Lelaa di nla sangal mindañ ikété mam ma moni?

I kaat 1 Korintô 6:1-8, ñôma Paul a mpôdôl minkaa ipôla bikristen. A bi kal le, a bééna wonyu ngéda ngim bikristen i tison i Korintô bi bé “kandal nyuu le ba nlama kaa bisu bi ba ba téé bé sép.” (Nlôñ 1) Paul a bi ti bañga manjom inyuki bikristen bi nlama bé kena lôktata yap i bikééhene bi ngomén, ndi ba nlama sangal mindañ i bisu bi mimañ mi likoda. Di béñge inyuki Paul a bi ti mana maéba ma Bibel, mbus di mpôdôl ngim mam i i nkiha bé ni maéba mana.

Ibale di gwé mindañ inyu mam ma moni ni kristen ipe, di nlama ndugi yéñ i boñ mam inoñnaga ni sômbôl i Yéhôva, ha sômbôl yés bé. (Bingéngén 14:12) Kiki Yésu a niiga, i yé loñge i sangal mindañ bihôô bihôô ilole mi nkeñep inyu yila yom ipe. (Matéô 5:23-26) Ndi hala a yé ngoo le ngim bikristen i nlôôha gwés mindañ, ba ken-ga yak lôktata yap i bisu bi ngomén. Paul a kal le: “Lakii ni gwé minkaa bé ni bé, wee hala a yé bañga bikwo ikété nan.” Inyuki Paul a nkal hala? Inyule nya maboñog i i nhoo jôl li Djob di mbégés ni li likoda jé mahindi. Jon di ndiihe mbadga ini Paul a mbat le: “Inyuki ni nhônba bé mam ma téé bé sép bôt ba mboñ bé?”​—Nlôñ 7.

Paul a bi toñol ki le Djob a bi ti likoda bitelbene bilam inyu bagal minkaa. Mimañ mi yé minhôôlak mi bôlôm, mi biniigana bi Bibel bi nyilha bôt ba pék. Paul a nkal le ba kôli bagal minkaa ipôla lôktata “inyu mam ma nom ini.” (Minlôñ 3-5) Yésu a bi niiga le miñdañ mi mi nlôl ni bibéba bikeñi, kiki bo liôbôs jôl li mut tole dipôha, mi nlama sanglana inoñnaga ni njel maboñ maa: (1) i bôt ba gwé mindañ ba nlama noode ndugi sangla bo ni bo; (2) ibale ba nla bé nôgla, ba nlama sébél mbôgi yada tole iba; (3) ibale liboñ li nyônôs iba li nla bé sangal bo, ba nlama kena ndañ wap i bisu bi likoda, hala wee i bisu bi mimañ.​—Matéô 18:15-17.

I yé maliga le mimañ mi likoda mi ta bé biloya tole bayi mam ma moni, bôlô yap i mañ i mbat bé to le ba ba mintén mi bôt mi. Bo bé bon ba nlama kal lôktata lelaa ba nlama nôgla inyu sangal ndañ wap u moni. Ndi, ba nyéñ hôla bet ba gwé mindañ le ba noñ matiñ ma Bibel, ba sangal ki ndañ wap ikété nsañ. Ngéda ndañ u yé ndutu ngandak i sangal, ba nla bat mahôla yak ngwélél makiiña tole i hikuu hi loñ. Ndi, ngim mindañ mimpe mi nkiha bé ni maéba ma Paul. Mimbe mi mindañ?

Ngim mangéda, nkaa i bisu bi ngomén u nla ba ndigi le di yônôs ngim mapep tole ngim matéak ma ngomén ikété nsañ ni nduña i bôt bape. Kiki hihéga, nkaa i bisu bi ngomén u nla ba mpom njel inyu kôs kaat mabos, inyu kôs kunde i tééda bon, inyu kôs ngaba bijek i nlôl yak sobiina woñ, inyu boñ le i ndap mut a ntéédana moni inyu dilo dibe i ti nye mahôla ibale kuu i nkwo, inyu ba ikété ñañga u bôt ba ba kôli témbna moni nwap ngéda ndap bôlô i nkwés makôga, ni inyu band lilagle i bisu bi ngomén. Ngim minkaa mimpe mi yé le kristen i nla nôgda le a yé nyéksaga i ke i ngomén inyu sôñ nyemede inyule kristen ipe i mbôk i soman nye.a

Ibale i nya minkaa i bisu bi ngomén mi mbôña bé ndigi inyu boñ mindañ, bebeg hala a mbôk bé matiñ Paul a bi ti.b Ndi to hala, jam li bisu inyu kristen li nlama ba le jôl li Djob li tééba lipubi ni le nsañ ni adna bi ba ikété likoda. Banigil ba Kristô ba nyiba ndugi inyu gwéha ba gwé bo ni bo, ni le “gwéha i nyiñil bé ndigi yomede” loñge.​—1 Korintô 13:4, 5; Yôhanes 13:34, 35.