Baa me nlama ti niñ yem nkikip yak Yéhôva ni kôs ki sôble?

1. Kii u nla badba mu kii u ntibil nigil kaat ini?

IKÉTÉ yigil yoñ munu kaat ini, u nigil ngandak maliga ma ma nlôl ikété Bibel, kiki bo mbônga u Djob u niñ boga, libak li bawoga, ni botñem i bitugne. (Ñañal 9:5; Lukas 23:43; Yôhanes 5:28, 29; Masoola 21:3, 4) Bebeg le u bi bôdôl ke i makoda ma Mbôgi Yéhôva, u hémle ki le ba mbégés toi Djob ni maliga. (Yôhanes 13:35) Bebeg le maada moñ ni Yéhôva ma bi bôdôl yila bas bas, yak we u yoñ makidik le u nsômbôl gwélél nye. Jon u yé le u badba le, ‘Kii me nlama boñ nano inyu gwélél Djob?’

2. Inyuki mut Étiôpia wada a bééna ngôñ i kôs sôble?

² Hala nyen mut Étiôpia nu a bé niñil ngéda Yésu a bé hoñol. Ndék ngéda mbus bitugne bi Yésu, nnigil nu Yésu le Filipô a bi añle mut Étiôpia wada ñañ nlam. Filipô a bi unda nye le Yésu a yé Mésia. Jam mut Étiôpia nu a bi nigil, li bi lôôha tihba nye kayéle kunda yada a bat le: “Nun-ki, malép mana; kii i nkéñ me i sôblana?”​—Minson mi baôma 8:26-36.

3. (a) Imbe mbén Yésu a bi ti banigil bé? (b) Lelaa mut a nlama kôs sôble?

³ Bibel i ntibil niiga le ibale u ngwés gwélél Yéhôva, u nlama kôs sôble. Yésu a bi kal banigil bé le: “Kenana, yilhana biloñ gwobisôna banigil, ni sôblege bo.” (Matéô 28:19) Yésu a bi ti ki ndémbél ngéda a bi kôs sôble. Ba bi kôp ndik bé nye malép i ngii ño, ndi ba bi yube nyensôna ikété malép. (Matéô 3:16) I len ini, ngéda kristen i nkôs sôble, ba nlama yube, tole jubus nyensôna ikété malép.

4. Kii sôble yoñ i ñunda bôt bape?

⁴ Ngéda u nkôs sôble, hala a ñunda bôt bape le u nsômbôl toi ba liwanda li Djob, u nsômbôl ki gwélél nye. (Tjémbi 40:8, 9) U yé le u badba le, ‘Kii me nlama boñ inyu kôs sôble?’

YI NI HÉMLE

5. (a) Kii u nlama ndugi boñ ilole u nkôs sôble? (b) Inyuki makoda més ma bikristen ma yé nseñ?

⁵ Ilole u nkôs sôble, u nlama nigil i yi Yéhôva bo Yésu. U mbôdôl yaga boñ hala ni njel yigil yoñ i Bibel. (Añ Yôhanes 17:3.) Ndi hala a kôli bé. Bibel i nkal le u nlama “ba nyonok . . . ni bañga yi” i sômbôl i Yéhôva. (Kôlôsé 1:9) Makoda ma Mbôgi Yéhôva ma ga hôla we i bana maada malam ni Yéhôva. Hala a yé we loñge njom inyu ke mu makoda ma hiki ngéda.​—Lôk Héber 10:24, 25.

6. Baa u nlama yi biniigana bi Bibel gwobisôna ilole u nkôs sôble?

⁶ Maliga ma yé le, Yéhôva a mbem bé le u yi biniigana bi Bibel gwobisôna ilole u nkôs sôble. A bi bem bé le mut Étiôpia a yi hiki jam ilole a nkôs sôble. (Minson mi baôma 8:30, 31) Yi ki le di ga kônde nigil i yi Djob i boga ni boga. (Ñañal 3:11) Ndi inyu kôs sôble, u nlama yi ni neebe i bititigi gwobisôna biniigana bi bisu bi Bibel.​—Lôk Héber 5:12.

7. Lelaa yigil yoñ i Bibel i nhôla we?

⁷ Bibel i nkal le: “Ibabé hémle mut a ta yaga bé le a lémél nye.” (Lôk Héber 11:6) Jon u nlama bana hémle ilole u nkôs sôble. Bibel i nkal bés le ngim bôt ikété nlômbi tison u Korintô i bi nok mam banigil ba Yésu ba bi niiga, i mbus, hala a tinde bo le “ba hémle, ba sôblana.” (Minson mi baôma 18:8) Hala a yé nlélém jam inyu yoñ. Yigil i Bibel i nhôla we i bana hémle inyu mimbônga mi Djob, ni inyu ngui sesema i Yésu i gwé inyu tohol bés i minkôm mi béba ni nyemb.​—Yôsua 23:14; Minson mi baôma 4:12; 2 Timôtéô 3:16, 17.

AÑLE BÔT BAPE MALIGA MA BIBEL

8. Kii i ga tinde we i añle bôt bape mam u nigil?

⁸ Mu kii u nkena yigil yoñ i Bibel ni bisu, u tehge lelaa i nhôla we ikété niñ yoñ, hémle yoñ y’a kônde nañ. U ga bana ngôñ i añle bôt bape mam u yé nigil. (Yérémia 20:9; 2 Korintô 4:13) Ndi njee u nlama añle mam ma?

9, 10. (a) Njee u nla bôdôl añle mam u nigil? (b) Kii u nlama boñ ibale u nsômbôl téé likalô ni likoda?

⁹ Bebeg u ga gwés añle mawanda moñ, bôt boñ ba lihaa, bôt boñ ba libôk, ni mawanda moñ ma bôlô mam u yé nigil. Hala a yé loñge. Ndi hiki ngéda, boñ hala ni loñgeñem, yak ni gwéha. Bebeg, u ga ba bebee i bôdôl téé likalô ni likoda. Ngéda w’a nôgda le u yé bebee i boñ hala, u nla kwel ni Mbôgi Yéhôva i i niiga we Bibel, u kal nye le u nsômbôl yoñ ngaba i téé likalô ni likoda. Ibale nunu mankéé a nhoñol le u yé bebee i téé likalô, ni le u niñ inoñnaga ni biniigana bi Bibel, bé boba ni ga boma mimañ ima mi likoda.

¹⁰ Kii i ga tagbe mukété boma w’a bana lôñni mimañ? Mimañ mi ga kwel ni we inyu tehe ibale u nok biniigana bi bisu bi Bibel, ni ibale u nhémle gwo. Mi ga tehe ibale u nôgôl mam Bibel i nkal ikété niñ yoñ i hiki kel, ni ibale u nsômbôl toi yila Mbôgi Yéhôva. U hôiga bañ le mimañ mi ntôñ inyu bôt bobasôna ba ba yé ikété likoda. Hala a nkobla le ba ntôñ yak inyu yoñ, jon u kon bañ woñi i pôdôs bo. (Minson mi baôma 20:28; 1 Pétrô 5:2, 3) Mbus boma i, mimañ mi ga yis we ibale u nla bôdôl téé likalô ni likoda.

11. Inyuki i nlôôha ba nseñ le u héñha bilem gwoñ ilole u mbôdôl téé likalô ni likoda?

¹¹ Mimañ mi nla toñle we le u nlama kônde héñha bilem gwoñ ilole u mbôdôl téé likalô ni likoda. Inyuki i nlôôha ba nseñ le u boñ mahéñha ma? Inyule, ngéda di ñañle bôt bape mam inyu Djob, wee di yé pot i jôl li Yéhôva; jon di nlama niñ i nya i nti nye lipém.​—1 Korintô 6:9, 10; Galatia 5:19-21.

HIEL ÑEM, U HIELBA

12. Inyuki bôt bobasôna ba gwé le ba hiel miñem nwap?

¹² U nlama ki boñ jam lipe ilole u nkôs sôble. Ñôma Pétrô a bi kal le: “Bé hiela miñem, ni hielba ki, le bibéba binan bi séha.” (Minson mi baôma 3:19) I hielñem i nkobla le kii? I nkobla le di tibil yaga tam mam mabe momasôna di bé boñ. Kiki héga, ibale u niñik niñ i ndéñg, i ga sômbla we le u hiel ñem. To ibale u bi liya niñ yoñ yosô i niñ ikété telepsép, u gwé ki le u hiel ñem woñ, inyule bés bobasôna di mboñ béba, ni le di gwé ngôñ i bat Djob le a nwéhél bés.​—Rôma 3:23; 5:12.

13. I “hielba” i nkobla le kii?

¹³ Ibale u ntam mam u bi boñ, baa hala a kôli? To. Ñôma Pétrô a bi kal le u gwé ki le u “hielba.” Hala a nkobla le u nlama tjôô maboñog mabe u bééna, u bôdôl boñ mam ma nlémél Djob. Kiki héga, hégda le u yé ke i liké, ndi hala a yé ngélé yoñ bisu le u ke i homa nu. Mbus ngim ngéda, u léba le u yé yoñ béba njel. Kii u ga boñ? Ibabé pééna, w’a bôdôl ndugi ke mbeñel mbeñel, i mbus u telep, u hielba, ndi u yoñ loñge njel. Nlélém jam inyu yoñ, kiki u yé nigil Bibel, u ga léba le u nlama héñha ngim mam tole ngim maboñog ikété niñ yoñ. Ba bebee i “hielba”​—hala wee, boñ mahéñha ma mbéda​—i mbus, bôdôl boñ mam ma nlémél Djob.

TI WEMEDE NKIKIP YAK YÉHÔVA

14. Lelaa u nla ti wemede nkikip yak Yéhôva?

¹⁴ Jam lipe, li li nlôôha ba nseñ u nlama boñ ilole u nkôs sôble, li yé le u ti wemede nkikip yak Yéhôva. Ngéda u nti wemede nkikip yak Yéhôva, u mbôn nye ikété masoohe le w’a bégés ndik nyetama, ni le w’a boñ le sômbôl yé i yila jam li bisu i niñ yoñ.​—Ndiimba Mbén 6:15.

15, 16. Kii ntinde mut i ti nyemede nkikip yak Djob?

¹⁵ Ngéda u mbôn le u ngwélél ndigi Yéhôva, hala a yé nlélém kiki ngéda u mbôn le w’a tégbaha niñ yoñ yosôna ni mut u ngwés. Hoñol munlôm ni muda ba ba mbéñgna inyu yi too ba nla biiba. Kiki munlôm a nyoñ ngéda i yi muda nunu, gwéha yé inyu muda nu i ga nañ kayéle a ga sôk, a yéñ le a bii nye. To hala kiki makidik mana ma ta bé isii jam, i munlôm nu a yé bebee i neebe mbegee i, inyule a ngwés muda nu.

¹⁶ Kiki u nigil i yi Yéhôva, u nkahal gwés nye, u sômblak ki boñ kii yosôna u nla inyu gwélél nye. Hala a ga tinde we i bôn nye ikété masoohe le u ga gwélél nye. Bibel i nkal le hiki mut nu a nsômbôl noñ Yésu a nlama “yôiba.” (Markô 8:34) Hala a nkobla le kii? Hala a nkobla le linôgôl Yéhôva li nlama ba jam li bisu ikété niñ yoñ. Sômbôl i Yéhôva i gwé mahee iloo ngôñ yoñ, ni sômbôl yoñ.​—Añ 1 Pétrô 4:2.

U KON BAÑ WOÑI LE U YÉ LE U HÔS

17. Inyuki ngim bôt i ntjél ti bomede nkikip yak Yéhôva?

¹⁷ Ngim bôt i ntjél ti bomede nkikip yak Yéhôva inyule ba nkon woñi le ba ga tééda bé mbônga wap. Ba nyéñ bé wéha Yéhôva nyuu, tole ba nla hek pék le ibale ba nti bé bomede nkikip, Yéhôva a ga ôm bé bo nsohi inyu maboñog map.

18. Kii i ga hôla we i yémbél woñi u gwé i wéha Yéhôva nyuu?

¹⁸ Gwéha yoñ inyu Yéhôva i ga hôla we i yémbél woñi u gwé i wéha Djob nyuu. Inyule u ngwés nye, u ga boñ kii yosôna u nla inyu tééda mbônga woñ inyu yé. (Ñañal 5:4; Kôlôsé 1:10) U ga hoñol bé le i boñ sômbôl i Yéhôva i nlôôha ba nledek jam. Ñôma Yôhanes a bi tila le: “Inyule gwéha Nyambe ini, le di tééda matiñ mé, ndi matiñ mé ma ta bé nledek”​—1 Yôhanes 5:3.

19. Inyuki u nlama bé kon woñi i ti wemede nkikip yak Yéhôva?

¹⁹ I mbéda bé le u ba peles inyu ti wemede nkikip yak Yéhôva. Kekikel, a mbat bé bés le di boñ mam iloo la yés. (Tjémbi 103:14) A ga hôla we i boñ mam ma yé loñge. (Yésaya 41:10) Bôdôl Yéhôva ñem ni ñem woñ wonsôna, ni nye “a’ téé dinjela tjoñ.”​—Bingéngén 3:5, 6.

PAHAL HÉMLE YOÑ I MBAMBA INYU TOHI

20. Ngéda u mal ti wemede nkikip yak Yéhôva, kii i yé jam li noñ ha?

²⁰ Baa u nhoñol le u yé bebee i ti wemede nkikip yak Yéhôva? Ngéda u mal ti wemede nkikip yak Yéhôva, u yé nkôôbaga i yônôs jam li noñ ha. U nlama kôs sôble.

21, 22. Lelaa u nla ‘pahal’ hémle yoñ i mbamba?

²¹ Yis nkot juu li mimañ nu likoda joñ le u mal ti wemede nkikip yak Yéhôva ni le u ngwés kôhna sôble. Nyen a ga yoñ bitelbene le ngim mimañ i béñge too u nyi biniigana bi Bibel bi bisu. Ibale ba neebe le u yé bebee i kôs sôble, ba ga kal we le u nla kôs sôble i likoda likeñi li Mbôgi Yéhôva li noñ ha; hala a nla ba i likoda li hilo hiada, tole i likoda li ndôn. Ngéda likoda li li mba li ntagbe, ba ga ti ngim nkwel, u u ntoñol kii i yé sôble. Nti nkwel a ga bat bet ba yé bebee i kôs sôble mambadga ima. Mandimbhe moñ mon ma ga ‘pahal’ hémle yoñ i mbamba.​—Rôma 10:10.

²² I mbus, u ga kôs sôble. Ba ga yube wensôna ikété malép. Sôble i ga unda hiki mut le u nti wemede nkikip yak Yéhôva ni le u yé wada ikété Mbôgi Yéhôva.

SÔBLE YOÑ I NKOBLA LE KII?

23. I kôs sôble “i jôl li Tata, ni li Man, ni li mbuu mpubi” i nkobla le kii?

²³ Yésu a bi kal le banigil bé ba bé lama kôs sôble “i jôl li Tata, ni li Man, ni li mbuu mpubi.” (Añ Matéô 28:19.) Hala a nkobla le kii? Hala a nkobla le u neebe kunde i Yéhôva ni tel i Yésu ikété bitééne bi Djob, u neebe ki lelaa Yéhôva a ngwélél mbuu mpubi wé inyu boñ sômbôl yé.​—Tjémbi 83:19; Matéô 28:18; Galatia 5:22, 23; 2 Pétrô 1:21.

24, 25. (a) Sôble i yé yimbne i kii? (b) Kii di ga kwélél ikété pes i nsôk?

²⁴ Sôble i yé yimbne i ngim jam li nlôôha ba nseñ. Ngéda ba nyube wensôna ikété malép, hala a nkobla le u nwo kingéda nlômbi woñ niñ, tole u ntjôô i niñ u bééna kôba. Ngéda u mpam ikété malép, u mbôdôl niñ i yondo inyu boñ sômbôl i Djob. Hala a ñéba le u ga gwélél Yéhôva ibôdôl hanano. U hôiga bañ le u nti bé wemede nkikip yak ngim mut binam, ngim ntôñ, tole ngim bôlô. Ndi u nti niñ yoñ nkikip yak Yéhôva.

²⁵ Liti wemede nkikip li ga hôla we i bana maada malam ni Djob. (Tjémbi 25:14) Hala a nkobla bé le mut a ga tohlana ndik inyule a nkôs sôble. Ñôma Paul a bi tila le: “Kenana yaga tohi nan lôñni bisu, ni woñi ni sehla.” (Filipi 2:12) Sôble i yé ndik bibôdle. Ndi lelaa u ga yén bebee ni Yéhôva? Pes i nsôk i kaat ini, i ga ti ndimbhe.