“Me bé nene kiki mut a gwé mam momasôna i niñ yé”

NIÑ ME BÉ NIÑ KÔBA

Me bi gwéé i Montréal, soso tison i loñ Kanada, i nkoñ Québec. Me ni Iôk kéé yem yo iaa di bééna bagwal ba ba ngwés bés, di bi néñel ki i loñge libôga le Rosemont. Di bi nañ ikété maséé ni nsañ.

Ngéda me bé mañge, me bé gwés mam ma Bibel. Me ngi hoñlak le i ngéda me bééna 12 nwii, me bi añ ñañ u niñ u Yésu ikété Malômbla ma Yondo, u bi lémél me iloo héga. Gwéha ni konangoo a bé unda bôt i bi tihba me, kayéle me bé yéñ nigle nye. Ngoo le mu kii me bé nañ, ngôñ i i bi hoi ndék ni ndék ngéda me bi bôdôl adba ni bilôñ bibe.

Pua yem a bé nkôt ngombi (saxophoniste), a bi ti ndik bé me kudul yé, ndi yak gwéha inyu nsik kayéle u bi yila jam li bisu i niñ yem. Me bé lôôha gwés nsik, jon me bi hoo nigil kôt hiluñ. I mbus ngéda, me ni mawanda mem di bot ngim nlôñ bakôt nsik ba nsébél le rock, di kôdôk i ngandak bahoma. Bapémés nsik bakeñi ba bi kahal kôôge me bebee le di sal ntôñ. Me bi sane mapep ni soso ndap i het ba mpémés nsik inyu sal ntôñ bo. Nsik wem u bi pala yiba, u nôgaga ki hiki ngéda i nkuu mahop (radio) i Québec.

Me bé nene kiki mut a gwé mam momasôna i niñ yé. Me bé mañge wanda, ba yik me homa nyensôna, me bé gwés i yom me bé boñ i tinak ki me ngandak moni. Njamuha me bé ke i hianda nyuu, i mbus me bé timbhe mambadga bôt ba bé bat me, me bé tagbe ki nkuu biliñgeliñge, me san-ge i mapep tole i manyuu ni mambot ma bôt ba ngwés nsik wem. Ni juu, me bé kôt nsik i ngandak bahoma me tuguk niñ. Inyu kôt ni makénd i bisu bi limut, me bi bôdôl nyo moog me sôk me kahal ôt hibañga. Me bééna niñ i yubda ni i nyega.

Ngim bôt i bééna ngôñ i niñ kiki me inyule me bé nene wengoñle me yé maséé. Ndi ikété yem, me bé nôgda binyuu, téntén ngéda me bé metama. Me bi bôdôl bana nduña, me bé yodop ki. Ngoo le kiki me bi pam i yila nkôt nsik nunkeñi, ipôla bôt me ni bo di bé sal bôt iba mukété ba bi wo SIDA. Hala a bi tééñga me ngandak! Tolakii me bé gwés nsik, i niñ i i bi kahal bébél me.

LELAA BIBEL I BI HÉÑHA NIÑ YEM

To hala kii me bé yiba, me bé nôgda le nkoñ ’isi u yé yonok ni mandutu. Me bé badba le inyuki ngitelepsép i yé homa nyensôna? Inyuki Nyambe a boñ bé to jam? I pot maliga, me bé me soohe Nyambe inyu kôhna mandimbhe. Lisañ jada me bi yoñ noi, me témb me bôdôl añ Bibel. Me bé nok bé yom me bé añ, ndi me bi sôk nok le lisuk li hisi li yé bebee.

Mu kiki me bé añ Bibel, me bi léba le Yésu a bi tégbaha 40 dilo i ñoñ ngi je. (Matéô 4:​1, 2) Me bé hoñol le ibale yak me me mboñ nlélém, bebek le Nyambe a ga éba me mam me bé yéñ yi, jon me bi téé ngim kel me nlama bôdôl. Sonde iba ilole me bôdôl yén ngi je, Mbôgi Yéhôva iba i bi kode likôga jem, me jubus bo wengoñle me bé bemek bo. Ha nyen me bi nun wada wap i mbom ni mbom, jôl jé li bé le Jacques, me bat nye le: “Kii i yis bés le di niñil toi i dilo di nsôk di nkoñ ’isi unu?” Inyu timbhe me, a bi yibil Bibel yé a añ kaat 2 Timôtéô 3:​1-5. I mbus, me kahal bat bo ngandak mambadga mape, me bi hel le mandimhe map momasôna ma bé ma téé, ma nôôgaga loñge, ma pémlak ki i Bibel. I mbus le me bi kwel ndék ni bo, me bi nôgda le me ta bé nyégsaga i yén njal.

Me bi bôdôl nigil Bibel hiki ngéda ni Mbôgi Yéhôva. Me bi sôk kit minbôñgô nwem mi tjôñ, me kahal ke i makoda hiki sonde i Ndap Ane. Maleege malam me bi kôs i makoda ma, ma bi kwés me nkaa le me nléba toi maliga.

I pot maliga, inyu boñ le me bii i mam me bé nigil i bisélél, me bé lama lona mahéñha ma ngui i niñ yem. Kiki jam li bisu, me bé lama tjôô hibañga ni niñ i nyega. Me bé lama ki nwas lem i tôñ ndigi memede, me bôdôl tôñ yak bôt bape. Kii me bé néñés bon bem bo iba metama, me bé lama yoñ ndun ni bo i pes mahoñol ni i pes mbuu. Jon me bi nwas bôlô nsik, me bôdôl sal i ingin (usine) het me bé kôhna bé ngandak moni.

I boñ mahéñha ma i bé bé jam li ntomb. Mu kiki me bé boñ biliya bi ngui i waa ôt hibañga me bi témb me kwo mu hiandi hi. (Rôma 7:​19, 21-​24) I tjôô béba niñ me bééna i bé bé jam li ntomb to ndék. U héya hala, bôlô yem i mondo i bé wéés me ndi to ngandak moni i bé ti bé me. I bé béda me sôñ aa le me pam i kôhna nlélém nsaa me bééna ndigi i mbus ngeñ iba i bôlô ngéda me bé ntôp tjémbi.

Masoohe hiki kel ma bi hôla me i hônba mangéda mabe ma. Me bi léba ki le i soñgol Bibel hiki ngéda i yé nseñ ngandak. Ngim minlôñ mi Bibel mi tôbôtôbô mi bi lédés me kiki bo u u mpémél i kaat 2 Korintô 7:1 u u nkal le: “Wee di pubus bésbomede ni mam momasôna ma nhindis minsôn ni mbuu.” Nlôñ u Bibel umpe u u bi kwés me nkaa le me nla pam i yémbél libak jem libe u yé kaat Filipi 4:​13 u u nkal le : “Inyu mam momasôna, me gwé ngui ni njel nu a nti me lipémba.” Yéhôva Nyambe a bi emble masoohe mem, a hôla ki me i nok ni i bii matiñ ma Bibel i bisélél. Hala a bi tinde me i ti memede nkikip yak Yéhôva. (1 Pétrô 4:​1, 2) Me bi sôblana i nwii 1997.

UMBE NSEÑ ME BI KÔHNA

Me yé nkwoog nkaa le ibale me ke ni bisu ni niñ yem i kôba, ki len me yé nwok. Maselna ni hala, me niñ ikété maséé! Nwaa wem Elvie a yé toi likébla li nlôl me ni Djob. Me ni nye di yé basañal ba ngéda yosôna, di yé maséé i niiga bôt Bibel. Hala a nlona me ngandak maséé. Me nti Yéhôva mayéga inyule a bi ôt me i nyeni.​—Yohanes 6:​44.