bon ni mboñ le mam ma lédél bé. Baa ni ntehe bé le ni nhéléé ndigi i béñge mandutu manan? Ibale ni mbéñge loñge, n’a tehe le mam mahogi ma nke loñge.” Di bééna toi ngôñ ni maéba ma. (Tjémbi 141:5) Di bi pala nôgôl i maéba ma, di léba le mam malam ma bé ngandak mu nson wés. Ngandak lôk kéé i bé ti ngéda yap i nson u Yéhôva, yak boñge ba wanda ni lôk kéé i bôlôm, i balôm bap ba bé bé Mbôgi Yéhôva. Ndémbél yap i bi hôla bés ngandak. Di bi nok le di nlama béñge i mam ma nke loñge, di bemek le Yéhôva a tibil ma ma nke bé loñge. (Mika 7:7) Di bi témb di kahal gwélél Yéhôva ni maséé, nson wés u bé ke loñge.

I ngéda di bi ke i suklu yés bisu i basañal, balét ba bi kal bés le yak bo ba bi sal i biloñ bipe, i het ngôñ i bé. Ba bi unda bés bifôtô gwap, ba kal bés mandutu ba bi boma, ni bisai ba bi kôhna. Hala a bi ti bés ngôñ i yila bi missionnaire. Jon di bi yoñ makidik i jôp mu nson u.

Inyu kôôba i gwel nson u missionnaire, di bi ke ndugi i likoda jada ni hop Pulasi, i Québec. I likoda li, li bé haa ni British Columbia iloo 4 000 kilôméta. Hala a bé i nwii 1984. I bé béda le di yi bilem gwap lôñni hop wap. Ndutu ipe di bi boma nyoo i bé le di bééna bé moni bañga. I bi pam ngim ngéda le di bé di ke i wom u mut wada nyoo inyu bumbul pommes de terre, le ndi di laa je. Debbie a bééna pék le! A bé lémbél bés pommes de terre mintén nwominsôna. Ni i mandutu ma momasôna, di bi téñbe ni nson wés, di bak maséé. Di bé tehe ki woo u Yéhôva mu nson wés.​—Tjémbi 64:10.

Kel yada, ba bi sébél bés i téléfôn, hala a hélés bés. Ba bi kal bés le di kee di sal i Bétel i Kanada. Di bi bôk di yônôs lipep inyu ke i Suklu Giléad, jon i ngéda ba bi naña bés i Bétel, di bé maséé, ndi di badbaga mambadga. Di bi neebe yaa i ke i Bétel. I ngéda di bi bol nyoo, di bi bat mankéé Kenneth Little nu a bé mankéé wada mu lôk kéé i ñéga nson i Bétel le: “Ngo di bi yônôs lipep inyu ke i Giléad, d’a boñ lelaa nano?” A timbhe bés le: “I ngeñ ngéda y’a kola, d’a pôdôl i jam li.”

I mbus sonde yada ndigi, ngéda i kola, ba sébél me ni Debbie i Suklu Giléad. I bé béda le di yoñ makidik. Mankéé Little a kal bés le: “To umbe nson u mpohol i ntôñ u Yéhôva, i mbus ngéda, u yé le u yik tam le ‘me bak pon le me pohol umpe.’ Ndi minson mi Yéhôva mi nloa bé. To umbe u mpohol, a nsayap ndik we.” Di bi ke i Suklu Giléad. Mu nwii mi nwominsôna, di bi tehe toi le maéba ma mankéé Little ma bé malam. I ngéda di bé di boma lôk kéé i i bé lama pohol nson wada ipôla minson ima, di bé di kal bo minlélém mi bibuk mankéé Little a bi kal bés.

NSON WÉS U MISSIONNAIRE

Di bé maséé i ba i Suklu Giléad i nyônôs 83, di bé 24 baudu. I suklu i i bé nyoo i Brooklyn, i New York, i sôñ Matôp, nwii 1987. Balét bés ba bisu ba bé mankéé Ulysses Glass ni Jack Redford. Sôñ itan i bi pala tagbe, di mélés suklu i hilo 6 hi sôñ bôô, nwii 1987. Ba bi ep bés i Haiti lôñni John Goode bo nwaa wé Marie.

Ngélé sôk bi missionnaire bi bi ba i Haiti i bé i nwii 1962. Mu nwii u nyen ba bi buñga bi missionnaire bi bé sal nyoo. Sonde aa i mbus Suklu Giléad, di bi ke i Haiti. Di bé i man likoda nu a bééna 35 lôk kéé, haa nyoo i mbok dikôa. Di bé boñge ba wanda, di bééna bé pék bañga. Di bé bésbotama i ndap bi missionnaire. I bôt ba bé mu nkoñ u, ba bé yep, ba bé yi bé to añ. Mu nwii mi, gwét bi bé, bi coups d’état, bisônda bi kéñék minloñ, hié hi bak ngim bahoma, yak mbuk mbebi a bé hôñ ngandak.

I ngéda di bé tehe ñem ngui u lôk kéé i Haiti, di tehge lelaa ba ngwélél Yéhôva ni maséé, hala a bi lédés bés ngandak. Niñ i bé lédél ngandak ikété yap, ndi ba bé gwés Yéhôva, ba gwéhék likalô. Mbômbô wada a bé yi bé añ, ndi a bi tééda 150 minlôñ mi Bibel mu ño wé. I mandutu di bé tehe nyoo, ma bi kônde ti bés makénd i añle bôt le ndik Ane Djob yon y’a mélés mandutu ma bôt ba binam. Maséé ma bé le ma nol bés i ngéda di bé tehe bôt di bi niiga Bibel ba nyila basañal ba ngéda yosôna, basañal ba tôbôtôbô, ni mimañ.

Nyoo i Haiti, me bi boma Trevor, mañge wanda nu a bééna 20 ma nwii, a bé missionnaire i base ipe, me ni nye di bi kwélél mam ma Bibel ngandak ngélé. Ngéda i bi tagbe jôga, a éble me kaat, hala a hélés me. A bi tilna me le: “I likoda li makiiña li nlo ha, me ga sôblana! Me gwé ngôñ i témb i Haiti inyu ba nsañal nu tôbôtôbô i het me bi gwel nson u missionnaire i nlômbi wem base.” Hala ki nyen a bi boñ. A bi sal nyoo ngandak nwii ni nwaa wé.

NSON WÉS I ÉRÔPA NI I AFRIKA

Ba bi ep bés i Érôpa, i homa nson u ñañ nlam u bé ke loñge. I nwii 1992, di bi bol i Ljubljana i Slovénia, bebee ni i het bagwal bem ba bi néñél, ilole ba nke i Italia. Gwét bi bé bi yii nyoo i Nlômbi loñ i Yugôslavia. Bétel i Vienne i Ôstrélia, Bétel i Zagreb i Krôasia, ni Bétel i Belgrade i Serbia, yon i bé éga nson u ñañ nlam ha ngéda i, i homa di bé. Ndi i ngéda di bi ke nyoo, hiki loñ yon i bé éga nson u ñañ nlam mu nkoñ wé.

I bé béda ki le di nigil hop umpe, ni bilem bipe. I bôt ba bé mu loñ i, ba bé béna kal le: “Jezik je,” hala wee “Hop wés u nlet.” U bé let toi! Di bé maséé i tehe lelaa lôk kéé i bôlôm ni i bôda i noñ biniigana bi ntôñ, Yéhôva a kôbôk bo bisai. Di bi tehe ki lelaa Yéhôva a ntibil mam i loñge ngéda. I ngéda yosôna di bi sal i Slovénia, di bi nigil mam mape. Yak i mam di bi nigil i bahoma bape, ma bi hôla bés nyoo.

Ndi mam ma bi kônde héñha i niñ yés. I nwii 2000, ba bi ep bés i Côte d’Ivoire, i pes hiôñg i Afrika. I 11 sôñ, i nwii 2002, gwét bi bi boñ le di nyodi i Côte d’Ivoire, di kee i Siéra Léon. Gwét bi bi nom nyoo 11 nwii, bi bé bi ma tip mal. I ngéda di bi nyodi i Côte d’Ivoire ngwéé ni ngwéé, hala a bi tééñga bés le! Ndi i mam di bi nigil nyoo, ma bi hôla bés i ba maséé mu nson wés.

Bôt ba bé gwés ñañ nlam nyoo ngandak, yak lôk kéé i bi hônba mandutu gwét bi bi lona nwii ndi nwii. I mam ma mon di bé béñge. Lôk kéé i bé yep, ndi i bé kap ngandak. Sita yada i bi ti Debbie mambot. Debbie a bé sômbôl tjél, i sita i i kal nye le: “I ngéda gwét bi bé, lôk kéé i biloñ bipe i bé hôla bés. Nano yak bés di nlama hôla bôt bape.” Yak bés di bi kit le di nigle i lôk kéé i.

I mbus ngéda di bi témb i Côte d’Ivoire, Ndi gwét bi bi témb bi bôdôl nyoo. Jon i 11 sôñ, i nwii 2004, di bi nyodi nyoo ngwéé ni ngwéé ni Hélicopter, hiki mut a ban-ga ndik bot yé ngwéé. I u u, di bi nañal ’isi, i het bisônda bi Pulasi bi bé nañle. I kel i bé noñ ha, ba kena bés i Suwis. Di bi bol nyoo i Bétel i Suwis i ñem mau, lôk kéé i i nkena nson i Bétel, lôk kéé i i bé niiga i École de formation ministérielle lôñni baa bap, ba bi leege bés, ba sambla bés, ba kébél bés bijek bilam, ba ti yak bés chocolat i Suwis. Hala a bi tihba bés ngandak.

Ba bi ep ndugi bés i Ghana, i mbus, di témb i Côte d’Ivoire i ngéda gwét bi bi telep. Kiki di bé nyodi ngim bahoma, di kenek bahoma bape, lôk kéé i bi hôla bés ngandak, inyule i bé minyaô. Me ni Debbie di bi nôgla le tolakii di nyi le gwéha i yé i ntôñ u Yéhôva, di nlama bé hôya ti lôk kéé mayéga i ngéda ba ñunda bés gwéha. Yak mandutu di bi boma mu nson wés, ma bi kônde niiga bés ngandak mam.

NSON WÉS I MOYEN-ORIENT

I nwii 2006, hikuu hikeñi hi bi ômle bés kaat, lôk kéé i kal bés le di kee di sal i Moyen-Orient. Yak nyoo, di bi boma mam mape, mandutu mape, di nigil dilémb dipe ni bilem bipe. I homa nu a bi niiga bés ngandak mam, inyule mandutu ma bé nyoo, ma lôlak i mam ma m’bô ni mam ma base. I likoda li li bééna ngandak dilémb, adna i bak ki mu, inyule lôk kéé i bé noñ biniigana bi ntôñ. Lôk kéé i bi lémél bés ngandak inyule to hala kii ba bé kolba bo i homa ba bé yééne, i mahaa map, i suklu ni i bôlô, ba bé téñbe i nson u Yéhôva.

I nwii 2012 di bi ke i likoda likeñi i Tel Aviv, i Israel. Ibôdôl i Pentékôt 33 N.Y., Mbôgi Yéhôva i bé ngi kodba ngandak hala kiki i bi kodba yokel i Tel Aviv. Jam nyen a bé yokel!

Mu nwii mi, ba bi ep bés i ngim loñ i het ba nsôña nson wés. Di bi kena ndék bikaat nyoo, di añal ñañ nlam, di ke yak i bon ba makoda ma makiiña. Bisônda bi bé mbok yosôna ni mangaa, ba kéñék minloñ, ndi di bé kon bé woñi inyule di bé yoñ yihe i ngéda di bé ke ni ndék lôk kéé.

DI BI TÉMB I AFRIKA

I nwii 2013, ba bi ti bés nson umpe, ba ep bés i Bétel i Kôñgô Kinshasa, loñ ikeñi i i yé ilam kiyaga. Ndi liyep li yé nyoo ngandak, yak gwét bi mbéna ba nyoo. Di bi bôk di kal le: “Di nyi Afrika; di yé bebee i ke nyoo.” Ndi ngandak mam i yé le di bé yi bé, kii bo ngim bahoma, minloñ ni minyaañga mi bé mimbe. To hala di bi tehe ngandak mam malam. Kiki hihéga, lôk kéé i bé téñbe i nson Yéhôva, i bak maséé to hala kii liyep li bé nnayak. Ba bé gwés likalô, ba kenek i makoda, yak i makoda makeñi. Di bi tehe lelaa nson u bé ke loñge, inyule Yéhôva a bé sayap wo. Di yé mbén i hôya nwii nwominsôna di bi sal i Kôñgô. Di bi bana ngandak mawanda nyoo.

I lisuk li nwii 2017, ba bi ep bés homa numpe, i Afrika Nwelmbok. Di bé ngi sal i soso Bétel hala, yak bibôlô ba bi ti bés nyoo, di bé ngi sal gwo. Di bi nigil ki ngandak mam nyoo. Ndi i mam di bi bôk di nigil i bahoma bape, ma bi hôla bés. Di bi gwés ngandak lôk kéé i bôlôm ni i bôda i i bi gwélél Yéhôva nwii ndi nwii. Di bé ki maséé i tehe bilôk bikéé bi Bétel bi nsal lôñ yada ikété adna, tolakii ba gwé bé bilem gwada, to kôgôô yada. Yéhôva a nsayap lôk kéé inyule ba nhaba mut yondo, ba nôglak matiñ ma Bibel.

Mu nwii mi nwominsôna, me ni Debbie di ngwel ngandak minson, di meya bilem bi ngandak bôt, di nigil ki ngandak dilémb. Bun a ta bé ha, ndi hiki ngéda, di ntehe gwéha Yéhôva a ñunda bés ni njel ntôñ wé, ni bagwélél bé. (Tjémbi 144:2) Di nhoñol le i mam momasôna di nigil munu nson Yéhôva, ma nhôla bés i kônde bana bilem bilam.

Me yé maséé ni i mam momasôna bagwal bem ba bi niiga me, me yé ki maséé ni mahôla ma nwaa wem Debbie, yak ni ndémbél ilam i lôk kéé i bôlôm ni i bôda i nkoñ ’isi wonsôna. Mu dilo di nlo, di gwé ngôñ le Nniiga wés Nunkeñi a kônde niiga bés ngandak mam.