Yésu a mpohol baôma

Hala a yé bebee le nwii wada ni pes le Yôhanes Nsôble a bi pôdôl Yésu kiki Man Ntômba nu Djob. Ngéda Yésu a bi bôdôl nson wé i mbamba, ngandak bôt i i bééna ñem maliga i bi yila banigil bé, kiki bo Andréa, Simôn Pétrô, Yôhanes, bebek yak Yakôbô (manyañ Yôhanes), Filipô, ni Bartôlôméô (nu ba nsébél ki le Natanael). I mbus ngéda, ngandak ipe i bi bôdôl noñ Kristô.​—Yôhanes 1:45-47.

Nano Yésu a yé bebee i pohol baôma bé. Bon ba ga ba mawanda mé ma ñemnyuu, a ga niiga ki bo i nya i yé tôbôtôbô. Ndi ilole a mpohol bo, Yésu a nke hikôa hiada, bebek ipañ tuye Galiléa, bebee ni Kapernaum. A ntégbaha u wonsôna ikété masoohe, di nla kal le hala a yé inyu bat Djob pék ni bisai gwé. I kel i noñ ha, a nsébél banigil bé, ikété yap a mpohol 12 inyu yila baôma bé.

Yésu a mpohol banigil bé basamal di nsima i bibôdle. A mpohol ki Matéô nu a yé nkottas. Bana batan bape ba yé: Yuda (nu ba nsébél ki le Tadéô tole “man Yakôbô”), Simôn mut Kana, Tômas, Yakôbô man Alféô ni Yuda Iskariôt.​—Matéô 10:2-4; Lukas 6:16.

Hala a yé ndék ngéda le bôlôm 12 bana ba nkiha ni Yésu, a nyi bo loñge. Bahogi ikété yap ba yé bôt bé ba lihaa. Bebek Yakôbô ni manyañ Yôhanes ba yé bilôk binyañ bi Yésu. Kiki bape ba nhoñol, ibale Alféô a yé manyañ Yôsep isañ Yésu, wee ñôma Yakôbô nu a yé man Alféô, a nlama ba manyañ Yésu.

Ñ, Yésu a gwé bé ndutu i bigda môl ma baôma bé. Baa yak we u yé le u bigda môl map? Jam li nla hôla we li yé i yi le iba ba nséblana le Simôn, iba ba nséblaga le Yakôbô, iba ba nséblaga ki le Yuda. Manyañ Simôn (Pétrô) a yé Andréa, manyañ Yakôbô (man Sébédéô) a yé Yôhanes. Hala a nhôla i bigda môl ma baôma 8. Baôma ba-na bape ba yé nkottas Matéô, Tômas nu a ga sôk a pééna, Natanael nu ba bi sébél a bak isi e, ni Filipô liwanda li Natanael.

Jôm li baôma ni wada ba nlôl i Galiléa, homa Yésu a néñél. Natanael a yé mut Kana. Filipô, Pétrô ni Andréa ba nlôl i Bétsaida. I mbus ngim ngéda, Pétrô bo Andréa ba bi ke i Kapernaum, bebek homa liyééne li Matéô. Yakôbô bo Yôhanes ba niñ i Kapernaum tole bebee ni Kapernaum, ba mboñ bôlô yap i balop tjobi ha bebee. I nene le Yuda Iskariôt nu a ga sôk a liibana Yésu, nyetama nyen a yé ñôma Yésu a nlôl i Yudéa.