Yésu a mpémél ngandak bôt ilole ngwa Pentékôt i nkola

I mbus bitugne gwé, Yésu a nkal banigil bé le ba bomna i ngii hikôa hiada i Galiléa. Bebee le 500 i banigil ipe i yé ha, bahogi ba ngi péénaga. (Matéô 28:17; 1 Korintô 15:6) Ndi jam Yésu a nkal bo nano li nhôla bo i hémle le a yé toi i niñ.

Yésu a nkal bo le Djob a nti nye kunde yosôna i ngii ni isi. A nkônde le: “Jon kena, ni yilha bôt ba biloñ gwobisôna banigil, ni sôblege bo i jôl li Tata, ni li Man, ni li mbuu mpubi, ni niigaga bo i nôgôl mam momasôna me bi ti bé oda le ni boñ.” (Matéô 28:18-20) Ñ, Yésu a yé i niñ, a gwé ki ngôñ le ñañ nlam u añlana.

Banigil ba Yésu bobasôna, bôlôm, bôda ni boñge ba nlama yônôs nlélém nson i yilha bôt banigil. Baoo bap ba ga noode tuga bo i téé likalô, ni i niiga bôt, ndi Yésu a nkal bo le: “Me nkôhna kunde yosôna i ngii ni isi.” Kii hala a nkobla inyu banigil bé? A nkal bo le: “Me yé ni bé dilo tjodisôna letee ni mamélél ma hiai hini.” Yésu a ta bé kal le ba bobasôna ba ga añal ñañ nlam ba ga la boñ bihélha bi mam. Ndi, bobasôna ba ga kôhna mahôla ma mbuu mpubi.

Mu “môm ma-na ma dilo” i mbus bitugne gwé, Yésu a mpémél banigil bé. A yoñok nyuu i bôt ba binam, ‘a pémlak bo ngandak ngélé, inyu boñ le ba yi ibabé pééna le a yé toi i niñ,’ a niigaga bo mam “inyu Ane Nyambe.”​—Minson mi baôma 1:3; 1 Korintô 15:7.

Bebek kiki baôma ba ngi yii i Galiléa, Yésu a mbat bo le ba témb i Yérusalem. Ngéda a mboma bo mu tison, a nkal bo le: “Ni nyodi bañ i Yérusalem, ndi ni kônde bem jam Tata a bi bôn, li ni bi nôgôl i meeni; inyule ni maliga, Yôhanes a bi sôble ni malép; ndi mbus ndék dilo, n’a sôblana ni mbuu mpubi.”​—Minson mi baôma 1:4, 5.

I mbus ngéda, Yésu a ntémb a bomna ni baôma bé. A nkena “bo letee ni Bétania,” i pes likôl i masuhul ma Hikôa Ôlivé. (Lukas 24:50) To hala kiki Yésu a bi bôk a pôdôl bo inyu maké mé, ba ngi hoñlak le, Ane i ga ba hana isi.​—Lukas 22:16, 18, 30; Yôhanes 14:2, 3.

Baôma ba mbat Yésu le: “A Nwet, baa munu ngéda ini nyen u ntimbhene Israel ane?” A nkal ndik bo le: “Ni gwé bé le ni yi mangéda to bikék Tata a bi bii isi énél yé nyemede.” Mu kiki a ngi yigyege nson ba nlama gwel, Yésu a nkal bo le: “N’a kôhna ngui ngéda mbuu mpubi w’a lo i ngii nan, ha nyen n’a ba mbôgi yem i Yérusalem, i Yudéa yosôna ni i Samaria, letee ni masuk ma hisi.”​—Minson mi baôma 1:6-8.

Baôma ba yé i ngii Hikôa Ôlivé ni Yésu ngéda a mbôdôl bet i ngii. Nano, ond i mboñ le ba nla ha bé tehe nye. I mbus bitugne gwé, Yésu a bi yoñ ngandak nyuu minsôn. Ndi lisañ lini, Yésu a ntjôô nyuu yé minsôn, inyu ke i ngii kiki hégél i mbuu. (1 Korintô 15:44, 50; 1 Pétrô 3:18) Mu kiki baôma ba ñôm mis i ngii, “bôt iba ba hééba bipuba bi mambot” ba ntelep bo ipañ. Biañgel bi, bi nyoñ nyuu minsôn, bi mbat bo le: “A bôt ba Galiléa, inyuki ni nkida ni mbéñge ngii? I Yésu nunu Nyambe a nyoñ i ngii, a yék bé, kiki ni ntehe nye a nke i ngii, hala ki nyen a ntémb a lo.”​—Minson mi baôma 1:10, 11.

Ngéda Yésu a bi nyodi munu isi, ngandak bôt i bé bé inyu leñ diléla, ndik banigil bé bon ba bé mbôgi. “Hala ki nyen a ntémb a lo,” ibabé le bôt bobasôna ba yi. Ndik banigil bé bon ba ga yimbe le a mbôdôl ane kiki Kiñe.

Baôma ba ntémb i Yérusalem. Mu dilo di noñ, ba nkodba ni banigil bape, yak “Maria nyañ Yésu, ni lôknyañ” ba yé mu. (Minson mi baôma 1:14) Ba nke ni bisu i téñbe ni masoohe. Jam jada ba nsoohene li yé i pohol nnigil nu a nlama yiha Yuda Iskariôt kayéle nsoñgi u baôma u témb 12. (Matéô 19:28) Ba gwé ngôñ ni nnigil nu a bi ba mbôgi ni minson mi Yésu, ni bitugne gwé. Hala a yé ngélé i nsôk le Bibel i mpôdôl bôt ba leñ mbam inyu yi sômbôl Djob. (Tjémbi 109:8; Bingéngén 16:33) Matias nu a bé wada mu 70 ma banigil, ba Yésu a bi om i téé likalô a mpohlana inyu “kôndba i nsoñgi u jôm li baôma ni wada.”​—Minson mi baôma 1:26.

Jôm li dilo i mbus le Yésu a mbet i ngii, Lôk Yuda i ntégbaha ngand i Pentékôt i nwii 33 N.Y. Bebee le 120 banigil i nkodba i tuñ ngii i Yérusalem. I bitéé bilôñi, liyôgbe li li yé kiki mbambat li nyon i ndap yosôna. Dilémb di pôn-ga hié di mbedep i ngii hi wada. Banigil bobasôna ba mbôdôl pot dilémb dipe. Yésu a nti bo mbuu mpubi a bi bôn!​—Yôhanes 14:26.