Minsébla i je

Yésu a nginda yii i ndap Farisai het a mbuubaha i mut nyuu i bé bet. Yésu a ntehe bôt ba yé pohol biyééne bi bisu. A ngwélél jam li inyu niiga suhulnyuu.

Yésu a nkal le: “I ngéda mut a naña we i ngand libii, u yén bañ i biyééne bi bañga bôt. Bebeg le a naña mut numpe nu a yé bañga iloo we, tiga le nu a naña bé bo iba, a lo, a kal we le: ‘Ti nunu mut yééne yoñ.’ Ha nyen w’a telep ni wonyuu inyu ke i yééne i yañga mut.”​—Lukas 14:8, 9.

I mbus, Yésu a nkal le: “Ngéda ba naña we, ke yén i yééne i yañga mut, inyu boñ le ngéda i mut a naña we a nlo, a kal we le: ‘A wanda, bet nyoo bisu.’ Ha nyen w’a bana lipém i bisu bi bakén bobasôna.” I boñ hala i ta ndik bé inyu bana bilem bilam. Yésu a ntoñol le: “Inyule hiki mut a mbédés nyemede a’ suhlana; ndi nu ni nu a nsuhus nyemede a’ bédhana.” (Lukas 14:10, 11) Yésu a yé niiga bôt ba ñemble nye i bana suhulnyuu.

I mbus, Yésu a niiga Farisai i naña nye jam lipe: Lelaa a yé le a naña bôt i je kayéle hala a lémél Djob. “I ngéda u naña bôt i je i kosi tole kôkôa, u sébél bañ mawanda moñ, to lôkisoñ, to bôt boñ ba lihaa, to bôt boñ ba libôk ba ba yé mingwañ. Inyule yak bo ba nla naña we kel yada, ba timbhe we i jam u bi bôñôl bo. Ndi ngéda u naña ngand, sébél diyeyeba, bôt ba nlem, bibôk bi bôt, ndim bôt; ha nyen w’a ba maséé inyule ba gwé bé to yom i timbhe we.”​—Lukas 14:12-14.

I yé loñge le di naña mawanda més, bôt bés ba lihaa tole bôt ba libôga jés i je. Yésu a ta bé kal le hala a yé béba. Jam a nsômbôl yigye li yé bisai bi mbuma ñañ bi bi mbem bet ba nleege bôt ba nok ndutu, bôt kiki bo diyeyeba, bôt ba nlem, bôt ba ndim. Yésu a nkal mut a naña nye le: “Nyambe a’ timbhe we i bitugne bi bôt ba téé sép.” Mut wada nu ba naña i je a nkal le: “Maséé ni nu a nje i Ane Nyambe.” (Lukas 14:15) Inyu yé i je i Ane Nyambe i yé toi nsima nkeñi. Ndi bôt bobasôna ba gwé bé minlélém mi mahoñol. I jam li jon Yésu a nke unda nano.

“Mut wada a bi naña ngand keñi kôkôa, a sébél ngandak bôt . . . a ep nkol wé i kal bôt a bi naña le: ‘Loga inyule nano mam momasôna ma yé nkôôbaga.’ Ndi bobasôna ba bi bôdôl yéñ manjom inyu boñ le ba lo bañ. Nu bisu a kal nye le: ‘Me bi somb wom, me gwé ngôñ i ke béñge wo; nwéhél me, ndi m’a la bé lo.’ Numpe a kal le: ‘Me bi somb jôm li nyaga, me yé ke i béñge yo; nwéhél me, ndi m’a la bé lo.’ Numpe ki a kal le: ‘Me ntip biiba, inyu hala nyen me nla bé lo.’”​—Lukas 14:16-20.

Manjom bôt bana ba nti ma kôli bé! Ilole a nti moni, mut a yé a béñge ndugi wom tole lém a nlama somb. Jon mut a ta bé nyégsaga i ke tehe yom a mal somb. Mut nu yôhne aa a ta bé i kôôba libii jé, a mal biiba, jon hala a nkéñ bé nye njel i neebe nsébla. Ngéda nwet ndap a nok manjom mana, a ñunup, a kal nkol wé le:

“Pala ke i minloñ minkeñi ni mintitigi mi tison, u lona diyeyeba hana, ni bôt ba nlem, ni ndim bôt, ni bibôk bi bôt.” Nkol wé u mboñ hala, ndi biyééne bi ngi yii. Nwet ndap a nkal ni nkol wé le: “Ke mu manjel ni bahoma ba gwé mapénd, u nyégsa bôt le ba lo, ba jôp i ndap yem inyu boñ le i yon. Inyule me nkal bé le: Ikété bôt me bi naña, to wada mu a’ noode bé bijek gwem.”​—Lukas 14:21-24.

Bibañga bi Yésu bini bi ntibil unda lelaa Yéhôva Djob ni njel Yésu Kristô, a naña bôt i kôdôl Ane ngii. Lôk Yuda, téntén baéga bibase ba bé bôt ba bisu i kôhna nsébla. Libim ikété yap li bi tjél neebe nsébla ngéda Yésu a bé yônôs nson wé. Ndi bôt bape ba ga kôhna nsébla. Kiki Yésu a ñunda mu hihéga hié, nsébla umpe u ga ba inyu bôt ba suhulnyuu ba Lôk Yuda, ni inyu bôt ba matén mape ba ba bi neebe base i Lôk Yuda. I mbus, nsébla u nyôhne aa u ga ba inyu bôt Lôk Yuda i bé hoñol le ba yé nyega i mis ma Djob.​—Minson mi baôma 10:28-48.

Ñ, bibañga bi Yésu bi nkiha toi ni bibañga bi mut wada ikété bet ba bi naña, nu a bi kal le: “Maséé ni nu a nje i Ane Nyambe.”