Man Samaria wada a ñéba le a yé toi mut libôk

Mu kiki Yésu a ngi yii bebee ni Yérusalem, ngandak Lôk Yuda i nlo i nyeni. Bahogi ba nlo emble biniigana gwé, ndi bape ba nlo i noode nye. Wada wap, nyimbén a mbat Yésu ini mbadga: “A Lét, kii me nlama boñ inyu kôdôl niñ boga?”​—Lukas 10:25.

Yésu a nyimbe le i mut nu a nsômbôl ndik bé kôhna biniigana. Bebek a noode Yésu inyu boñ le a ti ndimbhe i i ga unbaha Lôk Yuda. Kiki a nyi mahoñol ma mut nu, ni pék Yésu a ntinde nye i pémés mahoñol mé.

Yésu a mbat le: “Kii i yé ntilga i mbén Môsi? Lelaa u nok yom u ñañ?” I mut nu a bi nigil Mbén Djob, jon a nigbene mu inyu timbhe. A ngwélél Ndiimba Mbén 6:5 ni Lôk Lévi 19:18, a nkal le: “‘U nlama gwés Yéhôva Nyambe woñ ni ñem woñ wonsôna, ni niñ yoñ yosôna, ni ngui yoñ yosôna, yak ni mahoñol moñ momasôna,’ ni le ‘u nlama gwés mut woñ libôk kiki wemede.’” (Lukas 10:26, 27) Baa ndimbhe i?

Yésu a nkal mut le: “U ntimbhe loñge; ke ni bisu i boñ hala, ndi w’a bana niñ boga.” Ndi baa nkwel u ntelbene ha? I mut nu a gwé ndik bé ngôñ ni ndimbhe i ñumne i ngii mam ma nene, a nsômbôl “unda le a téé sép,” a nsômbôl éba le litehge jé li mam li yé lilam, ni le a kôli tééñga bape. Jon a mbat le: “I pot maliga, njee a yé mut wem libôk?” (Lukas 10:28, 29) I mbadga i, i nene wee i nlet bé, ndi i yé ndip. Kii hala a nkobla?

Lôk Yuda i nhoñol le ini buk le “mut libôk” i mpôdôl ndigi bet ba noñ bilem bi Lôk Yuda, i nla nene wee i jam li jon Lôk Lévi 19:18 a nsômbôl kal. Lôk Yuda i nkal yak le “i ta bé man Lôk Yuda kunde” i ba liwanda ni mut a ta bé man Lôk Yuda. (Minson mi baôma 10:28) I mut nunu, ni ngim banigil i Yésu ipe ba nhoñol le ba téé sép ibale ba ñunda loñgeñem ipañ Lôk Yuda ipe. Ndi ba nla lédél mut a ta bé man Lôk Yuda ñem; a ta toi bé “mut libôk.”

Lelaa Yésu a nla kodol i mut nunu ibabé i babaa nye ni Lôk Yuda ipe i i  yé emble? A ngwélél ñañ inyu timbhe: “Mut wada a bé lôl i Yérusalem, a sôhôk i Yérikô, ndi a kwo i moo ma mintonba; ba kadal nye gwom gwobisôna a bééna, ba bép nye, ba ke ngwéé, ba yék nye bebee ni nyemb.” Yésu a nkonde le: “I bi kolba le prisi yada i bé sôs mu njel i, ndi ngéda i bi tehe nye, i tagbe ii pes nloñ. Nlélém jam won yak man Lôk Lévi wada a bi boñ. I ngéda a bi pam ha i homa nu, a tehe nye, a tagbe ii pes nloñ. Ndi mut Samaria wada nu a bi yoñ njel i, a pam ha homa nu, kiki a ntehe nye, a kon nye ngoo.”​—Lukas 10:30-33.

Ibabé pééna, i mut Yésu a yé añle ñañ unu a nyi le ngandak biprisi ni ngandak bon ba Lévi ba ba nsal i témpel ba yiine i Yérikô. I mahuune map ma témpel, ba mboñ 23 kilôméta inyu ke i Yérikô, njel i nla ba béba ngandak inyule bôt ba wip ba yé mu. Ibale prisi ni man Lôk Lévi ba ntehe mut ba nibil, baa ba kôli bé hôla nye? Munu ñañ wé, Yésu a nkal le ba bi hôla bé nye. I mut a bi hôla nye, a yé man Samaria, i bôt Lôk Israel i nyan.​—Yôhanes 8:48.

Kii man Samaria a mboñ inyu hôla man Lôk Yuda ba nibil? Yésu a nke ni bisu i kal le: “A bi kôôge nye bebee, a kañ mambaaba mé ni bibandas, a kôp ki mo môô ni wai. I mbus, a bédés nye i ngii jakas jé, a kena nye i ndap bakén, a tééda ki nye loñge. I kel i bé noñ, a yoñ dinariô iba, a ti yo nwet ndap bakén, a kal le: ‘Tééda nye loñge; kii yosôna w’a pémés iloo ha, m’a timbhe we yo ngéda m’a tiimba lo.’”​—Lukas 10:34, 35.

Kiki a mal añle nye ñañ, Yésu, Malét Nkeñi a mbat nye mbadga i i ntinde nye i ti ndimbhe, a nkal le: “Ikété bana bôt bo baa, u nhoñol le njee a ñunda le a yé mut libôk nu mut a nkwo i moo ma mintonba?” Bebek mut a nwo nyuu i timbhe le “man Samaria” jon a ntimbhe le: “Nu a bi unda nye konangoo.” Ni hihéga hi, Yésu a nti biniigana bi nlôôha bilam, a nkal le: “Kenek, yak we boñ nlélém.”​—Lukas 10:36, 37.

Kinje likeñge lilam inyu niiga! Ibale Yésu a kal ndik i mut nunu le yak i nwet a ta bé Lôk Yuda a yé mut wé libôk, baa ki i mut nu ni ini Lôk Yuda ipe i bi neebe i jam li? I nene le to. Mu kiki a ñañle bo man ñañ, a ngwélél ki bon ba matode ba ba nhôla baemble i wan bomede, ba ntibil tehe ndimbhe i mbadga ini le: “Njee a yé mut wem libôk?” I mut a ñéba le a yé bañga mut libôk, a ñunda gwéha ni loñgeñem kiki Bitilna bi nkal.