Kii Bibel i nkal inyu bôt ba ba niñ ibabé le ba ba mbiibaga?
Ndimbhe i Bibel
Bibel i nkal le Djob a nsômbôl le bôt ba ‘tjél malal ma nyega.’ (1 Tésalônika 4:3) Ikété Bibel, i buk ini le “malal ma nyega” i mpôdôl maada ipôla bôlôm ni bôlôm tole bôda ni bôda, i mpôdôl ki maada ipôla munlôm ni muda ba ba ta bé mbiibaga.
Inyuki i nlôôba ba nseñ i ba mbiibaga?
Djob nyen a bi téé libii. A bi at libii li bôt ba binam ba bisu. (Bibôdle 2:22-24) Mahoñol mé ma bé bé le ilole bôt ba mbiiba, ba niñ ndugi ntôñ.
Djob a nyi kii i nlôôha ba loñge inyu bôt ba binam. A bi at libii ipôla muda ni munlôm, libii jap li bé lama nom niñ yap yosôna. Libii li yé malômbla ma ma yé loñge inyu lihaa jolisôna. Di yoñ hihéga. Biniigana Yéhôva a nti inyu babiina bi yé kiki man kaat a nhôla bés i tibil gwélél ngim kei. Nlélém kiki man kaat a nla hôla i tibil gwélél kei, hala nyen biniigana Djob a nti mahaa bi nhôla bo i bana adna ni maséé. Biniigana bi Yéhôva bi yé ndik inyu loñge yés.—Yésaya 48:17, 18.
Man kaat i mut a mbañ yom a nti, a nla hôla i mut a nsomb i yom i, i tibil gwélél i yom i. Biniigana Djob a nti babiina bi nhôla bo i ba maséé mu lihaa jap
I lal ni mut ibabé i ba mbiibaga i nlona bikuu. Kiki hihéga, muda a nla ba jém ki le a yéñék bé man, u nla bana ngim kon, tole kiññem i nla bôdôl kéés we.
Malal ma yé likébla Djob a bi ti muda bo munlôm ba ba yé mbiibaga inyu bana bon. Inyu Djob, niñ i yé tik. I gwal man i yé likébla lilam. Djob a ngwés le di lal ndik ni sobiina wés inyu éba le di ndiihe likébla li malal. I boñ hala, i ñéba le di ndiihe libii.—Lôk Héber 13:4.
Baa i yé nseñ i niñ ndugi ni mut ilole u mbii nye?
Inyu bana loñge libii, i ta bé nseñ le u “bôk ndugi u noode” mut ilole u mbii nye; i mbus, u bagla ni nye ibale ni nôgla bé. Maselna ni hala, maada ma babiina ma nkônde let i ngéda hiki wada a ndiihe malômbla ba bi boñ, ni i ngéda bo iba ba mboñ biliya i yémbél mandutu ba mboma.a I biiba i bisu bi ngomin i nkônde lédés maada ma libii.—Matéô 19:6.
Kii i nla hôla bôt i bana loñge libii?
Muda bo munlôm ba ta bé peles. Ndi babiina ba nla boñ le libii jap li ba lilam i ngéda ba nôgôl matiñ ma Bibel. Di béñge ini ndék maéba:
U nlama ndugi tôñ sobiina woñ.—1 Korintô 7:3-5; Filipi 2:3, 4.
Ni kee ni bisu i hôlôs gwéha ipôla nan ni i tina lipém.—Éfésô 5:25, 33.
Ni yoñ yihe ni bipôdôl binan.—Bingéngén 12:18.
Ni bana wongut, ni bak bebee i nwéhél.—Kôlôsé 3:13, 14.
a Béñge nkwel unu le “Maséé ma ndap libii—Mayegna.”