Yésu a nyônôs mbañ Yésaya

Ngéda a nok le Farisai ni ntôñ u bôt ba Hérôdé ba nyéñ nol nye, Yésu ni banigil bé ba nke i tuye Galiléa. Mamut ma lôlak bebee le mbok yosôna ma nlo i nyeni, i Galiléa, i bitison bi ngwañ lép ba nsébél le Tir ni Sidôn, i pes likôl i Lom Yordan, i Yérusalem, ni i Iduméa i nwelmbok. Yésu a mélés makon ma ngandak bôt. Yak bet ba gwé makon ma nlôôha ba béba, ba nlo i nyeni. Ba mbem bé le Yésu a tihba bo, bomede ba nyamnda i tihba nye.​—Markô 3:9, 10.

Mu kii mamut ma yé ngandak, Yésu a mbat banigil bé le ba yéñ nye man môñgô, nkôôbaga inyu yé kayéle a laa ke ndék haa ni ngwañ tuye ibale mamut ma nkéña nye. Jam lipe li yé le a ga la niiga bo, môñgô u kenek bahoma bape mu ngwañ tuye inyu niiga bôt.

Nnigil Matéô a nyimbe le nson u Yésu u ‘nyônôs jam li pôda ni njel mpôdôl Yésaya.’ (Matéô 12:17) Imbe mbañ Yésu a yé yônôs?

“Nuna-ki! Ngwélél wem nu me mpohol, ngwélél wem nu gwéha, nyen a nlémél me! M’a ha mbuu wem i ngii yé, a’ toñle ki matén kii i yé telepsép. A’ bôk bé kai i sédi, a’ lém bé to nsiñga u lambe u u ntu hiida, letee a boñ le telepsép i yémbél. Ñ, matén m’a bôdôl jôl jé ñem.”​—Matéô 12:18-21; Yésaya 42:1-4.

Ibabé pééna Yésu nyen a yé ngwélél nu gwéha nu a nlémél Djob. Yésu a ñunda bôt kii i yé toi telepsép i baéga bibase ba bi yubda ni bilem gwap bi matén. Inyule ba ngwélél Mbén Djob i nya i téé bé sép, Farisai i bé bé le i hôla mut a nkon i kel Sabat! Inyu unda telepsép i Djob, ni le Mbuu u Djob u bé ngii yé, Yésu a bi kobol bôt mu minkôm mi bilem baéga bibase ba bi bot. Inyu hala nyen ba nyéñ nol nye. Kinje ngoo!

“A’ nomol bé to lond makeñi, mut to wada a’ nok bé to kiñ yé i minloñ minkeñi.” Bibuk bini bi nkobla le kii? Ngéda a bé mbuubaha bôt, Yésu a bé sôñga bo, a sôñgaga yak mimbuu mimbe le mi “kal bañ bôt njee a yé.” (Markô 3:12) Yésu a ngwés bé le bôt ba yi nye ni njel liyôgbe li mbéna ba minloñ, tole ni njel minkoda mi miñañ bôt ba ñañle bape.

Jam lipe li yé le, nwin u hogbe Yésu a gwé, u yé inyu ba ba yé kiki kai i sédi, le bôt ba ntitbe. Ba yé kiki nsiñga u nloñ limha, u njajat i nsôk i yé bebee ni lém. Yésu a ntét bé nya bôt i. Ndi, ni loñgeñem ni gwéha, a nyoñ ndun i bédés bôt ba suhulnyuu. Ntiik, Yésu a yé toi i mut matén ma nla bôdôl ñem!