Mbegee i ba nnigil

Yésu a bi ti biniigana bi mahee ngéda a bé je i ndap nkena Farisai wada. Kiki a yé ke Yérusalem, mamut makeñi ma nke ni nye. Inyuki? Baa ba gwé toi ngôñ i yila banigil bé, ibabé i béñge biliya bi ga béda bo?

Kiki ba yé njel, Yésu a mpahal jam jada li li yé le li unbaha bahogi ikété yap, a nkal le: “Ibale mut a nlo i meeni, ndi a oo bé isañ, ni nyañ, ni nwaa, ni bon bé, ni lôknyañ i bôlôm ni i bôda, ñ, yak niñ yé yomede yaga, a nla bé ba nnigil wem.” (Lukas 14:26) Ndi kii a nsômbôl kal?

Yésu a ta bé kal le ba bobasôna ba nsômbôl yila banigil bé ba nlama oo bôt bap ba lihaa. Ndi Yésu a yé kal le ba nlama gwés nye iloo kiki ba ngwés bôt bap ba lihaa. Ba nlama bé ba kiki mut hihéga hi Yésu nu a bi tjél nsébla i je inyule a ntip biiba. (Lukas 14:20) Sôgôlsôgôl nu Lôk Yuda le Yakôb a bé “oo” Léa, a gwéhék Rahel; hala a nsômbôl kal le a bé gwés Rahel iloo kiki a bé gwés Léa.​—Bibôdle 29:31.

Yimbe le Yésu a nkal le nnigil a nlama yak oo “niñ yé yomede.” Hala a nsômbôl kal le bañga nnigil a nlama gwés Yésu iloo kiki a ngwés niñ yé yomede, a bak ki bebee i nimis niñ yé ibale hala a nsômbla. Ntiik, i ba nnigil Yésu i yé mbegee i nlôôha keñi. Hala a ta bé jam le mut a nlama yoñ kiki njôha, ibabé le a tibil ôt pék.

Yésu a nkal le nnigil a nlama bem le a ga boma manoodana ni ngolba: “Nu ni nu a mbegee bé kék yé i njiiha le a noñ me, a nla bé ba nnigil wem.” (Lukas 14:27) I pot maliga, kiki Yésu a bi kôhna mandutu, bañga nnigil i nlama ba bebee i son njonok. Yésu a bi kal yak le a bé lama wél i moo ma baoo bé.

Limut li yé ke ni Yésu li nlama tibil ôt mahoñol inyu yi kii i ba nnigil Kristô i nkobla. Yésu a ngwélél hihéga hiada inyu yigye i jam li. A nkal le: “Kiki hihéga, njee ikété nan, ibale a nsômbôl oñ nkum ndap, a mbôk ndugi bé a yén isi, a ôt nsoñgi inyu tehe too a gwé gwom bi kôli inyu mélés wo? Tiga le a tek hikuu, ndi a la bé mélés ndap.” (Lukas 14:28, 29) Jon ilole ba nyila banigil ba Yésu, i bet ba yé ke ni nye i Yérusalem ba nlama ba bebee i tibil yônôs nson wap. Inyu yigye mahoñol ma, Yésu a ngwélél hihéga hipe, a nkal le:

“Imbe kiñe i nke i jôs kiñe ipe gwét, ndi i bôk ndugi bé i yén isi i bat batipék maéba inyu tehe too lôñni jôm li dikôô di bisônda a nla kolba i kiñe i nlo i jôs nye ni môm ima ma dikôô ma bisônda? I pot maliga, ibale a nla bé jôs nye, a ñep ntôñ u bakenwin inyu kôp nsañ ngéda ii kiñe ipe i ngi yii haa. Nlélém jam, yina le to wada ikété nan a nla bé ba nnigil wem ibale a ntjôô bé nkus wé wonsôna.”​—Lukas 14:31-33.

Ni maliga, Yésu a ta ndik bé i pôdôs limut li noñ nye. Ba bobasôna ba nigil i yi Kristô ba nlama ba bebee i boñ kii yosôna a yé kal. Hala a nkobla le ba nlama ba bebee i nimis kii yosôna ba gwé, yak niñ yap inyu yila banigil bé. Di nlama ôt mahoñol mu jam li ikété masoohe.

Yésu a ntiimba pôdôl ngim jam i i yé le a bôk a pôdôl i Nkwel wé ngii hikôa ngéda a bi kal le banigil bé ba yé “bas i nkoñ isi.” (Matéô 5:13) Hala a nsômbôl kal le, kiki bas i nhôla i tééda bijek inyu boñ le bi ôbi bañ, banigil bé ba nhôla bôt i tééda libak jap lilam i pes mbuu, le maboñok mabe ma nkoñ isi ma ôbôs bañ bo. Nano le nson wé u yé mamélél, Yésu a nkal le: “Ibabé pééna, bas i yé loñge, ndi ibale bas i nimis line jé, ni kii n’a timbis line li?” (Lukas 14:34) Baemble nye ba nyi le i bas ba nuñul i ta bé ilam, i yé mpôdnaga ni biték, jon i gwé bé ngandak nseñ.

Ndi Yésu a yé unda le i bet ba yé banigil ibôdôl behee, ba nlama bé tomb, ibale ba ntomb, ba nyila kiki bas i i nimis ngui yé. Ibale hala a mpémél bo, ba ga yila yañga kiki bas i i nimis ngui yé. Bôt ba ga nol bo. Jam li nlôôha béba li yé le ba ga nimis mahee map i mis ma Djob, ba hoo ki jôl jé mahindi. Yésu a ñunda nseñ i keñgle i jam li ngéda a nkal le: “Nu a gwé maôô i emble, a emble.”​—Lukas 14:35.