A boñge ba wanda​—Lelaa ni nla kôôba inyu sôble?

1, 2. (a) Toñol inyuki sôble i yé jam li nlôôha ba nseñ. (b) Mut a nyéñ sôblana a nlama ndugi ba nkwoog nkaa ni kii? Inyuki?

BAA u yé mañge wanda nu a gwé ngôñ i kôs sôble? Ibale ñ, hala a yé lipém likeñi u ma bé bana. Kiki di ntehe i yigil bisu, sôble i yé makidik ma nlôôha ba nseñ. Hala ñunda bôt bape le u nti wemede nkikip yak Yéhôva, hala wee u mbôn nye le u ga gwélél nye i boga ni boga, ni le sômbôl yé yon i yé jam li bisu i niñ yoñ. Inyule nya mbônga u u gwé mahee ngandak i mis ma Djob, u nlama ndik sôblana ngéda u yé nhôôlak bañga bañga i pes mbuu, ngôñ i boñ hala i lôlak ki i ñem woñ, u nogok ki kii i ti wemede nkikip yak Djob i nkobla.

² Ndi i nla ba le u nôgda le u ta bé bebee inyu sôble. Tole u nôgda nga le u yé bebee, ndi bagwal boñ ba nhoñol le u nlama bem letee u kônde nañ, u tehe ki ngandak mam i niñ. Kii u nlama boñ? Hala a tômbôs bañ we. Mahéñha ni hala, gwélél ngéda ini inyu hol i pes mbuu kayéle u laa kôs sôble mbus ndék ngéda. Ni ma mahoñol i ño, u nla hek le w’a sal i dilo di nlo munu matode maa mana le: (1) Mam u nhémle, (2) maboñog moñ, ni (3) ngôñ yoñ i ti mayéga.

MAM U NHÉMLE

3, 4. Bimbe biniigana boñge ba wanda ba nla nigil mu ndémbél i Timôtéô?

³ Hoñol ki lelaa u nla timbhe mana mambadga: Inyuki me nhémle le Djob a yé? Inyuki me yé nkwoog nkaa le Bibel i nlôl ni Djob? Inyuki me nôgôl mambén ma Djob ilole me kôna maboñog mabe ma nkoñ isi? Mambadga mana ma nla hôla we i noñ maéba ma ñôma Paul mana le: “Wemede mede wan sômbôl Djob, i yi jam li yé loñge, ni li li nlémél nye, ni li li yôni.” (Rôma 12:2, MN) Inyuki u nlama boñ hala?

⁴ Ndémbél i Timôtéô i nla hôla we. A bé yi Bitilna loñge loñge inyule nyañ bo mbômbô yé ba bi gwélél Bitilna inyu niiga nye. Ndi Paul a bi kal Timôtéô le: “We téñbe yaga ni mam u bi nigil, ni ma ba bi kwés we nkaa le u hémle.” (2 Timôtéô 3:14, 15, MN) Bibuk bini le ‘i ba nkwoog nkaa’ bi nkobla le mut “a neebe, a nhémle ki le ngim jam li yé maliga.” Jon Timôtéô a bé lama ba nkwoog nkaa le maliga ma nlébna ikété Bitilna. A neebe mo, ha bé inyule nyañ bo mbômbô yé ba bi kal nye le a boñ hala, ndi inyule a bi sélés boña inyu nok mam a bi nigil, ma kwés ki nye nkaa.​—Añ Rôma 12:1.

5, 6 Inyuki i yé nseñ le u pala nigil i gwélél “mahoñol moñ” ngéda u ngi yii mañge wanda?

⁵ Mam ma yé lelaa i pes yoñ? Bebeg le u bi yi maliga ibôdôl behe. Ibale ñ, yéñ i yi manjom ma ntinde we i hémle biniigana u nkôs. Hala a ga hôla we i lédés hémle yoñ, ni i keñgle le ngui i bilôñ bibe, mahoñol ma nkoñ isi, ni minheña woñ wemede, ma tinde we i yoñ makidik mabe.

⁶ Ibale u nigil i gwélél “mahoñol moñ” ngéda u ngi yii mañge wanda, w’a la timbhe mambadga ma bisega gwoñ kiki bo: ‘Kii nkwés we nkaa le Djob a yé? Ibale Djob a ngwés bés, inyuki a neebe le mam mabe ma kwél bés? Lelaa hala a nla ba maliga le Djob a bi héga bé?’ Ngéda u yé nkôôbaga, mambagda mana ma ga lona bé pééna ikété ñem woñ, ndi ma ga tinde we i kônde nigil Bibel.

7-9. Toñol lelaa minkwel mi gwé ño le “Qu’enseigne réellement la Bible? (fiches d’étude),” mi mi mpam hiki ngéda i internet, mi nla hôla we i kwés wemede nkaa ni mam u nhémle.

⁷ I jôp sum sum ikété yigil i nla hôla we i timbhe mambadga, i mélés pééna yo ki yo, ni i ba nkwoog nkaa ni mam u nhémle. (Minson mi baôma 17:11) Di gwé ngandak bikaat bi nla hôla we i boñ hala. Ngandak i bi kôhna nseñ i nigil man kaat nunu ni hop pulasi le Cinq questions à se poser sur l’origine de la vie ni ini kaat le Y a-t-il un Créateur qui se soucie de vous? Ngandak boñge ba wanda ba ñôt nseñ i gwélél minkwel mi gwé ño ni hop pulasi le “Qu’enseigne réellement la Bible? (fiches d’étude),” mi mi mpam hiki ngéda i jw.org. U nla kôhna yo i si winda le LA BIBLE ET VOUS. Hiki ño nkwel mu gwigil bi bi mpam hiki ngéda i internet, hi yé nkôôbaga inyu hôla we i kwés wemede nkaa inyu ngim biniigana bi Bibel.

⁸ Kiki u yé nnigil Bibel, i nla ba le u nyi mandimbhe ma ngim mambadga ma ma nlébna mu gwigil bi. Ndi baa u yé nkwoog nkaa ni mandimbhe moñ? I gwigil bi, bi ga hôla we i hek pék inyu tibil nok ngandak bipes bi Bibel, ni i ti we makénd i tila manjom ma ma ntinde we i hémle biniigana bi. Hala a ga hôla we i yi lelaa u nla toñle gwo bôt bape. Ibale u mbéna jôp i internet inyu añ gwigil bini le “Qu’enseigne réellement la Bible? (fiches d’étude),” u nla gwélél yo ngéda u nigil Bibel wetama inyu kwés wemede nkaa ni mam u nhémle.

⁹ U nlama kwés wemede nkaa le maliga ma. Hala a ga hôla we i kôôba inyu kôs sôble. Mankéé nu muda wada nu a yé mañge wanda a nkal le: “Ilole me nyoñ makidik inyu kôs sôble, me bi nigil Bibel, me nôgda le me yé i maliga. Ni le hiki kel i ntagbe i nkônde kwés me nkaa le me yé toi i bañga base.”

MABOÑOG MOÑ

10. Inyuki di kôli bem le nsôblaga kristen u bana maboñog ma nkiha ni hémle yé?

¹⁰ Bibel i nkal le: “Hala ki nyen yak hémle ibale i gwé bé minson, wee yomede i yé woga.” (Yakôbô 2:17) Ibale u gwé hémle ikeñi, maboñog moñ ma ga unda hala. U ga bana maboñog Bibel i nsébél le “bihiumul bipubhaga” ni bihiumul bi ‘bi ñunda le di tiñi ni Djob.’​—Añ 2 Pétrô 3:11, MN.

11. Toñol bini bibañga le “bihiumul bi pubhaga.”

¹¹ Kii i yé “bihiumul bipubhaga”? Hala a nkobla le i bana maboñog malam. Kiki hihéga, hoñol ki i sôñ isamal ini i ntagbe. Ngéda u bi kôhna manoodana ma ma ntinde we i boñ jam libe, baa u bi tibil hek pék i yi bagal ipôla loñge ni béba? (Lôk Héber 5:14) Baa u nhoñol ngim mangéda ma tôbôtôbô het u bi yémbél manoodana ni ngui i bilôñ bibe? Baa u yé ndémbél ilam inyu bôt bape i suklu? Baa u ntéñbe ni Yéhôva to kii i mpam, tole u yé u noode kôna mawanda moñ ma suklu inyu boñ le ba nol bañ we? (1 Pétrô 4:3, 4) I yé maliga le mut to wada a ta bé peles. Ngim mangéda, yak bôt ba ngwélél Yéhôva behee ba nla wo nyuu, kayéle hala a lédél bo i tééne bôt bape likalô. Ndi i mut nu a nti nyemede nkikip yak Djob a mbép woo i tôl le a yé Mbôgi Yéhôva, a unda ki hala ni maboñog mé malam.

12. Sima ngim bihiumul bi bi ñunda le mut a tiñi ni Djob? Lelaa u nlama tehe bihiumul bi?

¹² Kii i yé bihiumul bi ‘bi ñunda le di tiñi ni Djob’? Bi yé mam u mboñ ikété ntôñ, kiki bo i ke makoda, ni téé likalô. Bi yé ki mam u mboñ wetama, ma bôt bape ba ntehe bé, kiki bo masoohe u nti Yéhôva, ni yigil yoñ i Bibel. I mut a nti nyemede nkikip yak Yéhôva a ga yoñ bé mam ma kiki mbegee i nyuu nye. Ndi, a ga bana minlélém mi mahoñol kiki Kiñe David nu a tila le: “A Nyambe wem, me nkon maséé i boñ sômbôl yoñ.”​—Tjémbi 40:9.

13, 14. Imbe sélél i nla hôla we i bana bihiumul bi bi ñunda le u tiñi ni Djob? Lelaa ngim boñge ba wanda ba bi kôhna nseñ ngéda ba bi gwélél i sélél i?

¹³ Inyu hôla we i tjek mam u nyéñ boñ i dilo di nlo, wan mambadga ma yé i mapep 308 ni 309 ma kaat ini ni hop i pulasi le Les jeunes s’interrogent. Réponses pratiques, Volume 2. Mu mapep ma, u nla tila mandimbhe moñ inyu mambadga kiki bo: “Baa me mbéna sima mam ma tôbôtôbô ngéda me nsoohe?” “Baa masoohe mem ma ñunda le me ngwés toi Yéhôva?” “Mambe mam u mbéna wan mu yigil yoñ i Bibel?” “Baa u yé u nke likalô yak ngéda bagwal boñ ba ta bé?” Mapep ma ma gwé yak bahoma u nla tila mam wemede u nyéñ boñ i dilo di nlo inyu kii mbéñge masoohe moñ, yigil yoñ i Bibel, ni likalô.

¹⁴ Ngandak boñge ba wanda ba ba nkôôba inyu sôble ba nléba le mana mapep ma yé sélél i i nlôôha ba nseñ. Sista yada nu a yé mañge wanda le Tilda, a nkal le: “Me bi gwélél mapep ma inyu tjek mam me nsômbôl boñ i dilo di nlo. Me nyônôs i mam ma, jada mbus jada, kayéle me bé bebee i sôblana i mbus ñwii wada.” Yak mankéé Patrik nu a yé mañge wanda, a bi yônôs nlélém ngôñ, a nkal le: “Me bé yi mam me gwé ngôñ i boñ, ndi ngéda me tila mo, hala a bi kônde tinde me i sal ni ngui inyu yônôs mo.”

15. Toñol inyuki wemede nyen u nlama yoñ makidik inyu ti wemede nkikip.

¹⁵ Mbadga yada mu mapep ma, i mbat le: “Baa w’a gwélél Yéhôva to ibale bagwal boñ, ni mawanda moñ ba nwaa gwélél nye?” Kiki u nti niñ yoñ yak Yéhôva, u kôs ki sôble, wemede w’a bana maada ma tôbôtôbô ni Yéhôva. Jon bagwal boñ, to mut numpe nye ki nye, bé bon ba nlama kit mam u nlama boñ inyu Yéhôva. Bihiumul gwoñ bipubhaga ni bihiumul gwoñ bi bi ñunda le u tiñi ni Djob bi ga yelel le u yé nkwoog nkaa le u yé toi i maliga, ni le u gwé toi ngôñ i noñ matiñ ma Djob. Mbus ndék ngéda, w’a ba bebee i sôblana.

NGÔÑ YOÑ I TI MAYÉGA

16, 17. (a) Kii i nlama tinde mut i yila kristen? (b) Himbe hihéga u nla ti inyu toñol ngôñ i ti Yéhôva mayéga?

¹⁶ Kel yada, mut wada nu a bé yi Mbén Môsé loñge loñge, a bat Yésu le: “A Lét limbe litiñ li nloo ikété Mbén? Yésu a bi timbhe nye le: “U gwéhék Nwet le Nyambe woñ ni ñem woñ wonsôna, ni nom yoñ yosôna, ni mahoñol moñ momasôna.” (Matéô 22:35-37) Yésu a bi toñol le gwéha mut a gwé inyu Yéhôva, yon i nlama ba njom i ntinde nye i kôs sôble inyu yila kristen. Njel yada i i nlôôha ba loñge inyu lédés gwéha yoñ inyu Yéhôva, i yé le u tibil hoñol nseñ u binoñ, inyule bi yé likébla likeñi kiyaga Djob a ti bôt ba binam. (Añ 2 Korintô 5:14, 15; 1 Yôhanes 4:9, 19.) Ngéda u mboñ hala, hala a ga tinde we i bana ngôñ i ti mayéga inyu lini likébla li tôbôtôbô le binoñ.

¹⁷ Lana nyen di nla toñol mayéga u nti inyu binoñ: Hégda le u yé i yin, ndi mut a péyés we. Baa w’a begel ndik makôô moñ, u kahal ke i mbai yoñ, u sahba, u hôya i jam mut nu a mboñ inyu yoñ? Heni! U ga bana ngôñ i ti mut a bi péyés we mayéga hiki ngéda! Nlélém jam inyu yés, di nlama ti Yéhova bo Yésu mayéga makeñi inyu binoñ. Di gwéne bo mapil ma biniñ gwés! Ba bi péyés bés i mok mi béba ni nyemb. Inyu gwéha yap inyu yés nyen nano, di nla bana botñem i niñ boga ikété Paradis!

18, 19. (a) Inyuki u nlama bé kon woñi i ba nu Yéhôva? (b) Lelaa i gwélél Yéhôva li nlémés niñ yoñ?

¹⁸ Baa u nti Yéhôva mayéga inyu yom a bi boñ inyu yoñ? Ibale ñ, wee hala a yé loñge jam le u ti wemede nkikip yak Yéhôva ni le u kôs sôble. I ti wemede nkikip i yé likak u nti Djob le u ga boñ ndigi sômbôl yé i boga ni boga. Baa u nlama kon woñi i boñ nya mbônga u? To! Yéhôva a nyéñ ndigi loñge yoñ, a ga sayap ki bôt ba mboñ sômbôl yé. (Lôk Héber 11:6) Ngéda u nti niñ yoñ nkikip yak Djob ndi u kôs ki sôble, ilole niñ yoñ i bep, y’a ke ndik ni bisu i lama! Mankéé nu munlôm nu a gwé 24 ñwii, ni nu a bi sôblana nye mañge wanda a nkal le: “Ibale me kônde nañ ha ngéda i, iloo me nkôs sôble, ki bebeg me bi nok maliga loñge. Ndi kiki me bi yoñ makidik i ti memede nkikip yak Yéhôva, hala a bi tohol me le me noñ bañ mam ma nkoñ isi.”

¹⁹ Yéhôva a nyéñ ndigi loñge yoñ. Ndi mahéñha ni hala, Satan a ntôñ bé ni we, ndik ni nyemede. Ibale u mpohol i noñ nye, yi le a nla bé bôñôl we jam lilam jo ki jo. Lelaa a yé le a ti we i yom nyemede a gwé bé? A gwé bé ñañ nlam wo ki wo, to botñem yo ki yo. A nla ndik ti we bilôl bibe inyule gwon bi mbem nye!​—Masoola 20:10.

20. Kii mañge wanda a nla boñ inyu hol i pes mbuu, ikepam likala li ba bebee i ti nyemede nkikip ni i kôs sôble? (Béñge ki nkéñék matila le “Inyu hôla we i hol i pes mbuu.”)

²⁰ Ibale u nti wemede nkikip yak Yéhôva, makidik mape ma ma nlel ma, ma ta bé. Baa u yé bebee i yoñ mo? Ibale ñ, u kon bañ woñi i ti Yéhova i mbônga u. Ndi ibale u nôgda le u ta bé bebee, gwélél maéba ma ntiba munu yigil ini inyu kônde ke ni bisu i hol i pes mbuu. Paul a kal lôk kéé i Filipi le ba kena mahol map ni bisu. (Filipi 3:16) Ibale u noñ maéba ma, yak we w’a bana ngôñ i ti niñ yoñ nkikip yak Yéhôva, ni i kôs sôble.