Hihéga hi basalwom u minkôô mi wai

Yésu a ntip kal bôt ba bé emble nye i Péréa le “ngandak i i yé bôt ba bisu y’a ba bôt ba nsôk, yak ba ba nsôk b’a ba bôt ba bisu.” (Matéô 19:30) A nyigye jam li ni hihéga hi basalwom u minkôô mi wai.

Yésu a nkal le: “Inyule Ane i ngii i yé kiki nwet ndap wada, nu a bi pule pam bikegla i yéñ bôt ba bôlô inyu sal i wom wé u minkôô mi wai. Kiki a bi mal nôgla ni bôt ba bôlô le a nsaa bo dinariô yada inyu kel bôlô yada, a ep bo i wom wé u minkôô mi wai. I ngéda a bi témb a pam i mam ma ngeñ bôô i bikegla, a tehe bape ba ba gwé bé bôlô, ba téé ha i bôm; ha nyen a kal bo le: ‘Yak bé ni ke i wom u minkôô mi wai, m’a ti bé nsaa u kôli.’ Jon ba bi ke. A témb ki a pam i mam ma kosi yak ni i mam ma ngeñ aa i kôkôa, a boñ nlélém jam. Sôk i nsôk, i mam ma ngeñ itan i kôkôa, a pam, a léba bape ba téé ha, a kal bo le: ‘Inyuki ni téé hana ngim kel yosôna ibabé sal bôlô yo ki yo?’ Ba timbhe le: ‘Inyule mut nye ki nye a nyoñ bé bés i bôlô.’ A kal bo le: ‘Yak bé kena i wom u minkôô mi wai.’”​—Matéô 20:1-7.

Ibabé pééna, ngéda bôt ba nok Yésu a mpôdôl inyu “Ane i ngii” ni “nwet ndap wada,” ba nhoñol le a yé pôdôl Yéhôva Djob. Bitilna bi niiga le Yéhôva a yé nwet wom u minkôô mi wai, u u yé litén li Israel. (Tjémbi 80:9, 10; Yésaya 5:3, 4) I bet ba yé isi malômbla ma mbén Môsi ba yé kiki basalwom u minkôô mi wai. Ndi mu hihéga hié, Yésu a ta bé pôdôl mam ma bi tagbe kôba, ndi a yé ti ndoñi i mam ma yé bôña ha ngéda yé.

Baéga bibase, bôt kiki bo Farisai, ba nlama ke ni bisu i gwel minson mi Djob. Bon ba yé kiki basalwom ba ngéda yosôna, ba ba mbem nsaa, hala wee dinariô yada inyu bôlô i ngim kel.

Inyu biprisi ni baéga bibase bape, bôt ba litén ba gwé bé nlélém nsima kiki bo inyule ba yé kiki basalwom ba pes ngéda u wom u minkôô mi wai u Djob. Mu hihéga hi Yésu, ba yé bôt ba nyoñ bôlô i ngeñ bôô i bikegla tole i mbus ha, hala wee i kosi, i ngeñ aa i kôkôa, yak i ngeñ itan i kôkôa.

Ba ntehe i bet ba noñ Yésu kiki bôt ba yé “ntiihege.” (Yôhanes 7:49) Bebee le niñ yap yosôna, ba nsal kiki balop tjobi tole baboñ bibôlô bi moo bipe. Ndi, i nwii 29 N.Y., “nwet wom u minkôô mi wai” a bi om Yésu i sébél bana bôt ba suhulnyuu i sal inyu Djob, hala wee inyu yila banigil ba Kristô. Bon ba yé bôt ba nsôk Yésu a mpôdôl, basalwom ba ba nyôña i bôlô i ngeñ itan i kôkôa.

Inyu mélés hihéga hié, Yésu a nkal i yom i ntagbe ngéda bôlô i mal i kel i: “I ngéda kôkôa i bi kwo, nwet wom u minkôô mi wai a kal kindak wé le: ‘Sébél bôt ba bôlô, u ti bo nsaa wap, bôdôl ni bôt ba nsôk yôña i bôlô, u mal ni bôt ba mbôk yôña i bôlô.’ I ngéda bôt ba ngeñ itan i kôkôa ba bi lo, hiki wada wap a kôhna dinariô yada. Jon ngéda bôt a bi bôk yoñ i bôlô ba bi lo, ba bé hoñol le ba nkôhna iloo ha, ndi yak bo, hiki wada wap a kôhna dinariô yada. Kiki ba nkôhna nsaa wap, ba bôdôl tjelel ikolba nwet ndap, ba kalak le: ‘I bôt bana ba nsôk lo, ba nsal ndigi ngeñ yada; ndi u nti bo nlélém nsaa kiki bés ba di ntumbba ni nson kel yosôna isi hiañgaa!’ Ndi a timbhe wada wap, a kal nye le: ‘A mut wem, me mboñ bé we béba yo ki yo. Me ni we di nôgla inyu dinariô yada, hala bé? Yoñ nsaa woñ, kenek. Me ngwés ti bana bôt ba nsôk lo i bôlô nlélém nsaa kiki bé. Baa me gwé bé kunde i gwélél moni nwem kiki i nlémél me? Tole u yé njôñ inyule me yé loñge? Hala nyen bôt ba nsôk b’a ba bôt ba bisu, yak ba bisu ba ba bôt ba nsôk.”​—Matéô 20:8-16.

Bebek bini bibuk bi nsôk bi Yésu bi nhélés banigil bé. Lelaa baéga bibase bi Lôk Yuda ba ba nhoñol le ba yé “bôt ba bisu” ba nla yila “bôt ba nsôk”? Ni lelaa banigil ba Yésu ba ga yila “bôt ba bisu”?

Banigil ba Yésu baéga bibase ba ntehe kiki “bôt ba nsôk,” ba yé bebee i ba “bôt ba bisu” ni i kôhna nsaa wonsôna. I mbus nyemb Yésu, Djob a ga tjôô Yérusalem i yé hana isi inyu pohol litén li mondo, “Israel i Nyambe.” (Galatia 6:16; Matéô 23:38) Yôhanes Nsôble a bé hoñol litén li mondo lini i ngéda a bi pôdôl ngim sôble i i bé lama lo, sôble ni njel mbuu mpubi. I bet ba yé kiki “bôt ba nsôk” bon ba ga yila ba bisu i kôhna sôble, ni i kôhna nsima i ba mbôñ Yésu “letee ni masuk ma isi.” (Minson mi baôma 1:5, 8; Matéô 3:11) Ibale banigil ba Yésu ba ntibil nok mahéñha Yésu a yé pôdôl, ki ba yé le ba tehe bisu bi ngéda kiki ba nlama kolba hiun hikeñi hi baéga bibase, ba ba nyila “bôt ba nsôk.”