Mambadga ma basoñgol

Inyuki miñañ mi Matéô bo Lukas inyu bibôdle bi niñ i Yésu bi yé maselna?

Ñañ u Matéô inyu mam ma bi bôña i bibôdle bi niñ i Yésu u gwé ngim maselna ni ñañ u Lukas inyule batila ba bikaat bi, ba bi añal mam, hiki mut ni litehge jé.

Ñañ u Matéô u nlôôha pôdôl niñ i Yôsep. I mpôdôl ki jam Yôsep a boñ ngéda a bi yi le Maria a yé jém, eem yé i het añgel i toñle nye hee jém li nlôl, ni le a bi neebe ndoñi yé. (Matéô 1:19-25) Matéô a nke ni bisu i añle bés le, añgel i kal Yôsep ikété eem le a ke ngwéé i Égiptô, a añle ki bés liké jé ni lihaa jé, ni eem i Yôsep het añgel i nkal nye le a témb i Israel, a mpôdôl ki bés lelaa ba bi huu, ni makidik mé i yis lihaa jé i Nazarét. (Matéô 2:13, 14, 19-23) I bibôdle bi kaat Matéô, ba nsima jôl li Yôsep ngélé juem, ndi li Maria ngélé ina ndigi.

Ndi, ñañ Lukas u nlôôha pôdôl Maria. U ntoñle bés lelaa añgel Gabriel i bi yuuga Maria, kiki Maria a bi ke yuuga mut wé lihaa le Elisabet, ni bibuk Maria a gwélél inyu ti Yéhôva bibégés. (Lukas 1:26-56) Lukas a mpôdôl ki bibuk Siméôn a gwélél inyu añle Maria mandutu Yésu a bé lama boma. Yak ñañ u lihaa li Maria ngéda li bé i témpel Yésu a ban-ga 12 nwii, Lukas a nsima bibañga bi Maria, ha bi Yôsep bé. Lukas a nkônde le, mam ma, ma bé tihba Maria ngandak. (Lukas 2:19, 34, 35, 48, 51) Ikété bipes biba bi bisu bi kaat Lukas, ba nsima jôl li Maria mu 12 ngélé, ndi li Yôsep ndigi ngélé 3. Jon, di ntehe le Matéô a nlôôha pôdôl maboñok ma Yôsep, ni mam ma bé tihba nye, ki le Lukas a ntoñol ngandak mam ma bé lama yônôl Maria, ni ma ma bi pémél nye.

Maselna ma yé yak ipôla kaat lihaa Matéô a nti ni i Lukas. Matéô, nye a nlôôha pôdôl basôgôlsôgôl ba Yôsep, a ébga ki le Yésu nu Yôsep a bi néñés, a bé toi nkôdôl bum i Kiñe David kingéda mbén. Inyuki? Inyule Yôsep a bé mut wada mu mbôda i Kiñe David ni njel man wé Salômô. (Matéô 1:6, 16) Ndi Lukas, i yé pes, a nlôôha pôdôl basôgôlsôgôl ba Maria, a ébga le Yésu a bé nkôdôl bum i Kiñe David “kingéda minsôn.” (Rôma 1:3) Inyuki? Inyule Maria a bé muda wada mu mbôô i Kiñe David ni njel man wé wada le Natan. (Lukas 3:31) Ndi inyuki Lukas a nsima bé Maria kiki man Eli mu kaat lihaa jé? Inyule ba bééna lem i sima ndik môl ma bôlôm mu bikaat bi mahaa. Jon, ngéda Lukas a nsima Yôsep kiki man Eli, hala a bé kobla le Yôsep a bé nkil Eli.​—Lukas 3:23.

Bikaat bi lihaa li Yésu, bi Matéô bo Lukas ba nti, bi ñunda toi le Yésu a bé Mésia ba bi bôk ba pôdôl. Maliga, kaat lihaa i Yésu i bé yiba loñge loñge kayéle yak lôk Farisai ni Sadukai ba pééna bé yo kekikel. I len ini, bikaat bi lihaa bi Matéô bo Lukas bi ngi yii hikuu hi hémle yés, bi mbok ki mbôgi le mimbônga mi Djob mi mi ngi yii, mi ga yon toi.