Di ôt le pék mu bibañga bi ñôma Pétrô. Pes i bisu i mpôdôl ntén gwéha di nlama bana: “bañga bañga gwéha.” I buk Pétrô a ngwélél hana le “bañga bañga” i nla ki kobla le “sambal.” Liboñ li nyônôs iba munu nlôñ unu li ntoñol kii bañga bañga gwéha i ntinde bés i boñ. I nhô bibéba bi lôk kéé yés. Kiki hihéga, di hégda le di gwé téblé i i nene ha bé ilam, di nla yoñ libadô di sambal jo i ngii téblé yosôna; libadô li nhô ndik bé pes yada i téblé, ndi li nhô téblé yosôna. Nlélém jam, ibale di gwé bañga bañga gwéha inyu bilôk bikéé gwés, di ga ‘hô’ ndik bé béba yada tole bibéba biba ba mboñ bés, ndi di ga hô bibéba gwobisôna ba mboñ bés. Gwéha yés inyu lôk kéé yés i ga kônde keñep ibale di nwéhél bo to i ngéda hala a ta bé bun. (Kôlôsé 3:13) I ngéda di mpam i nwéhél bôt bape, di ñunda le gwéha yés inyu yap i gwé ngui, di ñunda ki le di nsômbôl lémél Yéhôva. w23.11 11-12 § 13-15

I ngéda a bi pamna 26 nwii, Kiñe Yôsia a bi bôdôl tibil témpel. I ngéda ba bé tibil yo, ba bi léba ‘kaat i Mbén Yéhôva a ti Môsi.’ I ngéda kiñe i bi nok i yom i bé ntilga mu, i bi pala yoñ makidik i boñ kiki i yé ntilga. (2 Miñañ 34:​14, 19-21) Baa yak we u ngwés u ñañ Bibel hiki kel? Ibale u ma noode, baa hala a nlémél we? Baa u ntééda minlôñ mi Bibel mi mi nla hôla we? I ngéda Yôsia a bi pamna 39 nwii, a bi boñ hihôha hi hi bi boñ le a nimis niñ yé. A bi bôdôl nyemede ñem iloole a bôdôl Yéhôva ñem. (2 Miñañ 35:​20-25) Kii hala a niiga we? To u gwé nwii nwañen to u nigil Bibel hala a yé ntandaa ngéda, u nlama ke ni bisu i yéñ mahôla ma Yéhôva. Hala a nkobla le di nlama yéñ mahôla ma Yéhôva hiki ngéda ikété masoohe, di nigil Bañga yé, di yéñ mahôla ma minhôôlak mi bikristen. Ibale u nke ni bisu i boñ hala, u ga lôôha bé boñ dihôha dikeñi, u ga ba ki maséé.​—Yakôbô 1:25. w23.09 12 § 15-16

Bibel i nsima ngandak bôda ba hémle ba ba bé gwés Yéhôva, ba gwéélak nye kiki a nkal, ba bééna “hôtnyuu ikété maboñok,” ba bak “maliga inyu mam momasôna.” (1 Timôtéô 3:11) U héya miñañ mi, bisita bi nla léba ikété makoda map, ndémbél i minhôôlak mi bôda i pes mbuu i ba nla kôna. A njohok bisita, inyuki ni nla bé yimbe ndémbél i minhôôlak mi bisita mi makoda manan i ni nla kôna? Ni yimbe bilem bilam ba gwé, i mbus ni noode tehe lelaa ni nla kôna gwo. Inyu pam i hol i pes mbuu di nlama ba suhulnyuu. Ibale muda a yé suhulnyuu, a ga bana maada malam ni Yéhôva yak ni bôt bape. Kiki hihéga, nhôôlak muda i pes mbuu, u nit bitelbene Yéhôva a bi yoñ, bi di nléba i kaat 1 Korintô 11:3 i het Nyambe a nkal njee a bi ti kunde i kena likoda, ni njee a bi ti kunde i éga ndap lihaa. w23.12 18-19 § 3-5