Baa Djob a yé homa nyensôna i nlélém ngéda?
Ndimbhe i Bibel
Djob a gwé ngap i tehe mam momasôna ni i boñ mam momasôna to hee a mpohol i boñ mo. (Bingéngén 15:3;Lôk Héber 4:13) Ndi, Bibel i niiga bé le Djob a yé homa nyensô. Maselna ni hala, Bibel i niiga le Djob a yé ngim mut, a gwé ki ngim homa het a nyééne.
Libak li Djob: Djob a yé mbuu. (Yôhanes 4:24) Mut binam a nla bé tehe nye. (Yôhanes 1:18) Biyiinda bi Djob di nléba ikété Bibel bi ñéba le a gwé ngim homa i het a nyééne. Kekikel Bibel i mah bé niiga le a nyééne homa nyensôna i nlélém ngéda.—Yésaya 6:1, 2; Masoola 4:2, 3, 8.
Liyééne li Djob: Djob a nyééne i ngii i homa bôt ba binam ba nla bé tehe. Djob a gwé ngim homa a nyééne, “nyoo i ngii.” (1 Bikiñe 8:30) Bibel i nkal le “bon ba Nyambe ba bi jôp bisu bi Yéhôva,”a hala a ñéba le Djob a gwé ngim homa nyoo i ngii, het a nyééne.—Hiôb 1:6.
Ibale Djob a ta bé homa nyensôna, baa a nla toi ntôñ me?
Ñ. Nyambe a ntôñ hiki mut. To hala kiki Djob a yééne i ngii, a ntehe i bôt bobasôna ba mboñ biliya i lémél nye, a nhôla ki hiki wada wap. (1 Bikiñe 8:39; 2 Miñañ 16:9) Béñge lelaa Yéhôva a ñéba le a ntôñ bagwélél bé:
Ngéda u nsoohe: Yéhôva a nla emble masoohe moñ to imbe ngéda u nsoohe nye.—2 Miñañ 18:31.
Ngéda u gwé nduña keñi: “Yéhôva a yé bebee ni ba ba nok njôghe i ñem; a ntohol ki ba ba nimis makénd.”—Tjémbi 34:18.
I ngeñ u gwé ngôñ ni maéba: Yéhôva “a’ ti we pék a niiga ki we njel u nlama kil” ni njel Bañga yé le Bibel.—Tjémbi 34:8.
I yom ba bi niiga bôt inyu libak le Djob a yé homa nyensôna
I yom ba bi niiga bôt: Djob a yé homa nyensôna.
Maliga: Djob a nyééne bé i hisi to homa nye ki nye nu a ntéya ikété ngiinda yosôna. (1 Bikiñe 8:27) I yé maliga le tjôdôt ni bini bihégél gwobisôna “bi añal lipém li Nyambe.” (Tjémbi 19:1) Maselna ni hala, Nyambe a nyééne bé ikété bihégél gwé. Nlélém kiki ñôt bititii a nyééne bé ikété bititii bi a mpén. Ndi gwom a mpén bi niiga bôt umbe ntén mut a yé. Nlélém jam, bihégél di ntehe ikété ngiinda, bi niiga bés njee a yé Nhek “ni bilem gwé bi bi nene bé,” kiki bo ngui, pék, ni gwéha.—Rôma 1:20.
I yom ba bi niiga bôt: Djob a nlama ba homa nyensôna inyu yi mam momasôna ni inyu bana ngui yosôna.
Maliga: Mbuu mpubi u Djob u yé ngui a ngwélél inyu boñ mam. Ni njel mbuu wé mpubi, Djob a nla tehe homa nyensôna, a nla boñ mam momasôna, ngéda yosôna, homa nyensôna, ibabé le a ba nyoo.—Tjémbi 139:7.
I yom ba bi niiga bôt: Tjémbi 139:8a ñéba le Djob a yé homa nyensôna i ngéda i nkal le: “Ibale me mbet ngii u yé nyoo, to ibale me ntek nañi yem i soñ yak nyoo, u yé.”
Maliga: I nlôñ kaat unu u mpôdôl bé i homa Djob a nyén. Bibuk bini bi nsômbôl ndigi éba le, ngim homa i nlôôha bé ba haa het Djob a nla bé bol inyu hôla bagwélél bé.
a Yéhôva a yé jôl li Nyambe li di nléba ikété Bibel.