Matémb ma man nimlaga

Bebek Yésu a bi ti hihéga hi nimlak ntômba ni hi nimlak drakma ngéda a bé i Péréa i pes likôl i Lom Yordan. Biniigana bi mpémél munu dihéga dini tjo diba, bi yé le: di nlama kon maséé ngéda mboñbéba a nhiel ñem, a témb ki yak Yéhôva. Farisai ni bayimbén ba ñôm Yésu nsohi le a nleege nya bôt i. Ndi baa ba ñôt ngim biniigana mu dihéga di Yésu di tjo diba? Baa ba nyimbe mahoñol Isañ wés nu a yé ngii a gwé inyu baboñbéba ba ba nhiel miñem nwap? Nano, Yésu a nti hihéga hilam hipe hi hi gwé minlélém mi biniigana.

Hihéga hi ñunda isañ nu a gwé bon bôlôm iba, nu mbus nyen ba mpôdôl ngandak munu hihéga hini. Farisai, bayimbén ni bôt bape ba ba yé emble hihéga hi Yésu, ba nla tibil ôt biniigana mu jam Yésu a nkal inyu man nu mbus. Ndi yak jam Yésu a nkal inyu isañ ni man nu mañ li yé nseñ, inyule libak jap li nti bés ngandak biniigana. Jon, di tibil emble ñañ u bôt bana bo baa.

Yésu a mbôdôl ñañ wé ni bini bibuk: “Mut wada a bééna bon bôlôm iba. Man nu mbus a kal isañ le: ‘A pua, ti me yem ngababum me kôli kôhna.’ Ha nyen isañ a kébha bo nkus wé.” (Lukas 15:11, 12) Yimbe le man nu mbus a ta bé bat ngababum yé inyule isañ a nwo. Isañ a ngi yii niñ. Ndi man nunu a ngwés le ba ti nye ngababum yé nano inyule a ngwés niñ kiki a nsômbôl, a ngwés ki boñ kii yosôna i nkon nye ngôñ. Kii i ntagbe i mbus ngéda?

Yésu a ntoñol le: “I mbus ndék dilo, man nu mbus a kot gwom gwé gwobisôna, a ke liké i loñ i yé haa, nyoo a ôbôs nkus wé ikété niñ i mpungu.” (Lukas 15:13) Iloole a yén i ndap yé, ni isañ nu a ntôñ ni bon bé, i man nunu a mpohol i ke i loñ ipe. Nyoo i loñ i, a ngwélél ngababum yé yosôna inyu tuk niñ, a niñik ikété ndéñg. I mbus, mangéda mabe ma lo. Yésu a nke ni bisu i kal le:

“I ngéda a bi pémés nkus wé wonsôna, njal keñi i kwo mu loñ i, a bana ha bé to yom. A bi ke, a adbe mut wada mu loñ i; i mut nu a ep nye mu nkoñ wé inyu tééda ngôi. A bé a bana yak ngôñ i je bijek bi ngôi, ndi mut a bé ti bé nye to yom.”​—Lukas 15:14-16.

Inoñnaga ni Mbén Djob, ngôi i bé nyega; ndi nano, man nunu a nlama tééda ngôi inyu niñ. Njal i nlo nol nye kayéle a yé bebee i je bijek bi binuga a yé tééda. Ngéda ndutu i nai, ‘nyuu i nyi nye jam.’ Kii a mboñ nano? A nkalba le: “Bôt ba bôlô ba pua yem ba gwé koga iloo kiki i nsômbla, ki le me me nlo wo njal hana! M’a telep, me témb yak pua yem, me kal nye le: ‘A pua, me bi boñ ngii béba, me boñ ki we béba. Ngo me kôli ha bé séblana le man woñ. Yilha me kiki mut woñ bôlô wada.’” Ha nyen a ntelep a témb yak isañ.​—Lukas 15:17-20.

Lelaa isañ a ga leege nye? Baa a ga unbene man wé a bam nye inyule a bi pam ndap? Baa malo ma man ma ga boñ bé nye to yom? Ibale we nu, ki u bi boñ lelaa? Ibale man woñ munlôm nu, tole man woñ nu muda nu?

MAN A BI NIMIL A NLO

Yésu a ñunda mahoñol ni maboñok ma Isañ, a nkal le: “I ngéda a bé a ngi yii haa, isañ a tehe nye, a kônôl nye ngoo, a ke ngwéé, a sambla nye, a sos nye mamañ ni gwéha.” (Lukas 15:20) To hala kiki isañ a bi nok niñ nyega man a bi niñ, a nleege nye ni liyômba. Ni ñañ unu, baa baéga bibase bi Lôk Yuda ba ba nhoñol le ba nyi Yéhôva, ba gwéélak ki nye, ba yé tehe mahoñol Isañ wés nu ngii a gwé inyu baboñbéba ba ba nhiel miñem? Baa ba ga yimbe ki le Yésu a gwé minlélém mi mahoñol?

Isañ a mbéñge, a tehe le man a môdi, a yimbe le man wé a nhiel toi ñem. Gwéha isañ a ñunda mu kiki a mba nu bisu i lo yéga nye, i ntinde man i yeelene nye bibéba gwé gwobisôna. Yésu a nkal le: “I mbus, man wé a kal nye le: ‘A pua, me bi boñ ngii béba, me boñ ki we béba. Ngo me kôli ha bé séblana le man woñ.’”​—Lukas 15:21.

Isañ a nkal bagwélél bé le: “Ni pala boñ! Ni lona mbot i nloo yosôna bilama, ni ha nye yo; ni ha ki nye hilonde i woo lôñni bitamb i makôô. Ni lona yak man nyaga mahoñ, ni nol nye, di je, di kon maséé, inyule i man wem nunu a bi wo, ndi a ntuge; a bi nimil, ndi a ntémb.” Ha nyen ba mbôdôl “kon maséé.”​—Lukas 15:22-24.

Ha ngéda i, man nu mañ a yé wom. Inyu yé, Yésu a nkal le: “Kiki a bé huu, a pam bebee ni ndap, a nok nsik ni masak. Ha nyen a bi sébél ngwélél wada, a bat nye jam li yé tagbe. Ngwélél a kal nye le: ‘Manyuñ a nlo, jon isoñ a nol man nyaga mahoñ inyule a ntémb a bak mbôô.’ Ndi man nu mañ a unup, a tjél jôp. Ha nyen isañ a bi pam, a bôdôl soohe nye. A timbhe, a kal isañ le: ‘Nun-ki! Nano a yé ngandak nwii le me nsélél we kiki nkol, ndi to ngélé yada, me yé ngi ndogbene oda yoñ; to hala, u ma ti bé me man kembee le me kon maséé lôñni mawanda mem to ngélé yada. Ndi i man woñ nunu, nu a mal ôbôs nkus woñ ni bôda ba libambe, nye ngi to lo, u nôlôl nye man nyaga mahoñ.’”​—Lukas 15:25-30.

Kiki man nu mañ, bonjee ba ñôm Yésu nsohi inyu konangoo a gwé inyu bôt ba litén ni baboñbéba? Bayimbén ni Farisai. Yésu a nyoñ hihéga hini inyule ba ñôm nye minsohi mu kiki a nleege baboñbéba. Ntiik, nu ni nu a mbep tehe konangoo i Djob a nlama tééda biniigana bini.

Yésu a mélés hihéga hini ngéda a ñunda lelaa isañ a ñôt mahoñol ma man nu mañ. A nkal le: “A man wem, u yé ni me ngéda yosôna, hiki yom me gwé i yé yoñ. Ndi i bak nseñ le di boñ ngand, di kon ki maséé inyule manyuñ a bi wo, ndi a ntuge; a bi nimil, ndi a ntémb.”​—Lukas 15:31, 32.

Yésu a nkal bé makidik man nu mañ a nsôk a yoñ. Ndi, Bibel i nkal le i mbus nyemb Yésu, “limut likeñi li biprisi li yila bahémle.” (Minson mi baôma 6:7) Bebek ndék biprisi i i bi emble hihéga hi Yésu hi hi bé pôdôl man nu a bi nimil i bé ipôla limut li. Hala a bi la hôla bo i héñha mahoñol, i hiel miñem, ni i témb yak Yéhôva.

Ibôdôl ha kel i, banigil ba Yésu ba nlama ôt biniigana bi mahee munu hihéga hi, ni i diihe gwo. Biniigana bi bisu bi yé le, i yé toi nseñ i yén ikété ntôñ u Djob isi bipapai bi Isañ wés nu a ngwés bés, a téédaga ki bés, iloole di kee di tuk niñ i ‘loñ ipe.’

Biniigana bipe di nla pémés bi yé le ibale di mboñ béba bisu bi Yéhôva, di nlama témb yak Isañ wés ni suhulnyuu inyu kônde bana bisai gwé.

Biniigana di nsôk ôt, bi yé maselna ma yé ipôla isañ nu gwéha nu a yé bebee i leege ni i nwéhél man, ni libak li man nu mañ nu a ntééda hiun. Maliga ma yé le, bagwélél ba Djob ba nlama ba bebee i nwéhél ni i leege mut a mboñ béba, ndi a nhiel ñem wé, a témb ‘ndap Isañ.’ Di kon maséé ngéda mankéé nu ‘a bi wo, a ntuge’ ni nu ‘a bi nimil, a ntémb.’