• Ni nôgda loñge ikété ndumbba nan yosôna
    “Ni téédaga bébomede ikété gwéha Nyambe”

    • 6, 7. Kii i ñunda le Yésu a nsal bôlô ngui ibôdôl behee?

      6 Yak Yésu a yé mut nu a nsal bôlô ngui ibôdôl kôba. Ilole a nlo hana isi kiki mut binam, a bé ‘bañga ngwelnson’ ngéda Djob a bé hek mam momasôna ‘ma ma yé ngii, ni ma ma yé isi.’ (Bingéngén 8:22-31; Kôlôsé 1:15-17) Ngéda a bé hana isi, Yésu a bi kena nson wé ngui ni bisu. Ngéda a bé mañge wanda, a bi nigil bôlô i maoñ, jon a bé yiba kiki “kapinda.”a (Markô 6:3) I bôlô i, i bé i nwééhana, i badak ki likeñge​—téntén inyule ha ngéda i, mashin makeñi inyu kit bikék ma bé bé, to bisabe inyu somb bisélél bi maoñ, to mashin ma nke ni i ngui i nti mapubi. Baa u nla hégda Yésu a nke toñ nkok bikai​—bebeg a bé a bôk ndugi a kit e, mbus a ôt nkok letee ni i homa wé bôlô? Baa u hégda nye a yé oñ mandap? Baa u ntehe nye a yé kôôba bikék, mbus a tômôl nyôl? Baa u ntehe nye a mbañ makôga, bikobot, bitéblé ni gwom bipe? Ibabé nkaa, Yésu a bi nôgda maséé ma yé i ngwel nson nlam.