Mbôgi Yéhôva i Nsôñ Kunde i Lôkisañ Yap

Didun di bôt di di niñ i Amérika nwelmbok di mpot hop Panya ni hop Potoki, ndi u héya dilémb ti tjo diba, ba gwé ki dilémb dipe, ba ban-ga ki bilem gwap bi loñ. Ngandak ikété yap i yé lôk kéé i pes mbuu. Ba ngwés ki bilem gwap bi loñ. Inyu hôla bôt i yi maliga, ba nkobol bikaat ikété iloo 130 dilémb dipe.a Ndi lôk kéé ihogi i mboma ngolba inyule ba ntjél noñ bilem bi loñ bi bi nkolba matiñ ma Bibel. Lelaa makébla mana ma ngwéélana inyu hôla bo?

Mahôla inyu boñ le lôk kéé i témb i mandap map

I Meksika, lôk kéé i i mpot hop u Huichol i niñ i ngii dikôa di Jalisco. I lôk kéé i i bi tjél yoñ ngaba i mam ma base inyule hala a bé tééñga kiññem yap.b Ndi hala a bi unbaha ngim bôt mu libôga jap. Jon i hilo 4, Libuy li nyéé 2017, ngim bôt i bi lo i yéñ lôk kéé ni bôt bape ba ba bé ni bo mindañ. Limut li bôt li, li bi nyégsa lôk kéé i nyodi mu libôga jap, li ôbôs gwom gwap ni mandap map, li kal ki bo le ba ga nol bo ibale ba ntémb ba lo.

Lôk kéé ipe i i bé yééne i bitison bi yé bebee i bi hôla bo. Ndi njee a bé le hôla bo i témb i mandap map? Mankéé wada nu jôl jé le Agustín, a nkal le “Di bééna bé moni inyu bana loya, di bé yi bé to hee di kee inyu bana mahôla.”

Ibôdôl nu ba bi tjél ti lôk kéé yés kunde i bégés Yéhôva, hikuu hi loñ hi Amérika ñemkété hi bi yoñ bitelbene bi bé béda. Kiki jam li bisu, ba bi bat bôt ba ngomin ba libôga li le ba wan i jam li. Kiki jam li nyônôs iba, juu li bakot li juu li bakena ntôñ li bi ti bo kunde i sal ni juu li minkaa li hikuu hikeñi hi Mbôgi Yéhôva inyu boñ le ba kena i bôt ba bi tééñga lôk kéé i bikééhene. Sôk i nsôk, i hop u u bi ke letee ni hikuu hikeñi hi bikééhene hi loñ Meksika .

Biloya bi lôlak i ngandak bahoma, bi bi kodba inyu kôôba ngim nkwel i het ba bé toñle le nlélém kiki bôt ba nlama diihe bilem ni maboñok ma ngim litén, hala ki nyen i bôt ba yé mu litén li ba nlama diihe wada ni nuu, ba diihe ki kunde hiki wada a gwé. Bôt ba binam ba gwé kunde ni ngim mam to hee ba nyééne.

I hilo 8 hi sôñ Njéba 2020, hikuu hikeñi hi bikééhene hi bi kal le Mbôgi Yéhôva i net nkaa. Hikuu hikeñi hi bi ti kunde le i lôk kéé ba bi buñge i témb i mandap map. Agustín nu di mbok di nsima a nkal i yom nye ni lôk kéé i bi nôgda, a nkal le: “Di yé maséé ngandak, di nti ki lôk kéé mayéga inyu mam ba bi bôñôl bés. Ibale ba hôla bé bés, ki di bi yi bé lelaa di boñ.”

“Ngandak mam inyu ndék bôt”

Lôk kéé i i nyén i San Juan de Ilumán, mbai yada i loñ a Iqwatôria i i yéne i nsôsôgô u Otavalo, i bi boma nlélém ngolba. I nwii 2014, i mbus le ba bi kôhna kunde, ba bôdôl oñ ndap Ane, pada yada i bi lo ni 100 bôt, ba nyégsa lôk kéé le i téé maoñ, yak bôt ba mbai i ba kal lôk kéé yés le ba kôdba ha bañ inyu bégés Yéhôva.

Juu inyu mam ma minkaa li loñ Iqwatôria ni juu inyu mam ma minkaa li hikuu hikeñi hi Mbôgi Yéhôva ba bi sal ntôñ inyu sôñ kunde lôk kéé i gwé i bégés Yéhôva. Lôk kéé i bi kena i hop u i bikééhene, hala a bi boñ le bôt ba mbai i ba bi waa kolba lôk kéé. Ba ti ki bo kunde i kodba ni i mélés maoñ, ndi inyu boñ le i jam lini li bôña ha bañ i dilo di nlo, biloya gwés bi bi bat bakéés bakeñi le ba ti mahoñol map munu mbadga ini le: Baa bôt ba litén jada, ba ba gwé liniñik jap, bilem gwap ni maboñok map ba nlama nôgôl mbén i i nkal le bôt ba binam bobasôna ba gwé nlélém kunde?

I hilo 16, hi sôñ njéba 2020, lôk kéé i bi kena nkaa u i hikuu hikeñi hi bikééhene hi loñ Iqwatôria. Lôk kéé i i yé biloya yon i bé pot inyu likoda, ndi ndik yotama bé, yak lôk kéé ina i i bé yi mambén i bi yoñ ngaba mu nkaa u. Ndi kiki kon unu le COVID-19 u bi boñ le bôt ba yén i mandap map, lôk kéé i bi yoñ ngaba mu minkaa mi ni njel internet (videoconference). Hala a yé ngélé bisu le bakéés ba neebe le biloya bi bi nsôñ Mbôgi Yéhôva i nkoñ ’isi wonsôna bi yoñ ngaba i nkaa i nya ini.c Biloya bi, bi bi sima mbén i i ñéba le to ibale mut a niñ i ngim litén i i gwé bilem gwé, maboñok mé, liniñik jé, a gwé kunde i boñ ngim mam i nlémél nye.

Lôk kéé i i niñ i nsôsôgô u Otavalo i bé nyamnda ni ngôñ i yi makidik hikuu hikeñi hi bikééhene hi bi yoñ, ba bé maséé ni mahôla ba bi kôhna. César, mañ wada i likoda li Quichua i libôga li Ilumán a nkal le : “Ndik Yéhôva nyetama nyen a nla gwélél ntôñ wé inyu boñ ngandak mam inyu ndék bôt.”

Biloya gwobisôna bi bi yoñ ngaba mu hop u, bi yé maséé ni mahôla ba bi ti ibabé nsaa wo ki wo. Ndi i pot maliga, i bi béda moni ni ngéda inyu kôôba minkaa mi. Inyu hop u bi tagbe i Meksika, biloya gwés ni lôk kéé ipe i bi tégbaha iloo 380 ngeñ inyu kôôba ni bebee le 240 ngeñ inyu kobol ngim bikaat. 40 ma biloya bi bi tégbaha bebee le 100 ngeñ i sal ntôñ mu hop u bi tagbe i loñ Iqwatôria. Ndi hee ba bi yôñôl moni inyu boñ le minkaa mini mi tagbe? Makébla ni nti ni njel site yés donate.jw.org mon ma bi hôla. Di nti bé mayéga ngandak inyu lem nan likap.