Tik biniigana inyu suhulnyuu

I mbus le a bi héñha, a pémés ki mbuu mbe u bé tééñga hiloga, i libôga li Kaisaréa i tison i Filipi, Yésu a nyoñ njel i nke Kapernaum. A nke ndik ni banigil bé, kayéle ‘mut nye ki nye a nyi bé hala.’ (Markô 9:30) Hala a nti nye pôla i kôôba banigil bé inyu nyemb yé ni inyu nson ba nlama gwel. A toñle bo le: “B’a liibana Man mut, ba ti nye i moo ma bôt ba binam, b’a nol ki nye, ndi i hilo hi nyônôs aa, a’ tuglana.”​—Matéô 17:22, 23.

Ngélé bisu bé i le banigil ba nok jam li. Yésu a bi bôk a kal le ba nlama nol nye to ibale Pétrô a bi tjél hémle i jam li. (Matéô 16:21, 22) Yak baôma baa ba bi tehe Yésu a nhéñha ba nok ki nkwel u u bé pôdôl “liké” jé. (Lukas 9:31) I jam Yésu a nkal li “tééñga banigil bé ngandak,” to hala kiki ba ntibil bé nok kii bibañga gwé bi nkobla. (Matéô 17:23) Ndi ba nkon woñi i bat nye mbadga mu jam li.

Ba nsôk ba mbol i Kapernaum, tison ligwéé i bahogi mu banigil bé, mu i tison i nyen Yésu a nlôôha ntéé likalô. Nyoo nyen bakottas ba nkôôge Pétrô bebee, ba mbat nye le: “Baa malét nan a nsaa bé tas i drakma iba?”​—Matéô 17:24.

Pétrô a ntimbhe le: “A nsaa.” Ngéda a ntémb i ndap, Yésu a nyi jam li ntagbe. Iloole a nwas le Pétrô a ñañal jam li ntagbe, Yésu a mbat nye le: “U nhoñol lelaa, a Simôn? Bonjee bikiñe bi nkoñ isi bi mbat tas tole nsul u ngomin? Bon bap tole bôt bape?” Pétrô a ntimbhe le: “Bôt bape.” Yésu a nkal le: “I pot maliga, bon ba kiñe ba nsaa bé tas.”​—Matéô 17:25, 26.

Isañ Yésu a yé Kiñe i ngiinda yosôna, Nyetama ki nyen ba mbégés i témpel. Jon, inoñnaga ni mbén, Man Djob a ta bé nyégsaga i saa tas. Yésu a nkal le: “Ndi inyu boñ le di yilna bañ bo ngok baagene, ke i tuye, u leñ nlop, hiobi hi bisu u ngwel, yoñ hio, i ngéda u nyibil hio nyo, w’a léba moni silba wada [Ni hop Grikia i yé “stater,” tole tétradrakma]. Yoñ nye, u ti bo nye inyu me ni we.”​—Matéô 17:27.

Nano kiki ba yé ntôñ, ba nsômbôl bat Yésu njee a yé nunkeñi ikété Ane. Ndék ngéda bisu, ba bi kon woñi i bat Yésu mambadga inyu nyemb yé, ndi nano ba nkon ha bé woñi i bat nye mambadga inyu dilo di nlo. Yésu a nyi jam ba nhoñol. I yé ngim jam i i bi nlona bo pééna. Ngéda ba bé noñ nye mbus mu kiki ba bé ke i Kapernaum. Jon a mbat le: “Ni péénaga kii mu njel?” (Markô 9:33) Banigil ba nyi bé kii ba kal, ba mom nwee inyule ba bi noñna inyu yi njee a yé nunkeñi. Sôk i nsôk, banigil ba mbat Yésu i mbadga ba bak ba nkwélél, ba mbat le: “Njee yaga a yé nunkeñi ikété Ane i ngii?” ​—Matéô 18:1.

Hala a nlet i nok le banigil bon ba gwé nya pééna i, i mbus le ba ma tégbaha bebee le nwii maa i emble biniigana bi Yésu. Ndi ba yé bikwéha. Ba néñél i homa base i ntinde bôt i diihe bitel ni likala li niñ. Jam lipe li yé le Pétrô a bi nok Yésu a mbôn nye “diliba” di Ane. Baa jon a nhoñol le a nloo bape? I nene le Yakôbô bo Yôhanes ba gwé i nya mahoñol i inyule ba bi tehe Yésu a nhéñha.

To ibale mam ma yé lelaa, Yésu a nyoñ bitelbene inyu kodol bo. A nsébél hipéda hi mañge, a ntéé hio ipôla yap a kal banigil le: “Handugi le ni hielba, ni yila kiki boñge batitigi, ni yé mbén i jôp ikété Ane i ngii. Jon nu ni nu a’ suhus nyemede kiki mañge ntitigi nunu, nyen a’ ba nunkeñi ikété Ane i ngii; nu ni nu ki a nleege mañge ntitigi kiki nunu i jôl jem, wee a nleege yak me.”​—Matéô 18:3-5.

Kinje loñge likeñge inyu niiga! Yésu a ñunbene bé banigil bé, a nkal bé ki to le ba nyéñ mbom mam. Ndi, a ngwélél hihéga hi mbuma ñañ. Boñge batitigi ba nkadba bé, ba gwé bé to ngôñ i yi njee a nlel. Yésu a ñunda le banigil ba nlama hôlôs i nya mahoñol i. Yésu a nsôk kal banigil bé le: “Nu a gwé maboñok ma nuntitigi ipôla nan, nyen a yé nunkeñi.”​—Lukas 9:48.