Majubul

1, 2. (a) Lelaa ngwélél makiiña wada a bé tehe bôt ba hémle ba Bibel? (b) Inyuki bana bôt ba nla ba bés biloñge bi mawanda?

“A MPÔDÔL bôt ba yé ikété miñañ mi Bibel wengoñle ba yé nye minlômbi mi mawanda.” Hala nyen mankéé nu muda wada a bi pot ngéda a bi mal emble nkwel u mañ wada, u u bé ngwélél makiiña. Hala a bé maliga, inyule i mankéé nu a bi tégbaha môm ma ñwii i nigil, ni niiga bôt bape Bibel, kayéle bôlôm ni bôda ba hémle Bibel i mpôdôl, ba yila kiki mawanda le a bi yi niñ yé yosôna.

² Baa hala a’ ba loñge jam ibale bôt Bibel i mpôdôl ba nyila mawanda més? Baa ba yé toi ntiik i mis moñ? Hoñol ki mam malam ba nla tinde we i boñ i niñ yoñ. Hégda maséé u nla bana i kiha ni bo, i pot ni bo, ni tégbaha ngéda inyu yi bôt kiki bo Nôa, Abraham, Ruth, Élia, ni Ester. Hoñol lelaa ndémbél yap i nla héñha niñ yoñ. Hégda maéba malam ni makénd ba nla ti we!​—Añ Bingéngén 13:20.

3. (a) Lelaa di nla kôs bisai ibale di nigil i yi bôlôm ni bôda ba hémle ba ba yé ikété Bibel?(b) Mambe mambagda di ga wan?

³ I yé maliga le i ‘bitugne bi ba ba téé sép,’ di ga bana nya maada i lôñni bo. (Minson mi baôma 24:15) Ndi yak i len ini, di nla kôhna bisai ibale di nigil i yi bôlôm ni bôda ba hémle ba ba yé ikété Bibel. Lelaa? Ñôma Paul a nti loñge ndimbhe: “Ni kôna bakôdôlbum i nlôl makak inyu hémle ni nihbe.” (Lôk Héber 6:12) Ilole di mbôdôl nigil miñañ mi bôlôm ni bôda ba hémle, di timbhe ndugi ndék mambadga i mpémél mu bibuk bi Paul: Kii i yé hémle? Inyuki di gwé ngôñ ni yo? Lelaa di nla kôna bôt ba hémle ba ngéda kôba?

Kii i yé hémle, inyuki di gwé ngôñ ni yo?

4. (a) Lelaa bôt ba mbéna toñol hémle? (b) Inyuki ba nhôs?

⁴ Hémle i yé lem lam. I bôlôm ni bôda bobasôna di ga pôdôl munu kaat ini, ba bé diihe i lem i ngandak. Ngandak bôt i len ini i nyi bé kii i yé hémle, ba nhoñol le hémle i yé i neebe to kii, ibabé i bana jam li nkwés bo nkaa le maliga ma. Ndi ba nhôs. Bañga hémle i ta bé i neebe to kii, i ta bé to mahoñol tole mam mut a nôgda i ñém wé. I neebe to kii, ibabé wan, i yé béba ngandak. U nla nôgda jam hanano, ndi yani u nôgda ha bé jo. Jon, i hémle le Djob a yé, i kôli bé inyule yak “mimbuu mimbe mi nhémle hala, mi sehlaga ki.”​—Yakôbô 2:19.

5, 6. (a) Mut hémle a mbok mis i ngii mintén mi mam ima. Mimbe? (b) Limbe lipigil hémle yés i nlama bana? Ti hihéga.

⁵ Bañga hémle i nloo mana mam momasôna. Bigda lelaa Bibel i ntoñol hémle. (Añ Lôk Héber 11:1.) Paul a nkal le mut hémle a mbok mis mé i ngii mintén mi mam ima di nla bé tehe. Pog, a mbok mis i ngii mam ma ma yé nano, to hala kii “ma nene bé.” Mis més ma nla bé tehe i mam ma gwé libak li mbuu, hala wee ma nla bé tehe Yéhôva Djob, Man wé tole Ane i i ñénél nyoo i ngii i len ini. Iba, mut hémle a mbok mis i ngii mam “a mbôdôl ñem,” hala wee mam ma ma yé ngi yon. I len ini, di nla bé tehe mbok yondo Ane Djob i ga lona ndék ngéda. Ndi baa hala a nkobla le hémle yés inyu mam ma, ni inyu mam di mbem inyu dilo di nlo, i yé yañga?

⁶ Heni! Paul a bi toñol le lipigil li hémle yés li gwé ngui. Inyu toñol le i bana hémle i yé i ba nkwoog nkaa ni ngim jam, ñôma Paul a ngwélél bibuk bi bi nla ki kobla le “lipep li hisi.” Hégda le mut a nkit le a nti we ndap. A nla unda we lipep li hisi, i mbus, a kal we le: “Ndap yoñ ini.” Hala a nkobla bé le lipep li jon li yé ndap yoñ, ndi kiki ngomin a mal sane lipep li, i bana jo i moo li yé nlélém kiki i bana ndap yomede. Nlélém jam won u yé ni hémle. Di nlôôha ba nkwoog nkaa ni mam di nhémle kayéle inyu yés, ma yé wengoñle ma mal yon.

7. Inyu bana bañga hémle, kii i mbéda?

⁷ Jon bañga hémle i mbat le mut a bana botñem i umi siñ, a bok ki mis mé yak Yéhôva Djob ibabé piñgla. Hémle i ntinde bés i tehe Yéhôva kiki Isañ wés nu gwéha, di bak ki nkwoog nkaa le a ga yônôs mimbônga nwé nwominsôna. Ndi bañga hémle i mbat iloo ha. Kiki mut a gwé ngôñ ni bijek inyu niñ, hala nyen hémle i nlama kôhna bijek bi mbuu inyu ba yômi. Hémle yés i nlama nene mu minson nwés, tiga le i wo.​—Yakôbô 2:26.

8. Inyuki hémle i nlôôha ba nseñ?

⁸ Inyuki hémle i nlôôha ba nseñ? Ndimbhe i Paul i gwé ngui. (Añ Lôk Héber 11:6.) Di nla bé kôôge Yéhôva bebee, to lémél nye ibale di gwé bé hémle. Jon hémle i yé mahee ngandak, ibale di nyéñ yônôs jam li nlôôha nseñ inyu hiki mut binam: I kôôge bebee ni Isañ wés nu ngii le Yéhôva ni i ti nye lipém.

9. Kii i nyis bés le Yéhôva a nyi le di gwé ngôñ ni hémle?

⁹ Yéhôva a nyi le di nlôôha bana ngôñ ni hémle, jon a nti bés ndémbél i ngandak bôt inyu niiga bés lelaa di nla boñ inyu bana ni unda hémle. A nsayap ntôñ u bikristen inyule a nti wo bôt ba hémle inyu éga wo ni ti ndémbél ilam. Bañga yé i nkal le: “Ni kôna hémle yap.” (Lôk Héber 13:7) Ndi, a nti bés iloo ha. Paul a bi tila inyu “limut li mbôgi” likeñi, hala wee bôlôm ni bôda ba kôba, ba ba bi yigle bés loñge ndémbél i hémle (Lôk Héber 12:1) Bôt ba hémle bape ba ta bé ikété ñañga Paul a nti i kaat Rôma pes 11. Bibel i yé nyonok ni ngandak miñañ mi maliga, mi mi ntoñol niñ i bôlôm ni bôda, boñge ni mimañ mi bôt, ba ba bééna bé binéñél gwada, ndi ba bééna niñ i hémle, kayéle di nla ôt biniigana mu, inyule di niñil i mangéda mabe, het bôt ba nhañba hémle.

Lelaa di nla kôna hémle i bôt bape?

10. Lelaa yigil yés i Bibel i nla hôla bés i kôna ndémbél i bôlôm ni bôda ba hémle ba Bibel?

¹⁰ U nla bé kôna mut ibale u nyi bé nye loñge. Kiki w’a nigil i kaat ini, w’a léba le di bi boñ ngandak nyiña inyu hôla we i tibil yi bana bôlôm ni bôda ba hémle. U nla yoñ ngéda i kônde wan Bitilna inyu kôhna biniigana bipe. I ngéda u gwé yigil yoñ i Bibel, yoñ ngéda i tibil tém ni bisélél gwobisôna bi nla hôla we. Kiki u nhek pék mu mam u nigil, noode le hégda hee ba bi niñ, imbe ngéda ba bé niñil. Noode ki hégda kii i bé tagbe nyoo, emble makiñ, nok manjiñ. Hoñol ki i mam ba bé le ba nôgda ikété miñem nwap. I ngéda di noode nôgda mam kiki bo, ba ga yila ntiik i mis més, di tibil ki yi bo. Bape ba nla yak yila mawanda més ma ñem nyuu.

11, 12. (a) Lelaa u nla nôgda kiki Abraham bo Sara? (b) Lelaa ndémbél i Hana, Élia ni Samuel i nla lona we bisai?

¹¹ Ngéda w’a tibil toi yi bo, w’a bana ngôñ i kôna bo. Kii héga, hégda le ba nti we nson u mondo. Ntôñ u Yéhôva u naña we i kéñbaha nson woñ. Bebeg le ba mbat we le u ke i homa nu a gwé ngôñ ni ngandak batéé likalô, tole ba nkal we le u gwélél likeñge lipe inyu téé likalô, likeñge le u meya bé u ngwélél. Ngéda u yé hek pék ikété masoohe inyu nson u, baa u nhoñol le i soñda ndémbél i Abraham i nla hôla we? Nye ni Sara ba bé bebee i tjôô niñ i mbomboo i tison i Ur. Hala a bi lona bo ngandak bisai. Ngéda w’a odop mu mabal map, ha nyen w’a nôgda le u nyi toi bo nano iloo kiki ngéda bisu.

¹² Di yoñ hihéga hipe. Ibale liwanda joñ li nyan we, kayéle u nimis makénd moñ, u kahal yak hoñol le i yé nseñ le u bôdôl tôl makoda, baa w’a boñ lelaa? Ibale u wan ndémbél i Hana, u hoñol lelaa a bi yémbél diyana di Pénina, hala a ga hôla we i yoñ makidik malam. W’a nôgda ki le Hana a yé toi we bañga liwanda. Ndi ibale u nimis makénd moñ inyule u nhoñol le u gwé bé nseñ wo ki wo, bebeg u ga nôgda le ndémbél i Élia i nkiha ni we. Nigil ndutu yé, u tehe ki lelaa Yéhôva a bi ti nye hogbe. Yak boñge ba wanda ba ba njo inyu yémbél ngui i bilôñ bibe i suklu, ba nla yoñ Samuel kiki liwanda jap, ngéda ba ntehe lelaa a bi yémbél ngok bageene bon ba Éli ba bé inyu yé.

13. Ibale u nkôna ndémbél i hémle i bôt Bibel i mpôdôl, baa hala a nkobla le hémle yoñ wemede i gwé bé mahee i mis ma Yéhôva? Toñol.

¹³ Ibale u nkôna ndémbél i hémle i bôt Bibel i mpôdôl, baa hala a ñunda le hémle yoñ wemede i gwé bé mahee i bisu bi Yéhôva? Heni! U hôiga bañ le Bañga i Yéhôva i nti bés makénd i kôna bôt ba hémle. (1 Korintô 4:16; 11:1; 2 Tésalônika 3:7, 9) U héya hala, bahogi ikété bôt di ga pôdôl, bomede ba bé kôna bôt ba hémle bape, ba ba bi bôk bo bisu. Kiki hihéga, w’a yimbe ikété pes 17 munu i kaat ini, le Maria a bi gwélél bibuk Hana a bi bôk a gwélél. Hala a ñunda le a bé kôna nye. Baa hala a nkobla le hémle i Maria i bééna bé ngui? Balôñe! Ndi ndémbél i Hana i bi hôla Maria i bana hémle i ngui, kayéle yak nye a bana maada ma tôbôtôbô ni Yéhôva Djob.

14, 15. (a) Mambe mam ma tôbôtôbô ma yé munu kaat ini? (b) Lelaa u nla tibil gwélél yo?

¹⁴ Ini kaat i ntilbana inyu hôla we i lédés hémle yoñ. Inyu tila i kaat ini, di nkot minkwel mi gwé ño le “Imitez leur foi,” mi mi bi pam i Nkum Ntat ni hop Pulasi, ipôla ñwii 2008 ni 2013. Ndi di nkônde mam mape mu. Ini kaat i gwé mambadga u nla gwélél inyu yigil ni inyu ôt biniigana i niñ yoñ. Di nkônde yak ngandak bititii bilam. Di nlémés, di kéñbaha ki minlômbi mi bititii. Ntende u yé munu inyu unda we i ngéda mam ma bi tagbe, yak bititii inyu unda we i bahoma het mam ma bi tagbe. U nla gwélél kaat ini le Ni kôna hémle yap i yigil yoñ Bibel wetama, i yigil i lihaa joñ, tole i likoda. Ngandak mahaa i nla ki kon maséé i añ ini kaat ntôñ.

¹⁵ Di ngwés le i kaat ini i hôla we i kôna hémle i bagwélél ba Yéhôva ba ngéda kôba. Di nsoohe ki le i hôla we i lédés hémle yoñ kiki u mboñ biliya i kôôge bebee ni Isañ woñ nu ngii le Yéhôva!