Ba ntjél hémle Yésu i Nasaret

Yésu a bak a pégi kel yosôna. I mbus le a mélés liké jé i nkoñ Dékapôli, a mbuubaha muda matjél ma bé pam, a tugul ki ngond Yairô. Ndi kel i yé ngi mal. Kiki a nyodi i ndap Yairô, bôt ba ndim iba ba noñ nye, ba londok ba kalak le: “Kon bés ngoo, a Man David.”​—Matéô 9:27.

Mu kiki ba nsébél Yésu le “Man David,” i bôt bana ba yé unda le Yésu a yé nkatbum i yééne Kiñe David, hala wee Mésia. Yésu a mboñ wengoñle a ta bé nok minyemhe nwap, bebek inyu tehe too ba ga téñbe, ndi bo ba nke ndik ni bisu i lond. Kiki Yésu a njôp i ndap yada, i bôt ba bo iba ba noñ nye nyoo ikété. Yésu a mbat bo le: “Baa ni nhémle le me nla mélés kon nan?” Ni ngandak makénd, ba ntimbhe le: “Ñ, a Nwet.” Yésu a ntihba mis map, a kal le: “I bôña ni bé kiki ni mbat.”​—Matéô 9:28, 29.

Kunda yada, ba mbôdôl tehna! Kiki a bi bôk a béhe bape, Yésu a nkal bo le ba añal bañ jam a mbôñôl bo. Ndi ikété ngandak maséé ba bééna, ba ga añal jam li homa nyensôna.

Kiki i bôlôm iba bana ba nke, bôt ba nlona mut a mpot bé inyule a gwé mbuu mbe. Nlélém ngéda Yésu a nluhul mbuu mbe u, mut a bôdôl pot. Bôt ba yé nhelek, ba kalak le: “Di ma tehe bé nya jam ini hana Israel.” Yak Farisai i yé ha. I nla bé pééna bihélha bi mam bi, jon ba nlona ki pééna inyu ngui Yésu a ngwélél inyu boñ bihélha bi mam, ba nkal le: “Ni ngui i ñane mimbuu mimbe nyen a mpémés mimbuu mimbe.”​—Matéô 9:33, 34.

I mbus ndék ngéda, Yésu a ntémb i Nasaret, tison het a bi néñél. Ndi nano banigil bé ba yé ni nye. Hala a yé nwii wada nano le a bi niiga i ndap bibégés i Nasaret. I bibôdle, bôt ba bi kon maséé ni mam a bé kal, ndi ba bi sôk ba unup inyu biniigana gwé, ba yéñ ki nol nye. Ndi to hala, Yésu a nyéñ ki njel i hôla bôt ba Nasaret.

I kel Sabat, Yésu a ntémb i ndap bibégés inyu niiga. Ngandak i yé nhelek, i mbôdôl badba le: “Hee mut nunu a bi yôñôl pék ni mimpémba mi mam mini?” Ba nke ni bisu i kal le: “Baa nye bé nyen a yé man kapinda? Nyañ bé le Maria, ni lôknyañ bé le Yakôbô, Yôsep, Simôn ni Yuda? Yak lôknyañ i bôda, yosôna i yé nga ni bés? Hee ni a nyôñôl mam mana momasôna?”​—Matéô 13:54-56.

Bôt ba ntehe ndik Yésu kiki mut mbai yap. I yé wengoñle ba nkal le: ‘Di ntehe nye a nañ hana, jon lelaa a yé le a ba Mésia?’ To hala kiki ngandak mam i bé lama kwés bo nkaa, mam kiki bo pék i Yésu i i mbuma ñañ, ni bihélha gwé bi mam, bôt ba Nasaret ba ntéñbe i tjél hémle nye. Inyule ba meya Yésu, yak bôt bé ba lihaa ba ntjél hémle nye. Hala a ntinde Yésu i kal le: “Mpôdôl a gwé lipém homa nyensôna, ndi a gwé bé lipém i loñ yé to i ndap yé.”​—Matéô 13:57.

Ngitophémle yap i nhélés Yésu, jon a mboñ bé ngandak bihélha bi mam mu tison i, “handugi i kéhi moo i ngii ndék bakokon ni i mélés makon map.”​—Markô 6:5, 6.