Yésu a niiga Nikôdémô juu

Kiki Yésu a yé i Yérusalem inyu Pasa i nwii 30 N.Y., a mboñ bihélha bi mam, tole mam ma mbuma ñañ. Inyu hala, ngandak bôt i kahal hémle nye. Nikôdémô, Farisai yada i i yé ikété Ntôñ bakéés bakeñi u Lôk Yuda, a yé nhelek. Mu kiki a gwé ngôñ i yi ngandak mam, a nyuuga Yésu u u ma sude, ndik inyule a nkon woñi le ibale bakena ba Lôk Yuda bape ba ntehe nye, ba ga ôbôs nye jôl.

Nikôdémô a nkal Yésu le: “A Rabi, di nyi le u yé malét nu a nlôl yak Nyambe, inyule mut to wada a nla bé boñ biyimbne bini u mboñ ibale Nyambe a ta bé lôñni nye.” Yésu a nkal Nikôdémô le inyu boñ le mut a jôp i Ane Djob, a nlama gwéé “ligwéé li yondo.”​—Yôhanes 3:2, 3.

Lelaa mut a nla gwéé ligwéé li yondo? Nikôdémô a mbat le: “A nla ha bé jôp ikété libum li nyañ inyu ngélé nyônôs iba le ndi a tiimba gwéé, hala bé?”​—Yôhanes 3:4.

To, hala bé nyen ligwéé li yondo li nkobla. Yésu a ntoñol le: “Ibale mut a ngwéé bé ni njel malép to ni njel mbuu mpubi, a nla bé jôp i Ane Nyambe.” (Yôhanes 3:5) Ngéda Yésu a bi sôblana, mbuu mpubi u bi sôs i ngii yé, hala nyen a bi gwéé ‘ni njel malép yak ni njel mbuu mpubi.’ Ha ngéda i, kiñ i bi lôl i ngii i kalak le: “Man wem nunu, nugwéha wem, a nlémél me.” (Matéô 3:16, 17) Hala nyen Djob a bi legel le a nlona Yésu kiki man wé nu mbuu nu a gwé pôla i jôp i Ane ngii. I mbus ngéda, i Pentékôt i nwii 33 N.Y., mbuu mpubi u ga kahap i ngii banigil bape ba yé nsôblege, ha nyen yak bo b’a gwéé ligwéé li yondo kiki bon ba mbuu ba Djob.​—Minson mi baôma 2:1-4.

I ta bé jam li ntomb inyu Nikôdémô i tibil nok biniigana bi Yésu bi bi mbéñge Ane. Inyu hala nyen Yésu a nkal ki nye ngandak mam i i mbéñge nson wé tôbôtôbô kiki Man Djob. Yésu a nkal le: “Ndik kiki Môsi a péni nyoo i kék i ñoñ, hala nyen ba nlama péni Man mut i kék, inyu boñ le hiki mut a nhémle nye a bana niñ boga.”​—Yôhanes 3:14, 15.

I ngéda kôba, i bon ba Israel nyoo i bi kogoo ba bé lama béñge mbañak nyoo i mamuna inyu tohlana. (Ñanga bôt 21:9) Nlélém, bôt ba binam bobasôna ba nlama unda le ba nhémle Man Djob inyu boñ le ba tohla kogse i nyemb ni inyu boñ le ba bana niñ boga. Inyu yigye gwéha i Yéhôva mu bitelbene bi, Yésu a nke ni bisu i kal Nikôdémô le: “Nyambe a bi gwés nkoñ isi iloo hihéga, jon a bi ti mpom wé Man inyu boñ le hiki mut a ñunda le a nhémle nye a tjiba bañ, ndi a bana niñ boga.” (Yôhanes 3:16) Jon ha i Yérusalem, bebee le sôñ isamal i mbus le a mbôdôl nson wé, Yésu a ntibil unda le a yé njel tohi i bôt ba binam.

Yésu a nkal Nikôdémô le: “Nyambe a bi ep bé Man wé hana nkoñ isi inyu kéés nkoñ isi.” Hala a nkobla le a bi lo bé inyu kéés baoo bé, i pémés mbagi tjiba inyu bôt ba binam bobasôna. Ndi, kiki Yésu a nkal, a bi lo “inyu boñ le nkoñ isi u kôhna tohi ni njel yé.”​—Yôhanes 3:17.

Nikôdémô a nlo tehe Yésu juu inyule a nkon woñi. Jon hala a nôga i ngéda Yésu a mélés nkwel wé ni bini bibuk: “Ndi bikééhene bi bôt bi nlôl munu jam lini: Le mapubi [hala wee Yésu ni njel niñ yé ni biniigana gwé] ma bi lo ikété nkoñ isi ndi bôt ba bi gwés jiibe iloole ba gwés mapubi, inyule minson nwap mi bé mimbe. Inyule nu ni nu a gwé lem i boñ mam mabe a ñoo mapubi, a nlo bé to i mapubi le ndi mapubi ma yelel bañ minson nwé. Ndi nu ni nu a mboñ mam ma yé maliga a nlo i mapubi, le ndi i nene i mbamba le minson nwé mi mbôña inoñnaga ni sômbôl i Nyambe.”​—Yôhanes 3:19-21.

Hanano ngéda i nkola le Nikôdémô, ini Farisai ni nniiga i Lôk Israel le a ôt mahoñol i mam a nok inoñnaga ni nson u Yésu ni sômbôl Djob.