Yésaya 40:31—“I bôt Ba Mbôdôl Yéhôva Ñem ba Ga Témb ba Kôhna Ngui.”

“Ndi i bôt ba mbôdôl Yéhôva ñem ba ga témb ba kôhna ngui. Ba ga puue i ngii wengoñle ba gwé bipapai kiki minyôgôl. Ba ga ke ngwéé ibabé le ba tomb; ba ga ke liké ibabé le ba waa.”—Yésaya 40:31, MN.

“Ndi ba ba mbem Yahwé b’a yoñ ngui yondo: B’a bet i ngii ni bipapai kiki minyôgôl, b’a ke ngwéé ibabé waa, b’a hiôm ibabé tomb.”—Yésaya 40:31, Bible de Jérusalem.

Ndoñi i kaat Yésaya 40:31

Yéhôva a Nyambe a mbôn bagwélél bé le a ga ti bo ngui i mbéda inyu yémbél tole nihbe mandutu momasôna ba yé le boma.

“I bôt ba mbôdôl Yéhôva ñem ba ga témb ba kôhna ngui.” Ba ba mbotñem le Nyambe a nla hôla bagwélél bé ni le a yé bebee i hôla bo, ba nigbene nye. (Bingéngén 3:5, 6) Njel yada Djob a ngwélél inyu ti bagwélél bé ngui i yé le a nti bo mbuu mpubi wé.—Lukas 11:13.

“Ba ga puue i ngii wengoñle ba gwé bipapai kiki minyôgôl.” Bibañga bini bi ñunda i yom mut a nla boñ ni ngui i Djob. Inyu puue ni yén i ngii nyôgôl u gwé ngôñ ni mbebi ba nsébél ni hop pulasi le thermiques. Ngéda a mal yimbe homa i mbebi i i yé, a nwandal bipapai gwé, a kiiña ki ha homa nu, a bôdôl bet bet ni bet. I ngéda nyôgôl u nyodi inyu ke homa numpe het i mbebi i i yé, u nla boñ ngandak ngeñ i ngii ibabé i gwélél ngui yé ngandak.

“Ba ga ke ngwéé ibabé le ba tomb.” Mandutu di mboma hiki kel ma nla tômbôs bés i pes minsôn yak i pes mahoñol, ndi di nla nihbe mo ni njel ngui Djob a nti bés. I nla tinde bés i ke ni bisu i boñ loñge to i ngéda mam ma nlet. Ñoma Paul nu a bi nihbe ngandak mandutu a bi kal le: “Inyu mam momasôna me gwé ngui ni njel nu a nti me lipémba.”—Filipi 4:13.

Mam ma bi tagbe ngéda kaat Yésaya 40:31 i bé tilba

Nyambe a bi tinde mpôdôl Yésaya i tila bibañga bini i hiai hi nyônôs juem B.N.Y. Tolakii bibañga bini bi yé inyu bagwélél ba Djob bobasôna, i nene le Yéhôva a kal ndugi gwo Lôk Yuda inyu lédés bo, lakii ba bé lama boñ 70 nwii minkôm i Babilôn. Ngéda Lôk Yuda i bi pam i minkôm inyu témb i lôñ yap, ba bi tehe bipôdôl bi Djob bini bi nyon. (Yésaya 40:1-3) Nyambe a bi ti bo ngui i ke likéb li li bé mboñgô li bak ndutu, i nyodi i Babilôn, letee ba bol i Yérusalem i nwii 537 B.N.Y.—Yésaya 40:29.