Yakôbô a bi unda le i nya mut i, i nla kal le i gwé hémle, ndi maboñok mé ma ñunda bé hala. (Yakôbô 2:​1-5, 9) Yakôbô a mpôdôl yak i mut a ntehe mankéé wé nu munlôm tole nu muda nu a gwé bé mambot to bijek, ndi a nti bé nye i yom i mbéda nye. To ibale i mut nu a bé kal le a gwé hémle, maboñok mé ma bé unda bé hala; jon bipôdôl gwé bi bééna bé nseñ. (Yakôbô 2:​14-16) Yakôbô a bi sima Rahab kiki muda nu a bi unda ni njel maboñok mé le a gwé hémle. (Yakôbô 2:​25, 26) A bi nok ngandak mam inyu Yéhôva, a bé yik le nyen a nit Lôk Israel. (Yôsua 2:​9-11) Maboñok mé ma bi unda le a gwé hémle, a bi sôñ bôt ba mbep iba, ba ba bé bon ba Lôk Israel. Sôk i nsôk, tolakii i muda nu a bé bé peles, a bé bé to ngond Israel, a bi kéla le a téé sép nlélém kiki Abraham. Ndémbél yé i ñunda le, i nlôôha ba nseñ le di unda ni maboñok més le di gwé hémle. w23.12 5-6 § 12-13

Bikristen bi nlama ndik bé kon maséé ni biniigana bi bisu bi Bibel. Ni mahôla ma mbuu mpubi, di nyamnda ni ngôñ i nigil “yak ndip i mam i Nyambe.” (1 Korintô 2:​9, 10) Mu i yigil yoñ i Bibel wemede, baa u yé le u bôdôl nigil ngim ño nkwel u u mboñ le u kônde kôôge bebee ni Yéhôva? Kiki hihéga, u nla tibil wan inyu tehe lelaa Nyambe a bi unda le a bé gwés bagwélél bé i ngéda kôba ni lelaa a ñunda le a ngwés yak we i len ini. U nla ki nigil lelaa Yéhôva a bé gwés le bon ba Israel ba bégés nye. U hégha ni lelaa Yéhôva a ngwés le di bégés nye i len ini. U nla ki wan i mbañ Yésu a bi yônôs i ngéda a bé hana ’isi. Inyu tibil nigil i nya miño i minkwel i, u nla gwélél Index des publilcations des Témoins de Jéhovah, tole Ñéga inyu nyiña u bikaat bi Mbôgi Yéhôva. I ngéda u nigil hala, u nla lédés hémle yoñ, u “kôhna ki yi i Nyambe.”​—Bingéngén 2:​4, 5. w23.10 18-19 § 3-5

Di ôt le pék mu bibañga bi ñôma Pétrô. Pes i bisu i mpôdôl ntén gwéha di nlama bana: “bañga bañga gwéha.” I buk Pétrô a ngwélél hana le “bañga bañga” i nla ki kobla le “sambal.” Liboñ li nyônôs iba munu nlôñ unu li ntoñol kii bañga bañga gwéha i ntinde bés i boñ. I nhô bibéba bi lôk kéé yés. Kiki hihéga, di hégda le di gwé téblé i i nene ha bé ilam, di nla yoñ libadô di sambal jo i ngii téblé yosôna; libadô li nhô ndik bé pes yada i téblé, ndi li nhô téblé yosôna. Nlélém jam, ibale di gwé bañga bañga gwéha inyu bilôk bikéé gwés, di ga ‘hô’ ndik bé béba yada tole bibéba biba ba mboñ bés, ndi di ga hô bibéba gwobisôna ba mboñ bés. Gwéha yés inyu lôk kéé yés i ga kônde keñep ibale di nwéhél bo to i ngéda hala a ta bé bun. (Kôlôsé 3:13) I ngéda di mpam i nwéhél bôt bape, di ñunda le gwéha yés inyu yap i gwé ngui, di ñunda ki le di nsômbôl lémél Yéhôva. w23.11 11-12 § 13-15