Baa Djob a gwé ngim jôl?

Ndimbhe i Bibel

Bôt bobasôna ba gwé bañga yap jôl. Baa i kôli ni bé le yak Djob, tole Nyambe, a bana bañga yé jôl? I ngéda bôt ba nyéñ bot mawanda, jam li bisu li yé le ba yina môl. Baa hala a ta bé nlélém jam inyu bot liwanda ni Nyambe?

Ikété Bibel, Djob a nkal le: “Men me yé Yéhôva, jôl jem li.” (Yésaya 42:8) I yé maliga le Nyambe a gwé ngandak bitel, kiki bo “Nyambe Nu ngui yosôna,” “Nwet Bayemlikok,” ni “Nhek,” ndi a nti bagwélél bé lipém i gwélél bañga yé jôl inyu kwel ni nye.​—Bibôdle 17:1; Minson mi baôma 4:24; 1 Pétrô 4:19.

Ikété ngim ngobol i Bibel, bañga jôl li Nyambe, li nene i kaat Manyodi 6:3. Di ñañ mu nlôñ u le: “Me bé pémél Abraham, Isak ni Yakôb kiki Nyambe Nu ngui yosôna; ndi inyu jôl jem le Yéhôva, me bi yina bé ni bo i nya i yôni.”

Yéhôva a yé jôl li Djob, la nyen Basaa ba nsima jo nwii ndi nwii. Ngandak bayiman i mbéna gwélél “Yahwéh,” tole “Yahvé,” ndi Yéhôva nyen a nlôôha yiba i hop wés. Pes bisu i Bibel i bi tilba bé i hop Ngisi, to i hop Basaa, ndi i bi bôk tilba i hop Lôk Héber, het ba ñañ bibañga ibôdôl i walôm, u kenek i waé. Mu hop u, jôl li Nyambe li ntilba lôñni bibañga bina, יהוה. Bibañga bina bi i hop Lôk Héber, ni hop Basaa, bi yé, YHWH, bi Pulasi ba nsébél ki le, “tétragramme” (bibañga bina).