Baa me nlama ndik jôp i ngim base?

Ndimbhe i Bibel

Ñ, inyule Djob a ngwés le bôt ba kodba ntôñ inyu bégés nye. Bibel i nkal le: “Di tôñna ki bés ni bés kayéle hiki wada a tinde numpe i gwéha ni minson minlam, di tjôô bañ to makoda més.”​—Lôk Héber 10:24, 25.

Yésu a bi unda le banigil bé ba ga ba ngim ntôñ i ngéda a kal bo le: “Hala nyen bôt bobasôna b’a yi le ni yé banigil bem, ibale ni gwéhna bé ni bé.” (Yôhanes 13:35) Jam li bisu ba bé lama boñ inyu unda gwéha i, i bé le ba kodba ntôñ. Ba bé lama Kodba ikété makoda hiki ngéda inyu bibégés. (1 Korintô 16:19) Bobasôna ba bé lama ba lihaa li bilôk bikéé ikété nkoñ ’isi wonsôna.​—1 Pétrô 2:​17.

Di nlama ndik bé ba i ngim base, di nlama boñ iloo ha

Tolakii Bibel i ñunda le bôt ba nlama kodba inyu bégés Djob, i nkal bé le mut a nla nlémél Djob ndik inyule a yé ikété ngim ntôñ. Inyu lémél Djob, base i mut i nlama nhôla nye i niñ hiki kel, i nya Djob a ngwés. Kiki hihéga, Bibel i nkal le: “Ntén base u u yé mpubi, u u gwé bé to mahindi i litehge li Nyambe ni Tata wés, wo unu le: I tééda bon ba nyuu ni biyik bi bôda ikété njiiha yap, ni le mut a tat nyemede le a hooba bañ to liton li mahindi ma nkoñ ’isi.”​—Yakôbô 1:​27, buk isi lipep.