Yésu a ñunda makénd inyu bibégés bipubi

I mbus libii i Kana, Yésu a nke i Kapernaum. Nyañ Yésu ni bilôk binyañ Yakôbô, Yôsep, Simôn, ni Yuda ba yé i ke ni nye.

Ndi inyuki Yésu a nke i Kapernaum? I tison i i yéne i loñge homa, i bak ki keñi iloo Nasaret tole Kana. Jam lipe li yé le ngandak ikété banigil ba Yésu ba mondo ba niñ i Kapernaum tole mabôga ma yé nye ipañ. Jon Yésu a nla niiga bo mu nkoñ wap u ligwéé.

Mu dilo a ntégbaha i Kapernaum, Yésu a mboñ ki bihélha bi mam. Jon ngandak bôt i i yé mu i tison ni ipañ, ba nok mam Yésu a yé boñ nyoo. Ndi ndék ngéda wee Yésu ni banigil bé ba ba yé bañga bon ba Yuda, ba nke i Yérusalem inyu lôôs ngand Pasa i nwii 30 N.Y.

I témpel Yérusalem, banigil ba Yésu ba ntehe ngim jam ipe yak Yésu i ba mah bé tehe, li yé maselna ni mam ba bi tehe nye a mboñ bisu ngéda.

Mbén Djob i nkal bon ba Israel le ba ti bisesema i témpel, bakén ba gwé ngôñ ni bijek mu dilo ba nyén nyoo. Jon Mbén i bé nwas le bet ba nlôl haa inyu ke i Yérusalem ba bana moni inyu somb “balôm ba nyaga, to mintômba,” to kembee to kinje yom nseñ ba gwélél nyoo i tison. (Ndiimba Mbén 14:24-26) Inyu hala nyen bôt ba nyuñga ba nuñul binuga ni dinuni mu kotoo i témpel. Bape ikété yap ba nibil bôt, ba nuñlak ki gwom diye.

Ikété njôô, Yésu a nkôp moni mi bôt ba nyuñga isi, a nkwéha bitéblé gwap, a buñgaga ki bo. I mbus Yésu a nkal le: “Héyana i gwom bini hana! Ni waa yilha ndap i Tata ndap nyuñga!”​—Yôhanes 2:16.

Ngéda banigil ba Yésu ba ntehe hala, ba nhoñol mbañ i i mpôdôl Man Djob: “Makénd inyu ndap yoñ m’a loñ kiki hié ikété ñem wem.” Ndi bôt ba Lôk Yuda ba mbat le: “Imbe yimbne u nla unda bés le u kôli boñ i mam mana?” Yésu a ntimbhe le: “Ni bôk i témpel ini, m’a tiimba téé yo i mbus dilo daa.”​—Yôhanes 2:17-19; Tjémbi 69:10.

Lôk Yuda i nhoñol le Yésu a yé pôdôl témpel i i yé i Yérusalem, jon ba mbat le: “Ba bi yoñ môm ma-na ma nwii ni minsamal inyu oñ témpel ini, ndi we w’a yoñ ndik dilo daa inyu téé yo?” (Yôhanes 2:20) Ndi, Yésu a yé pôdôl nyuu yé. Nwii maa i mbus, banigil b’a bigda jam li ngéda a ga tuge.