“Sébél mimañ”

1. Lelaa Yéhôva a bi unda le a ngwés mintômba nwé ngandak?

YÉHÔVA a ngwés mintômba nwé. A bi neebe le Man wé a wo inyu yap, a téé ki mimañ mi likoda le mi tééda nwo. (Minson mi baôma 20:28) Nyambe a nsômbôl le mimañ mi tibil tééda mintômba nwé. Isi énél i Yésu, mimañ mi nlédés mintômba, mi tadak nwo.​—Yésaya 32:​1, 2. 

2. Yéhôva a nlôôha yoñ ngéda ni njee? (Ézékiel 34:​15, 16)

² Yéhôva a ntôñ mintômba nwé nwominsôna ngandak, ndi i ngéda ntômba wada u nok ndutu, a nkônde ki yoñ ngéda ni wo. A ngwélél mimañ inyu hôla mintômba mi mi nkon. (Añ Ézékiel 34:​15, 16.) I ngéda di gwé ngôñ ni mahôla, a ngwés le di bat mo. Ha ngéda i, di nlama soohe nye inyu bat nye mahôla, di nlama ki bat “batééda bémba ni baniiga” mahôla.​—Éfésô 4:​11, 12.

3. Bimbe bisai di nkôs i ngéda di ntehe lelaa Yéhôva a ngwélél mimañ inyu hôla bés?

³ Munu yigil ini, d’a tehe lelaa Yéhôva a ngwélél mimañ inyu hôla bés. D’a timbhe mambadga mana le: Ngéda mbe di nlama bat mimañ mahôla? Inyuki di nlama bat bo mahôla? Lelaa mimañ mi yé le mi hôla bés? To ibale jam li ntééñga bé bés hanano, mandimbhe di ga kôs munu mambadga mana ma ga boñ le di kônde ti Nyambe mayéga inyu mahôla di nkôs ni njel mimañ, ma ga hôla ki bés i ngéda d’a bana ngôñ ni mahôla.

NGÉDA MBE DI NLAMA “SÉBÉL MIMAÑ”?

4. Inyuki di nkal le kaat Yakôbô 5:​14-16, 19, 20 i mpôdôl béba ikeñi? (Béñge yak bititii.)

⁴ Yakôbô a ntoñol lelaa Yéhôva a ngwélél mimañ inyu hôla bés. A nkal le: “Baa mut a nkon ipôla nan? Wee a sébél mimañ mi likoda.” (Añ Yakôbô 5:​14-16, 19, 20.) I minlôñ mi yé ha ipañ mi ñunda le Yakôbô a mpôdôl béba ikeñi. Kii nyis bés hala? A nkal bé le nkokon a nlama sébél dokta, ndi le a nlama sébél mimañ. Jam lipe li li ñunda le béba ikeñi yon Yakôbô a mpôdôl li yé le, i ngéda ba ntibil i nkokon nu, yak bibéba gwé bi nwéhlana. Di yé le di kal le i mam ma nlama bôña inyu tibil mut nu a mboñ béba ikeñi ma mpôna i mam dokta a mboñ inyu tibil nkokon. I ngéda mut a nkon, a nke a tehe dokta, a kal nye i homa a nok njôghe, a noñ ki maéba ma dokta. Nlélém jam, i ngéda mut a mboñ béba ikeñi, a nlama ke i tehe mimañ mi likoda, a kal bo i jam a mboñ, a nôgôl ki maéba mimañ mi nti nye.

5. Kii i nla yis bés le hémle yés i nkahal sôs?

⁵ Kaat Yakôbô pes 5 i niiga bés le di nlama tiige mimañ bebee ibale di ntehe le hémle yés i nkahal sôs. I yé loñge le di kôhna mahôla i bisu bi ngéda le ndi di boñ bañ jam li li nla ôbôs maada més ni Yéhôva! Bibel i ñunda le ibale di nyoñ bé yihe, di nla hoñol le di ngi gwé hémle i ngui, ki le hémle yés i bi sôs behee. (Yakôbô 1:22) Lôk kéé ihogi i likoda li Sardé i bi boñ hihôha hi, Yésu a ti bo maéba. (Masoola 3:​1, 2) Inyu boñ le di yi too di ngi gwé hémle i ngui, di nlama béñge i bôlô di bé sélél Yéhôva behee, ni i di nsélél nye nano. (Masoola 2:​4, 5) Di badba le: ‘Baa me ta ha bé maséé i añ Bibel ni i ôt pék mu? Baa me nkôôba makoda momasôna, baa me ntôl makoda ngim mangéda? Baa me ñañal ha bé ñañ nlam ni makénd momasôna? Baa me nlôôs ngandak ngéda i yéñ nkus ni i tuk niñ?’ Ibale di ntimbhe le ñ, wee di nkahal tomb; ibale di nyoñ bé yihe, di yé le di ke haa ni Yéhôva. Ibale di nla bé héñha i jam li bésbomede, tole ibale di nyi le di mboñ jam li li nlémél bé Yéhôva, di kee di bat mimañ mahôla.

6. I bôt ba mboñ béba ikeñi, ba nlama boñ kii?

⁶ Ndi ibale mut a mboñ béba ikeñi, hala wee béba i i nla boñ le ba héya mut i ntôñ, a nlama ke i tehe mimañ. (1 Korintô 5:​11-13) Nu ni nu a mboñ béba ikeñi a gwé ngôñ ni mahôla inyu boñ le a témb a yila liwanda li Yéhôva. Inyu boñ le Yéhôva a nwéhél bés ni njel sesema i Man wé, di nlama ‘boñ minson mi mi ñunda toi le di nhiel miñem.’ (Minson mi baôma 26:20) Mu minson mi, jam jada li yé le di kee di tehe mimañ ibale di mboñ béba ikeñi.

7. Handugi i bet ba mboñ béba ikeñi, bonjee ki ba gwé ngôñ ni mahôla ma mimañ?

⁷ Handugi i bet ba mboñ béba ikeñi, mimañ mi nhôla yak i bet hémle yap i nsôs ngui. (Minson mi baôma 20:35) Kiki hihéga, bebek u nla kon woñi le u kwoo ikété béba inyule u gwé ngôñ i boñ mam mabe hiki ngéda. Hala a nla ba ndutu inyu yoñ téntén ibale u bé ôt hibañga, u bé béñge bititii bi malal, tole u bééna niñ i nyega ilole u nyila Mbôgi Yéhôva. U hoñol bañ le u nla pamba wetama. U nla ke i tehe mañ u likoda, u ga ba bebee i emble we, i ti we maéba, ni i yis we le u nla lémél Yéhôva, u tjél ki boñ mam mabe. (Ñañal 4:12) Ibale u nkon woñi le u nla kwo ikété béba, mimañ mi ga hôla we i nok le bebek, hala a ñunda le u njôha bé ni liwanda joñ ni Yéhôva, ni ki le u yé mut suhulnyuu nu a nyi le a gwé ngôñ ni mahôla.​—1 Korintô 10:12.

8. Inyu bimbe bibéba di gwé bé le di kee ndik i tehe mimañ?

⁸ Di nlama bé ke i tehe mimañ inyu hiki béba di mboñ. Kiki hihéga, i nla pam le di kal mankéé nu munlôm tole nu muda jam li li mbabaa nye, bebek di unup yak ngandak. Iloole di ke i tehe mimañ, di nla noñ maéba ma Yésu mana le di sañgla ni i mankéé nu. (Matéô 5:​23, 24) Di nla yéñ i yom bikaat bi ntôñ bi nkal inyu bilem bini le ñemlima, wongut ni hôtnyuu inyu boñ le lisañ lipe, di laa unda bilem bi i nya i yôni. Ndi ibale nai i nai le wemede u ntehe le u nla bé sañgal ndañ, u nla bat mañ mahôla. I kaat Filipi, ñôma Paul a nkal mankéé wada nu Bibel i nsima bé jôl jé le a hôla Éwôdia bo Sintiké i sañgal ndañ nwap. Yak we, mañ wada mu likoda joñ u yé le u hôla we i sañgal ndañ woñ.​—Filipi 4:​2, 3.

INYUKI DI NLAMA SÉBÉL MIMAÑ?

9. Inyuki di nlama bé nwas le wonyuu i sôña bés i bat mimañ mahôla? (Bingéngén 28:13)

⁹ I mbéda bés hémle ni makénd inyu kôôge bebee ni mimañ i ngéda di mboñ béba ikeñi. Yak i ngéda di nkon woñi le di yé le di kwo i béba ikeñi, wonyuu i sôña bañ bés i kôôge bebee ni mimañ. Inyuki? Inyule i ngéda di nôgôl maéba ma Yéhôva, di ñunda le di mbôdôl nye ñem, ni ki le di nyi le i mam a niiga bés ma nla hôla bés i ba mbôô ni i bana hémle i ngui. Di nyi le di gwé ngôñ ni mahôla mé i ngéda di mbaage. (Tjémbi 94:18) Ibale di mboñ béba, di tam yo, ndi di boñ ha bé yo, Yéhôva a ga nwéhél bés.​—Añ Bingéngén 28:13.

10. Ibale di nsôô béba yés, imbe ndutu d’a kôhna?

¹⁰ Ibale di mboñ béba ikeñi ndi di ke i tehe mimañ, Yéhôva a nla nwéhél bés, di témb ki di bana maada malam ni nye. Ndi ibale di nsôô béba yés, d’a kônde nok ndutu. I Jam li jon li bi pémél Kiñe David, i ngéda a bi noode sôô béba yé, a bi nok ndutu ngandak. (Tjémbi 32:​3-5) I ngéda mut a nkon tole a mbabaa ndi ba tibil bé nye, a nkônde nok njôghe. Hala nyen i yé yak i ngéda mut a mboñ béba ikeñi, ndi a kôhna bé mahôla. Inyu hala nyen Yéhôva a nkal bés le di “kodol mam” ni nye, hala wee di kee di tehe mimañ a bi téé inyu hôla bés.​—Yésaya 1:​5, 6, 18.

11. Ibale di mboñ béba ikeñi ndi di sôô yo, kii hala a nlona?

¹¹ Ibale di nsôô béba ikeñi di mboñ, di nla yak boñ bôt bape béba. Maboñok més ma nla boñ le mbuu mpubi u sal bañ loñge i likoda, ma nla ki boñ le nsañ u ba bañ ipôla lôk kéé. (Éfésô 4:30) Ni ki le ibale di nok le mankéé a mboñ béba ikeñi, di nlama kal nye le a kee a tehe mimañ.a Ibale di nok le mut a mboñ béba ikeñi ndi di pot bé, wee yak bés di mboñ béba. (Lôk Lévi 5:1) Gwéha yés inyu Yéhôva i nlama tinde bés i yelel i jam li. Ibale di mboñ hala, likoda li ga ba mapubi. Yak i mut a mboñ béba a ga témb a yila liwanda li Yéhôva.

LELAA MIMAÑ MI NLA HÔLA BÉS?

12. Lelaa mimañ mi nhôla lôk kéé i i nkon?

¹² Bibel i nkal le mimañ mi nlama hôla i bôt ba ntomb. (1 Tésalônika 5:14) Ibale u mboñ béba, mimañ mi ga bat we mambadga inyu yi kii i yé we i ñem ni i mahoñol. (Bingéngén 20:5) Inyu boñ le ba tibil hôla we, kal bo mam momasôna, to ibale hala a ta bé bun inyu yoñ, bebek inyule u gwé bé lem i boñ hala, tole u nwo nyuu inyu jam u mboñ. U hoñol bañ le mimañ mi ga kal le u ‘mpopoda.’ (Hiôb 6:3) Mimañ mi ga pala bé yoñ makidik, mi ga yoñ ngéda i emble we loñge loñge inyu boñ le mi tibil nok i jam li ntééñga we ilole mi nti we maéba. (Bingéngén 18:13) Mimañ mi nyi le i tat bémba i nyoñ ngéda. Bebek, i ga béda le ni bomna ngandak ngélé inyu boñ le mimañ mi hôla toi we.

13. Lelaa masoohe ma mimañ ni maéba map ma nla hôla bés? (Béñge yak bititii.)

¹³ I ngéda u nke i tehe mimañ, mi ga boñ bé le kiññem i lôôha kéés we, mi ga soohe Yéhôva inyu yoñ. U yé le u tehe ngui i masoohe map, hala a hélés yak we. Mi ‘nhoo ki we môô i jôl li Yéhôva.’ (Yakôbô 5:​14-16) I “môô” ma, ma yé Bañga i Nyambe. Mimañ mi ga gwélél Bañga i Nyambe inyu lédés we ni i ti we hogbe, mi ga hôla ki we le u témb u yila liwanda li Yéhôva. (Yésaya 57:18) I maéba mimañ mi ga ti we ma nla lédés we, ma hôla ki we i ke ni bisu i boñ sômbôl i Yéhôva. A yé ndik wengoñle u nok Yéhôva a nkal we le: “Njel ini. Kil mu.”​—Yésaya 30:21.

14. Inoñnaga ni Galatia 6:​1, lelaa mimañ mi nhôla lôk kéé i i “nyoñ béba njel”? (Béñge yak bititii.)

¹⁴ Añ Galatia 6:1. Lôk kéé i i “nyoñ béba njel” i mboñ ha bé mam inoñnaga ni mambén ma Yéhôva. Béba njel i nla ba hihôha tole béba ikeñi. Gwéha i ntinde mimañ le mi ‘noode kodol i mut nu ni ñemlima.’ I buk Lôk Grikia ba nkobol hana le ‘kodol,’ ba mbéna gwélél yo inyu pôdôl yom ba mboñ inyu timbis hés i i nsela inyu boñ le mut a kwo bañ bôk. Kiki bañga dokta a noode kodol hés, a yoñok yihe le nkokon a nok bañ njôghe ngandak, hala yak nyen mimañ mi nhôla lôk kéé i i mboñ béba, mi yoñok yihe le mi kônde bañ bo njôghe i ngii njôghe. Bibel i nkal ki le ba ‘tadak bomede.’ I ngéda mimañ mi nhôla lôk kéé, mi nlama bé hôya le yak bo, ba yé bikwéha ni le ba nla baage. Ba nlama bé hoñol le ba nloo lôk kéé, le ba téé sép iloo bo; ba nlama bé to kéés bo, ndi ba nlama kônôl bo ngoo.​—1 Pétrô 3:8.

15. I ngéda di gwé ndutu, kii di yé le di boñ?

¹⁵ Di nlama bôdôl mimañ ñem. Yéhôva a bi niiga bo le ba nlama bé yelel mam més, le maéba ba nti bés ma nlama lôl ikété Bibel, he i mahoñol map bé ni le ba nlama hôla bés i begee mbegee yés. (Bingéngén 11:13; Galatia 6:2) Hiki mañ u gwé gwé bilem, ndi di nla ke yak to umbe mañ i ngéda di gwé ndutu. Di ke bañ yak mimañ nwominsôna, di badak maéba, di hoñlak le d’a tehe mañ wada ikété yap u u ga kal bés i yom di gwé ngôñ i nok. Ibale di mboñ hala, d’a ba kiki bôt ba ba gwé ngôñ le ba “nyuñgul bo maôô” iloole ba emble “biniigana bi maliga” bi bi yé ikété Bañga i Djob. (2 Timôtéô 4:3) I ngéda di nke i tehe mañ wada, u nla bat bés too di nkwel ni mini mimañ mimpe mu jam li. I mañ u, u yé ki le u bat bés mambe maéba mini mimañ mimpe mi nti bés. Ni suhulnyuu yosôna, nyemede a yé le a bat mañ umpe maéba.​—Bingéngén 13:10.

MBEGEE YÉS

16. Imbe mbegee hiki wada wés a gwé?

¹⁶ Mimañ mi ntééda i bés ba di yé bémba i Nyambe, ndi bo bé bon ba nkal bés makidik di nlama yoñ. Mbegee i hiki wada wés i yé le di niñ inoñnaga ni matiñ ma Yéhôva. Di nlama timbhe i bisu bi Nyambe inyu bibuk gwés ni maboñok més. Ni mahôla mé, di nla gwélél nye ni ñem wés wonsôna. (Rôma 14:12) Jon mimañ bé nwon mi nkal bés makidik di nlama yoñ, mi nhôla bés i yi ni i bana mahoñol ma Yéhôva ma ma yé mu Bañga yé. I ngéda di nôgôl maéba ma mimañ, di ‘nsélés ngap yés i hek pék’ inyu boñ le di yoñ makidik malam.​—Lôk Héber 5:14.

17. Kii di nlama boñ?

¹⁷ Kinje maséé le di yé mintômba mi Yéhôva! Yéhôva a bi ep “loñge ntééda mintômba,” Yésu, le a wo inyu yés inyu boñ le di bana niñ boga. (Yôhanes 10:11) Yéhôva a ngwélél mimañ mi likoda inyu boñ i jam a bi bôn, a bi kal le: “Me ga ti bé batééda bémba ba ba mboñ sômbôl yem, ba ga ti ki bé bijek lôñni yi ni pék.” (Yérémia 3:15) I ngéda di ntomb, tole i ngéda di mboñ béba ikeñi, di kon bañ woñi i sébél mimañ. Yéhôva nyen a bi ti bés likébla lini le mimañ, jon di nlama kôôge bo bebee.