Yérémia
37 Kiñe Sédékia+ man Yôsia a bi yoñ tel i Kônia*+ man Yéhôyakim, inyule Nébukadnézar,* kiñe Babilôn, a bi téé nye kiñe loñ Yuda.+ 2 Ndi to nye, to bagwélél bé, to bôt ba loñ ba bi emble bé bibañga bi Yéhôva, bi a bi kal mpôdôl Yérémia.
3 Ndi to hala, Kiñe Sédékia a bi om Yéhukal+ man Sélémia, ni Sôfônia+ man prisi le Maaséya le ba kal mpôdôl Yérémia le: “Soho, soohe Yéhôva Nyambe wés inyu yés.” 4 Yérémia a bé a ngi bedek, a sôhôk mu loñ, inyule ba bé ngi ha nye i mok.+ 5 Ha ngéda i, ntôñ gwét u Faraô u bi nyodi i Égiptô.+ Kiki bôt ba Kaldéa ba ba bé kéña Yérusalem ba nok hala, ba nyodi i Yérusalem.+ 6 Ha nyen Yéhôva a bi pôdôs mpôdôl Yérémia, a kal nye le: 7 “Haana nyen Yéhôva Nyambe nu Israel a mpot: ‘Kiñe Yuda i i ñom bé i meeni i bat me mam, ke kala nye le: “Ntôñ gwét u Faraô u u yé i lo i hôla bé, u ga témb i loñ yé, i Égiptô.+ 8 Bôt ba Kaldéa ba ga tiimba lo, ba jôs i tison ini, ba yémbél yo, ba ligis ki yo.”+ 9 Haana nyen Yéhôva a nkal: “Miñem minan mi lôk bañ bé, ni kalak le: ‘Bôt ba Kaldéa ba ga lo ha bé,’ yina le ba ga tiimba lo. 10 To ibale ni nyémbél ntôñ gwét u bôt ba Kaldéa wonsôna u u nlo i jôs bé, ndik mimbaabak mi bôt nwon mi yégle, i mimbaabak mi bôt mini mi ga telep, mi nyodi i mandap map ma mabadô, mi ligis i tison ini.”’”+
11 I ngéda ntôñ gwét u bôt ba Kaldéa u bi nyodi i Yérusalem inyule u bi nok le ntôñ gwét u Faraô u yé i njel,+ 12 Yérémia a bi yéñ nyodi i Yérusalem inyu ke i nkoñ u Benyamin+ le a kôhna ngaba hisi i lôk yé. 13 Ndi kiki a bi bol i nwemel u Benyamin, ñane bôt ba faa le Iria, man Sélémia, man Hanania, a gwel mpôdôl Yérémia, a kal nye le: “U yé i so inyu ke i pes i bôt ba Kaldéa!” 14 Ha nyen Yérémia a bi kal nye le: “Hala a ta bé maliga! Me ta bé i so inyu ke i pes i bôt ba Kaldéa.” Ndi Iria a bi emble bé Yérémia, a kena nye yak baane. 15 Baane ba bi unbene Yérémia+ ngandak, ba bép nye, ba ha nye i mok*+ i ndap i mut matila le Yéhônatan; i ndap i yon ba bi yilha ndap mok. 16 Ba bi kwés Yérémia inyu ngandak dilo ikété ndap mok,* i ndap i, i bééna bituñ bi ba bi tém isi ndi ba oñ.
17 Kel yada, Kiñe Sédékia a bi om le ba lona Yérémia, a kahal bat nye mambadga bisôsôli i ndap*+ yé. A bi bat nye le: “Baa Yéhôva a mpot bé jam inyu yem?” Yérémia a timbhe le: “A mpot jam inyu yoñ!” A kônde kal nye le: “Kiñe Babilôn+ i ga gwel we!”
18 Yérémia a kal ki Kiñe Sédékia le: “Imbe béba jam me mboñ we, ni bagwélél boñ, ni bôt ba litén lini, inyu boñ le ni ha me i mok? 19 Nano, hee bapôdôl banan ba yé. Ba ba bé kal le: ‘Kiñe Babilôn i ga lo bé i jôs bé, to ini loñ?’+ 20 Nano, soho emble a nwet wem le kiñe. Soho ndigi, emble i jam me mbat we. U timbis bañ me i ndap mut matila le Yéhônatan,+ tiga le me wo nyoo.”+ 21 Ha nyen Kiñe i bi ti oda le ba tééda Yérémia i kotoo i Batat.+ Hiki kel, ba bé ti nye bret i i bé lôl i nloñ u babômkoga,+ letee bret gwobisôna bi mal i tison.+ Yérémia a bi yén nyoo i kotoo Batat.