Yak bés bagwélél ba Yéhôva ba di tiñi ni nye, di mboma mandutu ni makon kiki bôt bobasôna. U héya hala, i nla pam le i bôt ba ñoo Mbôgi Yéhôva ba kolba bés, tole ba tééñga bés. Tolakii Yéhôva a nkéñ bé le mandutu ma ma kwél bés, a mbôn le a ga hôla bés. (Yésaya 41:10) Ñ, ni mahôla ma Yéhôva, di nla tééda maséé més, di yoñ makidik malam, di téñbe ki ni nye to di ntégbaha mangéda mabe. Yéhôva a mbôn le a ga ti bés i yom Bibel i nsébél le “nsañ u Nyambe.” (Filipi 4:​6, 7) Kii i yé nsañ u Nyambe? U yé ñem nwee di nôgda inyule di gwé maada malam ni Yéhôva. Nsañ u “u nloo mam momasôna mut binam a nla nok”; u nlôôha ba nlam iloo i mam momasôna di yé le di hégda. Baa i ma pam le ni soohe Yéhôva, i mbus ni nôgda le ni yé nwee ndik wee nduña nan i mal? I jam li jon ba nsébél le “nsañ u Nyambe.” w24.01 20 § 2; 21 § 4

Kiki bagwélél ba Yéhôva ba ngwés nye, jon ba mbégés jôl jé ni ñem wap wonsôna. Kiñe David a bi nok le, ibale a mbégés jôl li Yéhôva wee a mbégés Yéhôva nyemede. I ngéda di mpôdôl jôl li Yéhôva, hala a nhôñlaha bés umbe ntén mut a yé, bilem gwé bilam gwobisôna ni bihélha bi mam a bi boñ. David a bé tehe jôl li Tata wé kiki jôl lipubi, li a nlama bégés. A bé gwés boñ hala ni ‘ñem wé wonsôna.’ Nlélém jam ni Lôk Lévi, bon ba bé babôgna i bibégés bi Yéhôva. Ni suhulnyuu, ba bi kal le ba ta bé le ba léba bibuk bi kôli inyu bégés jôl lipubi li Yéhôva kiki i nsômbla. (Néhémia 9:5) Ibabé pééna, i nya suhulnyuu i, i bé kônha Yéhôva maséé. w24.02 9 § 6

Ibale u mpam bé i yônôs ngim jam u ntéé le u mboñ i pes mbuu inyule li nlel we ngui, y’a nene bé i mis ma Yéhôva kiki bo le u nkwo makégse. (2 Korintô 8:12) Tehe mandutu moñ kiki suklu ikeñi. U hôiga bañ i mam u ma boñ. Bibel i nkal le: “Nyambe a ta bé mut a téé bé sép le a hôya nson nan.” (Lôk Héber 6:10) Jon to we, u nlama bé hôya nson woñ. Bigda i mam u ma boñ​—kiki bo i bana maada malam ni Yéhôva, i toñle bôt bape njee a yé, tole sôble yoñ. Kiki u nhol i pes mbuu, u yônôs ngim mam, hala nyen u yé le u kônde hol inyu yônôs mam u ntéé le u ga boñ i pes mbuu. Ni mahôla ma Yéhôva, u nla yônôs i mam u ntéé le u mboñ i pes mbuu. Nlélém inyu yoñ, kiki u nke ni bisu i yônôs i mam u ntéé le u mboñ i pes mbuu, u hôiga bañ yoñ ngéda i nok line i tehe lelaa Yéhôva a nhôla we, a saibak we mu liké joñ. (2 Korintô 4:7) Ibale u nke ni bisu i boñ biliya bi ibabé i tomb, w’a kôhna bisai bi mbuma ñañ.​—Galatia 6:9. w23.05 31 § 16-18