Baa Mbôgi Yéhôva i nhémle malômbla ma kwañ?

Ñ. Mbôgi Yéhôva i nhémle le Bibel yôsôna “i nlôl ni Nyambe, i mbahal.” (2 Timôtéô 3:16) Hala a ntihba Malômbla ma kwañ ni malôbla ma yondo, kiki ngandak bôt i nsébél. Ndi Mbôgi Yéhôva yo i mbéna sébél bipes bi Bibel bi le Bitilna bi Lôk Héber ni Bitilna bi Lôk Grikia bi ngéda bikristen. Ni liboñok li nyen, di ñunda le inyu yés, Bibel yosôna i yé mahee.

Inyuki bikristen bi gwé ngôñ ni bipes bi Bibel gwo biba, hala wee malômbla ma kwañ ni malômbla ma yondo?

Mbuu mpubi u bi tinde ñôma Paul i tila le: “Inyule mam ma bôk tilba ngéda bisu, momasôna ma tilba ndik le di kôs maéba mu.” (Rôma 15:4) Biniigana bi mahee inyu yés bi nlébna ikété Bitilna bi Lôk Héber. Bi gwé miñañ mi ntihbana, ni maéba ma mahee.

• Miñañ mi ntihbana. Bitilna bi Lôk Héber bi mpôdôl ñañ u gwom Djob a bi hek, ni lelaa béba i i bi jôb ikété nkoñ isi. Ibabé bi biniigana, di bé bé le di yi mandimbhe ma ngim mambadga kiki bo: Hee di nlôl? Inyuki bôt ba nwo? (Bibôdle 2:7, 17) Ni ki le, Bitilna bi Lôk Héber bi añle ki bés maboñok ma Yéhôva Djob i pañ litén jé, li li bi kôs maséé, li kôs ki mandutu ma di mboma i len ini.​—Yakôbô 5:​17.

• Maéba ma yé mahee. Bikaat bi Bibel bini le Bingéngén ni Ñañal bi bi yé ikété Bitilna bi Lôk Héber bi yé yonok ni pék i niñ i i gwé bé nwaa. Bi nti maéba inyu bana niñ i maséé ikété ndap lihaa (Bingéngén 15:17), bi nhôla bés i bana matehge malam inyu bôlô (Bingéngén 10:4; Ñañal 4:6), ni lelaa boñge ba wanda ba nla gwélél libak jap li njohok bôt kayéle ba nkôs maséé kiyaga (Ñañal 11:9–​12:1).

U héya hala, di nla ôt nseñ i nigil Mbén Môsé i ba nléba ikété bikaat bi-tan bi bisu bi Bibel, bi ba béna sébél le Tôra. Tolakii Mbén i i ta bé inyu bikristen tôbôtôbô, i gwé biniigana bi mahee bi bi nla hôla bés i bana niñ i maséé.​—Lôk Lévi 19:18; Ndiimba Mbén 6:​5-7.