LITIÑ LI BIBEL: “Ni tôñ bañ inyu nom nan.”​—Matéô 6:25.

Kii hala a nkobla? Yésu a pot bibañga bini i nkwel wé i ngii hikôa. Inoñnaga ni kaat yada i ndoñi bibuk bi Bibel, bini bibañga ni hop grikia le “Ni tôñ bañ inyu nom nan” bi ngwélana inyu toñol “liboñog li mut ngéda a yé yep, ngéda njal i gwé nye ni ngéda mandutu ma nkwél nye mu i niñ yé i hiki kel.” Nduña i yé i boñ le mut a lôôha tôñ inyu mam ma nla kwél nye dilo di nlo. Hala a ta bé nkén jam, a bak ki jam li kôli, le mut a tôñ inyu bigwel moo ni inyu loñge i bôt a ngwés (Filipi 2:20) Ndi ngéda Yésu a bi kal le: “Ni tôñ bañ kekikel,” a bé ti banigil bé maéba le ba keñgle nduña i nloo héga​—hala wee ba lôôha bañ kon woñi inyu yani kayéle hala a héya bo maséé ba gwé i len ini.​—Matéô 6:31, 34. MN

Baa maéba ma, ma nla ba bés nseñ i len ini? Njel pék i mbat le di noñ maéba ma Yésu. Inyuki? Gwigil bihogi bôt ba bi boñog, bi ñunda le ngéda mut a ntôñ iloo héga, a nsélés boña wé ibabé waa, a nti bé to yo pôla i noi. Mu kiki boña a nsal ngi noi, hala a nsôk lona makon kiki bo bipoo bi kôkôô ni bikédé, makon ma ñem, ni ndidiga ikeñi (hala wee kon u u tihba bisaha, u kidik nhébék).

Yésu a bi ti njom i tôbôtôbô i i nlama tinde bés i keñgle nduña i nlôôha: Hala a gwééne bé bés mahee mo ki mo. Jon Yésu a bat le: “Njee nan a yé le a la ébés ntel wé to kii hikéñéé hi woo inyu nduña yé?” (Matéô 6:27) I lôôha bok mis i ngii mandutu més i nkônde bé bés to linut jada li niñ, i lémés bé ki to niñ yés. U héya hala, mam di mbéna kon woñi ma yé ma bôña bé to. Dokta jada li bi toñol i jam li lana le: “Mut a nlôôha bana nduña a ñôbôs ngui yé, ni le dilo di nlo di mbéna bé ba dibe kiki di konok woñi.”

Lelaa di nla keñgle nduña? Pog, di bôdôl Djob ñem. Ibale Djob a njés dinuni, a engek mbônji, bôô ni ngélé yañen inyu bôt ba binam ba ba nha Ane yé kiki jam li bisu i niñ yap? (Matéô 6:25, 26, 28-30) Biba, di yoñ hiki kel kiki i nlo. Yésu a bi kal le: “Ni tôñ bañ inyu yani, inyule yani y’a bana yé nduña.” Baa yak we u neebe le “ndutu i kel yada i nkola yokel i”?​—Matéô 6:34.

Ibale di noñ maéba ma Yésu, di nla keñgle makon. Ndi iloo ha, di ga bana ñem ñwee​—i jam Bibel i nsébél le “nsañ Nyambe”​—Filipi 4:6, 7.

Baa Nsohop a yé ngim mut tole yom?

BAA W’A KAL le Nsohop a yé . . .

• Hégél mbuu?

• Béba i i yé ikété ngim mut?

• Ngim jam bôt ba binam ba bi bot?

JAM BIBEL I NKAL

Nsohop a bi kwel ni Yésu, a noode ki nye. (Matéô 4:1-4) Jon Nsohop a ta bé ngim jam mut binam a mbot, a ta bé to ngim béba i i yé ikété mut. Ndi a yé yaga mbuu mbe.

KII IPE BIBEL I NIIGA BÉS?

• I bibôdle Nsohop a bé peles añgel, ndi ‘a telbene bé i maliga.’ (Yôhanes 8:44) A yila mut bitembee, a kolba yak Djob.

• Biañgel bipe bi bi adba ni Satan mu ngolba yé. ​—Masoola 12:9.

• Nsohop a nkwés ngandak bôt ndim le ba neebe bañ le a yé.​—2 Korintô 4:4.

Baa Satan a nla bémbe bôt?

BÔT BAHOGI BA NKAL LE i kal le Satan a mbémbe bôt i yé ndigi bitembee, bape ba nsehla ni woñi u mimbuu mimbe. We u nhoñol lelaa?

JAM BIBEL I NKAL

“Ndi nkoñ isi wonsôna u niñi isi ane mut mbe.” (1 Yôhanes 5:19) Nsohop a nyumus nkoñ isi wonsôna, ndi ha hiki mut bé nyen a yé i si bémbe yé.

KII IPE BIBEL I NIIGA BÉS?

• Nsohop a ngwélél mandon inyu kônde kéñbaha nsoñgi u bôt a mbémbe.​—2 Korintô 11:14.

• Ngim mangéda, mimbuu mimbe mi nla jôb, mi yén ikété ngim bôt.​—Matéô 12:22.

• Ni mahôla ma Djob, ni nla yémbél Nsohop.​—Yakôbô 4:7.