Inyuki Pa da yada Hi tjôôbaseyé

Baa u nla toñle bés binéñél gwoñ?

Me bi gwéé i Italia i nwii 1943. Me ni lôk kéé i bôda ni i bôlôm di bi nañ i man mbai wada, pua yés a bé nsalnwom, a bak kapinda. Bagwal bés ba bi néñés bés i base i Lôk Pada.

Kii i bi tinde we i yila pada?

I ngéda me bé mañge, me bé gwés emble bipada i mésa. Makiñ map ni mam ba bé boñ ma bé lémél me. Jon me bi kit le me nyila pada. I ngéda me bi pamna 13 nwii, mama yem a bi ha me i suklu i i nkôôba boñge bôlôm ba ba gwé ngôñ yila bipada.

Baa u bi nigil Bibel mu suklu i?

To, bañga bé! I ngéda me bééna 15 nwii, malét wem wada a bi ti me ngim kaat i i bé pôdôl niñ i Yésu, ni nson wé, me bi añ i kaat i ngandak ngélé. I ngéda me bi bolna 18 nwii, ba bi om me i suklu ikeñi i Rôma i i yé isi énél i pape. Me bi nigil hop u Latin, ni hop Grikia, miñañ, pék i bôt ba binam, psychologie ni théologie. Maliga ma yé le, di bé tééda minlôñ mi Bibel i ño, di pahlak nwo, di emblege lisoñgol li Bibel hiki kel sonde i mésa. Ndi, di bé nigil toi bé Bibel.

Kiki u bi yila ñéga suklu, baa u bé niiga?

Me bé sal i burô. Ndi, i bé i pam ngim mangéda le me niiga baudu mambén ma Vatican.

Kii i bi boñ le u bôdôl bana pééna inyu biniigana bi base?

Mam maa ma bé tééñga me. Base i bé yoñ ngaba i mam ma m’bô. Ba bé nwas le baéga base ni bahémle ba boñ to kii ibabé le ba kogse bo. Ngim biniigana i Lôk Pada i bé nene wee i téé bé. Kiki hihéga, lelaa Nyambe nugwéha a yé le a kogse bôt i boga ni boga i mbus nyemb yap? Tole Djob a gwés toi le di soohe minlélém mi masoohe hikôô hi ngélé di gwéélak nsañ mbasa?a

Kii u bi boñ?

Ni gwiiha i mis, me bi soohe Nyambe le a hôla me. Me somb Bibel i Lôk pada ini ba nsébél ni hop u Pulasi le Bible de Jérusalem, i i bi pam ni hop Italia hala a bé ndik ndék ngéda, me bôdôl añ yo. Kekela yada, me bé héya mbot i mbus mésa, bôt iba ba lo i séminaire i homa me bé yééne. Ba kal me le ba yé Mbôgi Yéhôva. Di bi kwel iloo ngeñ yada, di kwélél mam ma Bibel ni mam ma ma ñunda kii i yé base i maliga.

Lelaa u bi tehe i bôt ba bi lo i yuuga we?

Me bi gwés hémle yap ni kiki ba bé pala léba minlôñ mi Bibel mu i Bibel yés Lôk Pada. I mbus ngéda, Mbôgi Yéhôva yada le Mario nyen a bé lo i yuuga me. A bi hônba me, a bé tôl bé. Hiki kel ngwa jôn, le nop a no, le hiangaa hi mbai, a bé koode likôga i ngeñ bôô.

Lelaa bini bipada bipe bi bé tehe i bôt ba bé yuuga we?

Me bi naña bo minkwel nwés. Ndi to wada wap a bi yoñ bé ngéda ni yigil i Bibel. Ki le me bé gwés yigil las. Me bé nigil mam malam mu ngandak. Kiki hihéga, me bi nigil inyuki Djob a nwas béba ni mandutu, i mbadga i, me bé badba yo bebee.

I bet ba bé baéga ba bi noode sôñga we le u nigil bañ Bibel?

I nwii 1975, me bi ke i loñ Rôma ngandak ngélé, inyu toñle baéga bem i yom me bé hoñol. Ba bi noode tinde me i héñha mahoñol, ndi to wada wap a bé gwélél bé Bibel. Sôk i nsôk, hilo 9 hi sôñ Kondoñ i nwii 1976, me bi tilna bo le me ta ha bé me i Lôk Pada. I mbus dilo diba, me habi nyoo i séminaire yap. Me yoñ mashin me ke inyu ngélé yem bisu i likoda li Mbôgi Yéhôva. I boma i, i bé kot ngandak makoda. Nyoo a bé bé ki base yem. Hiki mut a bééna Bibel yé, a béñgege minlôñ mi Bibel nti nkwel a bé añ, minkwel mi bé ngandak.

Kii bôt boñ ba lihaa ba bi boñ?

Ngandak bôt i lihaa jem i bi kolba me. Ndi me bi nok le mankéé wada a bé nigil Bibel ni Mbôgi Yéhôva i Lombardy, i ñombok u Italia. Me bi ke i yuuga nye. Nyoo, Mbôgi i bi lébna me bôlô, i lébna yak me ndap. I nlélém i nwii, me bi sôblana me yila Mbôgi Yéhôva.

Baa u ntam?

To jam! Nano, me nôgda le me yé bebee ni Djob, inyule i mam me nyi inyu yé ma umne bé i pék i bôt ba binam to i mam bôt ba meya ba mboñ bibase, ndi i Bibel. Nano me nla niiga bôt me bak nkwoog kaa, me podok ki maliga.