Yésu a mboñ hélha yé jam i bisu

Nano a yé dilo daa le Natanael a nyila wada mu banigil ba Yésu. Yésu ni ndék banigil yé ba yé ke i ñombok u nkoñ Galiléa, i homa ba niñil. Ba nke i Kana, tison i Natanael. Kana a ôñne i ngii dikôa i nwelmbok u Nasaret, het Yésu nyemede a néñél. Ba naña bo i ngand libii i Kana.

Yak nyañ Yésu a nlo libii. Mu kiki a yé liwanda ni lihaa li babiina, i nene le Maria a nyoñ ngaba i leege ngandak bakén. Inyu hala nyen a mpala yimbe le ngim yom i nkahal hañ, ni nye a nkal Yésu le: “Ba gwé ha bé wai.”​—Yôhanes 2:3

I pot maliga, Maria a yé bat Yésu le a boñ ngim jam. Inyu unda le a gwé bé minlélém nwé mi mahoñol, Yésu a nkal le: “A muda, baa hala a mbéñge me ni we?” (Yôhanes 2:4) Kiki Yésu a yé Kiñe Djob a ntep, Yéhôva, Isañ nu ngii nyen a nlama kal nye kii a boñ, he bôt ba lihaa bé to mawanda bé. Ni pék a gwé, Maria a nwas mam i moo ma lok yé. A nkal ndik minlimil mi yé ha le: “Boña kii yosôna a nkal bé.”​—Yôhanes 2:5

Biébél bi malép bi ngok bisamal bi yé ha, hiki yada i nla yoñ 40 ma lita. Yésu a nkal minlimil le: “Yônhana malép mu biébél.” I mbus a nkal le: “Nano yoña ndék mu, ni kena mo yak ñéga ngand.”​—Yôhanes 2:7, 8.

Ñéga ngand a yé nhelek inyu loñge wai, ndi a nyi bé le hala a mbôña ni njel hélha jam. Jon a nsébél mbiimuda, a nkal nye le: “Bôt bape ba yé ba bôk ndugi ba pémés bañga wai; i ngéda bôt ba nhiôô, ha nyen ba nti bo wai i i ta bé ilam jôga. Ndi we u ntééda bañga wai letee ni nano.”​—Yôhanes 2:10.

I jam li jon li yé hélha jam i bisu Yésu a mboñ. Kiki banigil bé ba mondo ba ntehe hala, hémle yap inyu yé i nlet. I mbus, Yésu, nyañ, ni bilôk binyañ bi nke i tison i Kapernaum i ñombok i ngwañ tuye Galiléa.