Yôsua

21 Baéga ba mandap ma bikôkôa ma mahaa ma Lôk Lévi ba tiige bebee ni prisi le Éléazar,+ ni Yôsua man Nun, ni baéga ba mandap ma bikôkôa ma matén ma Israel, 2 ba pôdôs bo i Silô,+ i loñ Kanaan, ba kal bo le: “Yéhôva a bi kal Môsi le ba ti bés bitison i het di ga yééne, ni minkoñ inyu bémba+ yés.” 3 Jon bon ba Israel ba bi boñ kiki Yéhôva a bi kal, mu ngababum+ yap ba yoñ ngim bitison+ ni minkoñ nwap inyu bilém gwap: ba ti gwo Lôk Lévi.

4 I ngéda ba bi leñ mbam, ba ti mahaa ma Lôk Kôhat+ ngaba yada; ba ti ki Lôk Lévi i i bé mbôda i prisi Arôn 13 bitison, ba bi yôñôl gwo mu nkoñ u litén li Yuda,+ mu nkoñ u litén li Siméôn,+ ni mu nkoñ u litén li Benyamin.+

5 I bon ba Lôk Kôhat ba bi yégle, ba bi kôhna* jôm li bitison bi bi bé mu nkoñ u mahaa ma litén li Éfraim,+ ma litén li Dan, ni ma pes litén i Manasé.+

6 Bon ba Gersôn+ ba bi kôhna 13 bitison, bi ba bi yôñôl mu nkoñ u mahaa ma litén li Isakar, ma litén li Aser, ma litén li Naftali, ni ma pes litén i Manasé i Basan.+

7 Bon ba Mérari+ ba bi kôhna 12 bitison, mahaa map ma bi kabna gwo, ba bi yôñôl bitison bi mu nkoñ u mahaa ma litén li Ruben, ma litén li Gad, ni ma litén li Zébulôn.+

8 Hala nyen bon ba Israel ba bi leñ mbam inyu ti Lôk Lévi bitison ni minkoñ nwap inyu bilém gwap: kiki Yéhôva a bi kal Môsi.+

9 Jon ba bi yoñ bitison mu nkoñ u litén li Yuda, ni u litén li Siméôn; i bitison bi, môl+ map ma yé munu. 10 Ba bi ti gwo Lôk Lévi, bon ba Arôn ba ba bé mu mahaa ma Lôk Kôhat, ba bi kôhna ngaba bisu i ngéda ba bi leñ mbam. 11 Ba bi ti bo Kiriat-Arba,+ hala wee Hébrôn,+ nyoo i mbok dikôa i Yuda, ni minkoñ nwé inyu bilém gwap (Arba a bi gwal Anak). 12 Ndi nwom ni mambai ma ma yé bebee ni tison, ba ti gwo Kaleb man Yéfuné, le bi ba gwom+ gwé.

13 Ba bi ti bon ba prisi le Arôn tison lisolbene inyu mut a nol mut ngi kôôba,+ hala wee Hébrôn+ ni minkoñ nwé inyu bilém gwap; ba ti ki bo Libna+ ni minkoñ nwé inyu bilém gwap, 14 Yatir+ ni minkoñ nwé inyu bilém gwap: Éstémôa+ ni minkoñ nwé inyu bilém gwap: 15 Hôlôn+ ni minkoñ nwé inyu bilém gwap, Débir+ ni minkoñ nwé inyu bilém gwap, 16 Ain+ ni minkoñ nwé inyu bilém gwap: Yuta+ ni minkoñ nwé inyu bilém gwap: lôñni Bét-Sémes ni minkoñ nwé inyu bilém gwap: i bitison ba bi yoñ mu matén ma mo ima bi bé bôô.

17 I bitison ba bi yoñ mu nkoñ u litén li Benyamin, gwo bini: Gibéôn+ ni minkoñ nwé inyu bilém gwap, Géba ni minkoñ nwé inyu bilém gwap,+ 18 Anatôt+ ni minkoñ nwé inyu bilém gwap, Almôn ni minkoñ nwé inyu bilém gwap: bitison bina.

19 I bitison gwobisôna ba bi ti bon ba Arôn, hala wee biprisi, bi bé 13 ni minkoñ nwap inyu bilém+ gwap.

20 Ikété Lôk Lévi, mahaa mape ma Lôk Kôhat ma bi yégle; i ngéda ba bi leñ mbam, ba ti i mahaa ma, bitison bi bi bé mu nkoñ u litén li Éfraim. 21 Ba bi ti bo tison lisolbene i mbok dikôa i Éfraim inyu mut a nol mut ngi kôôba,+ hala wee Sikem+ ni minkoñ nwé inyu bilém gwap; ba ti ki bo Gézer+ ni minkoñ nwé inyu bilém gwap, 22 Kibzaim ni minkoñ nwé inyu bilém gwap, Bét-Hôron+ ni minkoñ nwé inyu bilém gwap: bitison bina.

23 I bitison ba bi yoñ mu nkoñ u litén li Dan, gwo bini: Eltéké ni minkoñ nwé inyu bilém gwap, Gibéton ni minkoñ nwé inyu bilém gwap, 24 Ayalôn+ ni minkoñ nwé inyu bilém gwap, Gat-Rimôn ni minkoñ nwé inyu bilém gwap: bitison bina.

25 I bitison ba bi yoñ mu nkoñ u pes litén i Manasé, gwo bini: Taanak+ ni minkoñ nwé inyu bilém gwap, Gat-Rimôn ni minkoñ nwé inyu bilém gwap: bitison biba.

26 I bitison gwobisôna ba bi ti mahaa ma Lôk Kôhat ma ma bi yégle, bi bé 10 ni minkoñ nwap inyu bilém gwap.

27 Bon ba Gersôn,+ ba ba yé mu mahaa ma Lôk Lévi, ba bi kôhna tison lisolbene mu nkoñ u pes litén i Manasé inyu mut nu a nol mut ngi kôôba, hala wee Gôlan,+ i Basan, lôñni minkoñ nwé inyu bilém gwap: ba ti ki bo Bét-Éstéra ni minkoñ nwé inyu bilém gwap: bitison biba.

28 I bitison ba bi yoñ mu nkoñ u litén li Isakar,+ gwo bini: Kisiôn ni minkoñ nwé inyu bilém gwap, Dabérat+ ni minkoñ nwé inyu bilém gwap, 29 Yarmut ni minkoñ nwé inyu bilém gwap, En-Ganim ni minkoñ nwé inyu bilém gwap: bitison bina.

30 I bitison ba bi yoñ mu nkoñ u litén li Aser,+ gwo bini: Misal ni minkoñ nwé inyu bilém gwap, Abdon ni minkoñ nwé inyu bilém gwap, 31 Helkat+ ni minkoñ nwé inyu bilém gwap, Bét-Réhôb+ ni minkoñ nwé inyu bilém gwap: bitison bina.

32 I bitison ba bi yoñ mu nkoñ u litén li Naftali, gwo bini: tison lisolbene+ inyu mut a nol mut ngi kôôba, hala wee Kédes+ i Galiléa ni minkoñ nwé inyu bilém gwap, Hamot-Dôr ni minkoñ nwé inyu bilém gwap, lôñni Kartan ni minkoñ nwé inyu bilém gwap: bitison baa.

33 Bon ba Gersôn ba bi kôhna 13 bitison ni minkoñ nwap inyu bilém gwap, mahaa map mon ma bi kabna gwo.

34 I Lôk Lévi i bi yégle, hala wee mahaa ma Lôk Mérari,+ i bitison ba bi ti bo mu nkoñ u litén li Zébulôn,+ gwo bini: Yôknéam+ ni minkoñ nwé inyu bilém gwap, Karta ni minkoñ nwé inyu bilém gwap, 35 Dimna ni minkoñ nwé inyu bilém gwap: ni Nahalal+ ni minkoñ nwé inyu bilém gwap: bitison bina.

36 I bitison ba bi yoñ mu nkoñ u litén li Ruben, gwo bini: Bézer+ ni minkoñ nwé inyu bilém gwap, Yahaz ni minkoñ nwé inyu bilém gwap:+ 37 Kédémôt ni minkoñ nwé inyu bilém gwap, lôñni Méfaat ni minkoñ nwé inyu bilém gwap: bitison bina.

38 I bitison ba bi yoñ mu nkoñ u litén li Gad,+ gwo bini: tison lisolbene inyu mut a nol mut ngi kôôba, hala wee Ramôt i Giléad,+ ni minkoñ nwé inyu bilém gwap, Mahanaim+ ni minkoñ nwé inyu bilém gwap, 39 Hesbôn+ ni minkoñ nwé inyu bilém gwap, Yazer+ ni minkoñ nwé inyu bilém gwap: i bitison bi gwobisôna bi bé bina.

40 I bitison gwobisôna ba bi ti Lôk Mérari, hala wee Lôk Lévi i i bi yégle, bi bé 12; mahaa map mon ma bi kabna gwo.

41 I bitison gwobisôna Lôk Lévi i bi kôhna bi bé 48 ni minkoñ nwap inyu bilém+ gwap; ba bi yôñôl gwo mu minkoñ mi bon ba Israel. 42 Hiki tison mu i bééna minkoñ inyu bilém gwap; hala nyen i bitison bi gwobisôna bi bé.

43 Hala nyen Yéhôva a bi ti bon ba Israel loñ yosôna a bi bôn* basôgôlsôgôl+ bap; ba bi yoñ yo, ba yééne+ ki mu. 44 Yéhôva a ti ki bo noi bipes gwobisôna kiki a bi bôn basôgôlsôgôl+ bap, ñoo wap to wada a bi la bé kolba bo.+ Yéhôva a bi ti baoo bap bobasôna i moo+ map. 45 Ikété mam malam momasôna Yéhôva a bi bôn* litén li Israel, to jada li bi set bé; momasôna ma bi yon.+