Yésu a nkal kii i yé hiliba hi maséé

Yésu a ntiimba biniigana inyu masoohe, ndi biniigana bi gwotama bé gwon bi mbéna lo mu likalô jé. Ngéda a bé boñ bihélha bi mam i Galiléa, ba bi ôm Yésu nsohi le a mboñ mam ma ni njel ngui ñane mimbuu mimbe. Nano le a yé i Yudéa, ba ñôm ki nye nlélém nsohi.

I mbus le Yésu a mpémés mut wada mbuu mbe u u bi kwés nye mbuk, bôt ba nhel. Ndi hala a ta bé nlélém inyu baoo bé. Ba nkal le: “A mpémés mimbuu mimbe ni ngui i Belsébub, ñane mimbuu mimbe.” (Lukas 11:15) Bape ba ngwés yi njee Yésu a yé, inyu hala nyen ba mbat nye yimbne i nlôl i ngii.

Kiki a nyimbe le ba nyéñ noode nye, jon a ntimbhe baoo bé nlélém kiki a timbhe baoo bé i Galiléa. A nkal le hiki ane i mbagla inyu kolba yomede i nsôk tjiba. A ñôt mahoñol map, a kal le: “Ibale yak Satan a mbagla inyu kolba nyemede, lelaa ane yé i nla nom?” I mbus a nkal bôt le: “Ibale me mpémés mimbuu mimbe ni hinoo hi Nyambe, wee yina ni le Ane Nyambe i mpam i bééni ndi ni nyi bé hala.”​—Lukas 11:18-20.

Ngéda Yésu a nkal le “hinoo hi Nyambe,” hala a nlama hôñlaha baemble nye i jam li bi tagbe bisu bi ngéda mu ñañ u Israel. I bôt ba bi tehe Môsi a mboñ hélha jam i ndap Faraô ba bi hel, ba kal le: “Hinoo hi Nyambe ni hini!” “Hinoo hi Nyambe” ki hion hi bi tila Jôm li Matiñ i ngii dibambha di ngok diba. (Manyodi 8:19; 31:18) Nlélém, ni njel “hinoo hi Nyambe,” hala wee mbuu mpubi, tole ngui Djob a ngwélél inyu boñ mam nyen Yésu a yé pémés mimbuu mimbe ni mbuubaha bakokon. Jon, Ane Djob i mpam yak bebee ni bakolba nye inyule Yésu, Kiñe Ane i a yé ha, a boñok bihélha bi mam.

Ngui Yésu a gwé i pémés mimbuu mimbe i yé yimbne le a gwé ngui i nlel i Satan, ndik kiki mpémba mut u nyémbél ntééda ndap wada nu a gwé bijôl bi gwét. Yésu a ntiimba ngwélél hihéga hi ni mbuu mbe u u nyodi ikété mut. Ibale mut a nyônôs bé nyemede ni biloñge bi mam, mbuu mbe u témb u nlo ni minsaambok mimpe. Libak li mut nunu li nyila béba iloo libak jé li bisu. (Matéô 12:22, 25-29, 43-45) I yom i yon i yé bôña ni litén li Israel.

Muda wada a yé emble Yésu, a nkal le: “Maséé ni libum li bi begee we, yak ni méé u bi nyuñ!” Bôda ba Lôk Yuda bobasôna ba gwé ngôñ i ba nyañ ngim mpôdôl, téntén nyañ Mésia. Jon muda nunu a nla hoñol le Maria a yé maséé ngandak i ba nyañ i nya malét ini. Ndi Yésu a nkodol litehge li muda nunu. A nyeelene nye kii i yé hiliba hi bañga maséé, a nkal le: “Heni, i yé loñge i kal le: Maséé ni bôt ba ñemble bañga i Nyambe, ba téédaga ki yo!” (Lukas 11:27, 28) Yésu a ma bé unda kel to yada le Maria a nlama kôhna lipém li tôbôtôbô. Ndi, bañga maséé munlôm tole muda a yé le a bana ma nlôl ni maada malam a gwé ni Djob, he ni ngim yom, liwanda, tole minson nwés bé.

Kiki Yésu a boñ i Galiléa, a nkônd bôt ba yé bat nye ngim yimbne i nlôl i ngii. A nkal le yimbne to yada i ga tina bé bo handugi “yimbne i mpôdôl Yôna.” Yôna a yé yimbne he ndik bé inyule a bi tégbaha dilo daa ikété libum li hiobi, ndi yak inyule likalô jé li makénd li bi tinde bôt ba Ninivé i nhiel miñem nwap. Yésu a nkal le: “Ndi nuna-ki! Nu a nloo Yôna a yé hana.” (Lukas 11:29-32) Yésu a nloo ki Salômô nu kiñemuda Séba i bi lo i emble pék yé.

Yésu a nkônde le: “I ngéda mut a nkwiye lambe, a mbii bé yo i homa a sôli, to isi sel, ndi i kéhne lambe.” (Lukas 11:33) Bebek Yésu a nsômbôl kal le i niiga ni i boñ bihélha bi mam bisu bi bôt bana i yé wengoñle a yé sôô mapubi ma lambe. Ba nok bé inyuki a mboñ bihélha bi mam inyule litehge jap li ta bé lilam.

Yésu a ntip pémés mbuu mbe, a mboñ ki le mut mbuk a pot. Hala a bé lama tinde bo i ti Djob lipém ni i añle bôt bape mam Yéhôva a yé boñ. Jon, Yésu a mbéhe hiki wada wap, a kalak le : “Yoñ yihe le mapubi ma yé ikété yoñ ma ba bañ jiibe. Jon, ibale nyuu yoñ yosôna i mbai, kayéle pes to yada i ta bé ikété jiibe, yosôna y’a bai kiki lambe i i nti we mapubi.”​—Lukas 11:35, 36.