Ibôdôl i sôñ Dipos, kaat likoda li ñem sonde li ga bana ntén dihéga di mondo inyu ti bikaat bi sôñ, u u gwé ño le “Niiga maliga.” Ngôñ yés i ga ba le di pémés matode ma tôbôtôbô ma biniigana bi bisu ma Bibel, di gwéélak ngim mbadga ni ngim pes kaat.

Ibale di ntehe le nwet ndap a ndiihe maliga, di nla kôôbaha nye inyu lipeple li ga noñ ni njel kaat di nyigle nye tole ngim vidéô i jw.org di ñunda nye. Di nlama boñ biliya i pala yuuga nye inyu kena nkwel u ni bisu. Dihéga di mondo ni minkwel mi baudu mi ga yôña ikété kaat ini le Kii Bibel i niiga bés? i homa nu a gwé ño le “I sem kwep.” Ha nyen di nla léba mambadga mape ma ma nla hôla bés i kôôba mut inyu lipeple lipe, tole inyu gwélél Bibel yotama inyu tégbaha yigil.

Njel yada yon i nkena i niñ boga. (Matéô 7:13, 14) Kiki di nkwélés bôt ba ngandak mintén mi bibase, ni ba ba néñél bahoma bahoma, di nlama gwélél biniigana bi bi nla ôt bo. (1 Timôtéô 2:4) Mu kii di nke ni bisu i meya ngandak miño mi minkwel mi Bibel, di holok ki ikété likeñge jés inyu tibil “toñol bañga i maliga,” hala nyen maséé més ma ga kônde nañ, di ga kôhna ki bisai i niiga bôt bape maliga.​—2 Timôtéô 2:15.

Ikété nkoñ isi wonsô, bôt ba gwé ngôñ ni hogbe. (Ñañal 4:1) Mu sôñ Dipos yosôna, di ga boñ biliya bi tôbôtôbô inyu ti La Tour de Garde (Nkum Ntat), u u ga bana ño nkwel u nti hogbe. Ti mbamble unu homa nyensôna. Ndi, kiki di gwé ngôñ i kwélés bôt bomede inyu ti bo hogbe, di ga nwas bé nwo mandap i ngéda bôt ba ta bé.

KII U KAL

“Ngim mangéda, bésbobasôna di gwé ngôñ ni hogbe. Ndi, hee di nla léba yo? [Añ 2 Korintô 1:3, 4.] Mbamble unu le La Tour de Garde (Nkum Ntat), u ñunda lelaa Djob a nti bés i nya hogbe i.”

Ibale u nkwel u, u nlémél mut, a neebe ki mbamble, . . .

UNDA NYE VIDÉÔ I I GWÉ ÑO NKWEL LE INYUKI DI NLAMA NIGIL BIBEL?

Mbus, unda nye lelaa yigil Bibel i ntagbe.

KÔÔBA MUT INYU LIPEPLE LI NOÑ HA

Bat ngim mbadga u ga timbhe ngéda w’a loo i lipeple, kiki bo “Inyuki Djob a nwas le mandutu ma ba?”