Lelaa Bibel i Nla Hôla me?—Pes 2: Boñ le Lisoñgol Joñ li Lémél We

“Mañge wanda le Will a nkal le: “I añ Bibel i wééha i ngéda mut a gwé bé likeñge lilam.”

Baa u gwé ngôñ i yi makeñge ma ma ga hôla we i gwés lisoñgol joñ li Bibel? I yigil ini, i ga hôla we.

• I ngéda u añ ngim ñañ, boñ wee u bé ha

• Kônde yéñ!

• I jam bisega gwoñ bi nkal

I ngéda u añ ngim ñañ, boñ wee u bé ha

Mu kiki u yé añ, boñ wee u bé ha i ngéda mam ma bé bôña, u nla gwélél likeñge lini:

1. Pohol ñañ u nsômbôl nigil. U nla pohol ngim jam i bi tagbe behee tole pes kaat i i mpôdôl Yésu tole u nla pohol ntuk u Bibel wada ba ñemble i jw.org.

2. Añ ñañ. U nla añ wo wetama, ni kiñ keñi, ni mawanda moñ tole ni lihaa joñ. Mut wada a nla añal ñañ, bana bape, ba bak i bôt ñañ u mpôdôl.

3. Noode le gwélél ngim matode munu matode ma noñ:

   • Noode le ôt bititii bi bi ñéba lelaa ñañ u bi tagbe. U nla kônde minsonol ni ndoñi i ngim bititii.

   • I ngéda u añ ñañ u ngwélél Yéhôva nu behee, noode tila bilem bilam a bééna ni bisai a bi kôhna.

   • Hégda le ñañ u u yé bôña i len ini. Añal wo, u hégdaga mam mape ma bak le ma kôndba. Hégda le u yé bat i bôt ba bé ha mambadga le ba kal we i mam ba bi tehe.

   • Mu ñañ, ibale mut wada a bi yoñ makidik mabe, noode hégda lisuk lipe li bé le li pémél nye. Kiki ’héga. (Markô 14:66-72) Lelaa Pétrô a bé le a yémbél woñi ni i nduña a bééna inyu boñ le a tañba bañ Yésu?

   • Ibale u ngwés u ntila miñañ, u nla yoñ ñañ wada ikété Bibel, u tiimba añal wo kiki we u nok wo, ni biniigana we u ôt mu.—Rôma 15:4.

     

Kônde yéñ!

I ngéda u añ ngim ñañ, añ wonsôna, ha nyen w’a léba tik ngok i yé mu mbus. Ngim mangéda, buk yada tole biba bi nla niiga we ngandak mam.

Kiki ’héga, hégha Matéô 28:7 ni Markô 16:7.

• Inyuki Yésu a bi kal le Yésu a bé lama ndugi pémél banigil bé, i mbus a pémél “Pétrô”?

• Man yimbne: Markô nyemede bé nyen a bi tehe i mam a bi tila. I nene le Pétrô nyen a bi añle nye mo.

• Biniigana: Inyuki Pétrô a bi kon maséé i ngéda a bi nok le Yésu a nsômbôl tiimba tehe nye? (Markô 14:66-72) Kii Yésu a bi boñ inyu éba le a yé bañga liwanda li Pétrô? Lelaa u nla kôna nye, u yila ki bañga liwanda inyu bôt bape?

I ngéda u añ, ibale u mboñ wee u bé ha i ngéda mam ma bé tagbe, u ke ni bisu i yéñ, w’a léba le lisoñgol li Bibel li yé jam li nlôôha lilam!