Ngéda binuga bi nwo, baa bi nkee i ngii?
Ndimbhe i Bibel
Bibel i niiga le ikété bihégél gwobisôna bi bi yé hana ’isi, ndik ndék bôt ba binam bon ba ga ke i ngii. (Masoola 14:1, 3) Ba nke i ngii inyu énél kiki bikiñe ni biprisi lôñni Yésu. (Lukas 22:28-30; Masoola 5:9, 10) Libim li bôt ba binam li ga tuge inyu niñ ikété paradis hana ’isi.—Tjémbi 37:11, 29.
Bibel i nkal bé to homa le binuga ba ga nke i ngii; inyuki? Inyule binuga bi nla bé boñ mam ma ma mbéda inyu kôs “nsébla i ke i ngii.” (Lôk Héber 3:1) Ikété mam ma, di nla sima i bana yi Bibel, i bana hémle ni nôgôl mabén ma Yéhôva. (Matéô 19:17; Yôhanes 3:16; 17:3) Ndik bôt ba binam bon ba bi héga le ba niñ i boga ni boga.—Bibôdle 2:16, 17; 3:22, 23.
Inyu ke i ngii bihégél bi yé hana ’isi bi nlama tuge. (1 Korintô 15:42) Bibel i nsima ngandak bôt i i bi tuge. (1 Bikiñe 17:17-24; 2 Bikiñe 4:32-37; 13:20, 21; Lukas 7:11-15; 8:41, 42, 49-56; Yôhanes 11:38-44; Minson mi baôma 9:36-42; 20:7-12) Ndi bôt bobasôna ba ba bi tuge, ba bé bôt ba binam, he binuga bé.
Kii i mbôña ngéda nuga i nwo?
Bibel i nkal le binuga ni bôt ba binam ba yé nlélém inyule Djob a hek bo nlélém. (Ñañga bôt 31:28) Nyambe a bi gwélél gwom biba inyu hek binuga ni bôt ba binam: “Nluñ ték” ni “nhébék u niñ.”(Bibôdle 2:7, matila isi lipep) I gwom biba bi, hala wee “nluñ ték” ni “nhébék u niñ,” gwon bi mboñ le yak nuga i ba “hégél i i niñ.”
Baa ngim yom ikété binuga i nkônde niñ i mbus nyemb yap?
Bibel i nkal ki le binuga ni bôt ba binam ba nwo. (Lôk Lévi 21:11; Ézékiel 18:20) Ngéda ba nwo, binuga ni bôt ba binam ba ntémb nluñ ték. (Ñañal 3:19, 20) Hala wee ba niñ ha bé.
Baa yak binuga bi mboñ béba?
To. I boñ béba hala wee i hoñol, tole i boñ ngim jam i i nkolba mbén i Djob. Ba nkal le mut binam a mboñ béba, inyule a nkit ikété ñem wé kolba mbén i Djob, ndi binuga bi gwé i ngap i. Binuga bi mbéna boñ mam inoñnaga ni kiki bi bi héga. (2 Pétrô 2:12) Ngeñ ngéda nyemb yap i nkola, yak gwo bi nwo, tolakii bi mboñ bé béba.
Baa i yé loñge i tééñga binuga?
To. Nyambe a bi ti bôt ba binam kunde i ngii binuga, ndi kekikel a bi kal bé le ba nlama tééñga gwo. (Bibôdle 1:28; Tjémbi 8:7-9) Djob a ntôñ binuga—yak dinuni. (Yôna 4:11; Matéô 10:29) A bi kal ki bagwélél bé le ba nlama yoñ ndun ni binuga gwap.—Manyodi 23:12; Ndiimba Mbén 25:4; Bingéngén 12:10.