Inyuki ni nke bé gwét?

Inyu manjom mana mon Mbôgi Yéhôva i nke bé i gwét:

1. Inyu nôgôl Djob. Bibel i nkal le bagwélél ba Djob “b’a ôô pa minsoñ yap disoo, yak makoñ map mangwende,” i nkônde ki le b’a ‘jôp ha bé yigil gwét.’—Yésaya 2:4.

2. Inyu nôgôl Yésu. Yésu a kal ñôma Pétrô le: “Timbis pansoñ yoñ homa wé, inyule ba bobasôna ba mbada pansoñ ba ntjiba ni pansoñ.” (Matéô 26:52) Ni bibuk bi nyen Yésu a bi unda le banigil bé ba bé lama bé begee bijôl bigwét.

   Banigil ba Yésu ba noñ mbén yé ini le “ba ta bé ba nkoñ ’isi,” mu kii ba nyoñ bé ngaba i mam ma m’bô. (Yôhanes 17:16) Ba nkolba bé bisônda, tole ba nsôñga bé to i bet ba nsômbôl yila bisônda i yônôs ngôñ yap.

3. Gwéha yap inyu bôt bape. Yésu a ti banigil bé oda le ba “gwéhna” (Yôhanes 13:34, 35) Ni hala nyen ba bé lama ba lihaa likeñi li bilôk bikéé ni nkoñ isi wonsôna i het mut to wada a bé lama bé jôs masañ.—1 Yôhanes 3:10-12.

4. Ndémbél i bikristen bi hiai bisu. I kaat ini le Encyclopedia of Religion and War i nkal le: “Banigil ba Yésu ba bisu ba bé tjél ke i gwét to yila sônda,” ba nyik le maboñok ma, ma bé “kiha bé ni biniigana bi gwéha bi Yésu, yak ni oda yé le mut a gwés baoo bé.” Mu nlélém kiñ nyen mut jaman wada, nu a yé yak mut base nunkeñi le Peter Meinhold a kal inyu banigil ba bisu ba Yésu le: “I ba kristen ni sônda bi bé gwom biba bi bé kiha bé.”

I yoñ ngaba bibôlô bi libôga jap

Mbôgi Yéhôva i yé bôt ba mahee ikété libôga. Ba ta bé bôt ba lisanda i loñ het ba niñ. Di nti bôt ba ngomin lipém, inoñnaga ni bini bioda bi Bibel le:

• “Hi mut a suhus nyemede isi baane ba kéhi ngii yé”—Rôma 13:1.

• “Ndi tina ni Kaisa gwom bi Kaisa, Nyambe ki gwom bi Nyambe.”—Matéô 22:21.

Jon, di nôgôl mbén, di saak tas, di salak ki ntôñ ni ngomin ikété biliya gwé inyu boñ le bôt bobasô ba niñ loñge.