Baa liyep li ga mal kel yada?

Ikété ngandak biloñ, u ntehe bôt ba mboñ minyiñgha mu minloñ inyu kolba bangomin, inyule ba nkal le ngomin a ntibil bé gwélél moni mi loñ. Téntén ni himala hi COVID-19 hini, mam ma nkônde let inyule bôt ba pamak bé mandap, njal i nai, to bañga matibla i ta bé. U nla pala yimbe hiyeyeba ni ngwañ mut.

Baa mam ma moni ma ma ntééñga bôt i len ini ma ga mal kel yada? Ñ. Bibel i ntoñle bés lelaa Djob a ga boñ inyu mélés mandutu di boma len.

Djob a ga mélés mam ma moni ma ma ntééñga bôt

Ndutu: Bôt ba binam ba bi téé bé ngim ntôñ u u ntjek mam ma moni ikété nkoñ ’isi wonsôna kayéle mam momasôna ma ba nlélém inyu bôt bobasôna.

Yom Djob a ga boñ: Djob a ga tjé biane bi nkoñ ’isi inyu téé Ane yé. Ane Djob i ga ba i ngii ndi i énlak hana ’isi.—Daniel 2:44; Matéô 6:10.

Kii hala a ga lona: Kiki yotama yon i ga ba, Ane Djob i ga énél hisi hiosôna i nya i téé sép. Bôt ba binam ba ga nok ha bé ndutu inyule ba gwé bé bigwel moo. (Tjémbi 9:8-10, 19) Ba ga nok lingoñoo li matam ma nson wap, ba niñ ki ikété maséé lôñni mahaa map. Bibel i mbôn le: “Ba ga oñ mandap, ba yén ki mu, b’a bel nwom mi minkôô mi wai, ba je ki matam map. B’a oñ bé mandap, le bôt bape ba yén mu, to bel nwom ndi bôt bape ba je nwo.”—Yésaya 65:21, 22.

Ndutu: Bôt ba nla bé keñgle mam ma nlona mandutu ni liyep.

Yom Djob a ga boñ: Ni njel Ane yé, Djob a ga héya mam momasôna ma nkônha bés woñi.

Kii hala a ga lona: Isi énél i Djob, bôt ba ga kon ha bé woñi inyule ba gwé bé bigwel moo inyu yap ni inyu mahaa map. Kiki hihéga, gwét, njal ikeñi ni dimala bi ga ba ha bé. (Tjémbi 46:10; 72:16; Yésaya 33:24) Nyambe a nkal le: “Bôt bem b’a yén i liyéene li nsañ, ikété mandap ibabé nduña, ni ikété manôyôi ma hogbe.”—Yésaya 32:18.

Ndutu: Bôt ba mbéna son njonok inyule bôt ba wim ni bôt ba huluk ñem ba mpôh bo.

Yom Djob a ga boñ: Bôt ba ba ga ba isi Ane Djob b’a nigil i yéñ gwéñe bi bôt bape iloo gwéñe gwap bomede.—Matéô 22:37-39.

Kii hala a ga lona: Isi énél i Djob, bôt bobasôna ba ga unda gwéha i Nyambe i i “i nyéñ bé ndik yéñe yé yomede” (1 Korintô 13:4, 5) Bibel i nkal le: ‘Ba ga boñ bé mut nye ki nye béba, to tjé yom hikôa hiem hipubhaga hiosôna, inyule hisi hiosôna hi’a yon ni yi i Yéhôvaa nlélém kiki malép ma nhô ndip tuye.’—Yésaya 11:9.

Bibel i ñunda le di niñil i dilo di nsôk di nkoñ ’isi unu, ni le ndék ngéda Nyambe a ga yônôs mbônga wé i mélés mandutu ni liyep.b (Tjémbi 12:6) Ndi i len ini, matiñ ma Bibel ma nla hôla we i kon maséé i niñ yoñ to ibale u gwé bé ngandak bigwel moo. Kiki hihéga, béñge miño mi minkwel mini le “Comment vivre avec moins” ni “L’argent et vous.”

Minkoda mi mahoñol inyu Bibel ni moni

Minkoda mi mahoñol: Liyep li ga mal bé kel yada inyule Yésu a bi kal le: “Ni gwé diyeyeba ngéda yosôna.”—Matéô 26:11.

Maliga: Yésu a bé unda i yom i yé maliga, a bi éba le: Ntel di yé munu béba nkoñ ’isi ini, diyeyeba di ga ba ndigi. Ndi, nwin u Yésu u yé ‘ñañ nlam inyu diyeyeba,’ ñañ nlam u Ane Djob i i ga mélés liyep i boga ni boga.—Lukas 4:18, 43.

Minkoda mi mahoñol: I bôt ba nsômbôl lémél Djob ba nlama ba diyeyeba inyule Yésu a bi kal le: “Ke nuñul gwom gwoñ gwobisôna, u ti diyeyeba.”—Matéô 19:21.

Maliga: Yésu a bé sômbôl bé kal le banigil bé bobasôna ba nlama boñ hala. A bé ti ndik i ngwañ mañge wanda unu maéba inyule niñ yé i bé kiiña ndik mu lingwañ jé. Yésu a bé kal i munlôm le a suhus likala jé li niñ, a neebe nsébla wé inyu yila nnigil wé.

Minkoda mi mahoñol: Djob a nti bôt lingwañ, inyule Bibel i nkal le: “Bisai bi Yéhôva gwon bi nlona lingwañ.”—Bingéngén 10:22, MN.

Maliga: Ikété Bibel, i bibuk bini le “bisai bi Yéhôva” bi mbéna gwéélana inyu pôdôl bisai i pes mbuu, kiki bo niñ ilam, maada malam ni Djob, lôñni botñem. (Tjémbi 25:14; Yôhanes 17:3) I yé maliga le Djob a bi ti bagwélél bé bahogi lingwañ, ndi libim li bagwélél bé li ta bé mingwañ mi bôt. (Bibôdle 24:34, 35; Yakôbô 2:5) Yésu nyemede a bééna ndik ndék gwom inyu niñ.—Matéô 8:20.

Minkoda mi mahoñol: Bibel i gwé biniigana bi communisme, inyule i nkal inyu bikristen bi hiai bisu le: ‘Ba bééna mam momasôna lôñ, ba nuñlak gwom gwap ni nkus wap.’—Minson mi baôma 2:44, 45.

Maliga: I nlôñ kaat unu u mpôdôl bitelbene bi bi yôña ngim ngéda inyu hôla bikristen bi bi bi tip jôp i maliga. I bikristen bi, bi bi ke i Yérusalem inyu lôôs ngand i pentékôt. (Minson mi baôma 2:5) Ndi ngéda ba bi sôblana, ba bi kônde yén i Yérusalem inyu lédés hémle yap. Jon lôk kéé yap i bi ti gwom ba bééna inyu hôla bo.—Minson mi baôma 2:41, 42, 46, 47.

a Yéhôva a yé jôl li Djob li li yé ikété Bibel.—Tjémbi 83:19.

b Inyu yi inyuki u nla bôdôl Bibel ñem, béñge ño nkwel unu le “Bibel i yé kaat i i gwé maliga.”