Nyiña inyu kaat i likoda li niñ yés ni nson wés
3-9 MPUYE
MASÔÔ MA NKUS MA BIBEL | ÑAÑGA BÔT 27-29
“Di kôna Yéhôva nu a ntodol bé bôt”
w13 15/6 10 § 14
Di kônde gwés Yéhôva inyu bilem gwé
14 Linyañ jo litan, li kôôge Môsi bebee li bat nye le: “Inyuki jôl li Tata li kôli malba ikété lôk yé, lakii a gwal bé man munlôm?” Ba kal ki le: “Tina bés ngababum ikété lôkisañ i tata.” Baa Môsi a bi kal le, ‘Mbén i, me nla bé boñ yom yo ki yo inyu nan’? Heeni, Môsi a bi “pamna hop wap bisu bi Yéhôva.” (Ñañga bôt 27:2-5) Lelaa Yéhôva a bi timbhe? A bi kal Môsi le: “Bingond bi Zélôféhad bi mpot jam li téé sép. W’a ti yaga bo biték inyu ngababum ikété lôkisañ isañ yap; w’a tégbaha bum isañ wap i moo map.” Yéhôva a bi kônde ki ti Môsi bini biniigana le: “Ndi w’a pôdôs bon ba Israel, u kal le: ‘Ibale mut a nwo, ndi a bana bé man munlôm, wee n’a tégbaha bum yé i moo ma ngond yé.” (Ñañga bôt 27:6-8; Yôsua 17:1-6) Ibôdôl i kel i nyen, ngéda mut a bé a gwal bé man munlôm inyu kôdôl ngababum yé, bingond gwé gwon bi bé bi kôdôl yo.
w13 15/6 11 § 15
Di kônde gwés Yéhôva inyu bilem gwé
15 Kinje bikidil bi ñéba toi le Yéhôva a ntodol bé bôt! Yéhôva a bi ti i bôda bana lipém to lakii ba bééna bé mut inyu sôñ bo, nlélém kiki a bé boñ ni bôt ba litén bobasôna. (Tjémbi 68:6) Bibel i gwé ngandak miñañ kiki unu mi mi ñéba le Yéhôva a ntodol bé bagwélél bé.—1 Samuel 16:1-13; Minson mi baôma 10:30-35, 44-48.
w13 15/6 11 § 16
Di kônde gwés Yéhôva inyu bilem gwé
16 Lelaa yak bés di nla éba le di ntodol bé bôt kiki Yéhôva? Di nla unda le di ntodol bé bôt ni manjel ima: di ga todol bé bôt ndigi ibale di boñ biliya i ba bôt ba ntodol bé bôt. Ngim mangéda, di nla hoñol le di yé minyaô ni le di ntodol bé bôt, ndi ki le mam ma ta bé hala. Jon, kii i nla hôla bés i yi too di yé batodol bôt tole di ta bé? Di nla nigle Yésu. Inyu yi lelaa bôt ba bé tehe nye, a bi bat banigil bé le: “Bôt ba nkal le Man mut a yé njee?” (Matéô 16:13, 14) Inyuki u nla bé boñ nlélém jam? U nla bat liwanda joñ li li nkon bé woñi i kal we maliga le a kal we too u yé mut a ntodol bôt tole to. Ibale a nkal we le u ntodol bôt bebek inyule a nyimbe le ngim mangéda u yé u ba minyaô ndik ni ngim bôt, kiki hihéga, i bet ba bi boñ bisuklu bikeñi, i bet ba gwé ngandak moni, tole i bet ba yé i nlélém litén kiki we, ibale a nkal we hala, kii w’a boñ? Soohe Yéhôva, u yemhe nye le a hôla we i kôna nye i nya i yôni.—Matéô 7:7; Kôlôsé 3:10, 11.
Tik ngok i mbuu
it-2 850 § 1
Makébla
Makébla ma binyonyo. Makébla ma binyonyo ma bé ipôla makébla bon ba Israel ba bé ti ntel ngéda nu ba bé ba yii i Hisi hi Likak. (Ñañga bôt 15:2, 5, 8-10) Bisesema bi, bi bé le bi ba wai (“maok ma ma mboñ le mut a hiôô”) i ba bé kôp i ngii bisesema. (Ñañga bôt 28:7, 14; hégha ni Manyodi 30:9; Ñañga bôt 15:10.) Ñôma Paul a tilna bikristen bi Filipi le: “Ndi to ibale me yé i kuba kiki likébla li binyonyo i ngii sesema ni njel ngaba me nyoñ i nson mpubhaga, me yé maséé.” Ngéda Paul a mpôdôl likébla li binyonyo, a nsômbôl kal le a bi ti nyemede nkikip inyu bilôk bikéé (Filipi 2:17) Ilole a nwo, a tilna ki Timôtéô le: “Inyule me yé i kuba kiki likébla li binyonyo, yak ngéda yem kobla i yé toi bebee.”—2 Timôtéô 4:6.
10-16 MPUYE
MASÔÔ MA NKUS MA BIBEL | ÑAÑGA BÔT 30-31
“Yônôs mimbônga nwoñ”
it-2 1164
Mbônga
Mut nyemede nyen a mboñ wo, ndi a yé nyégsaga i yônôs wo. Likak li bé li ba mbônga mut nyemede a bé a ti. Tolakii mut nyemede nyen a bé a ti likak, mbén Yéhôva i bé nyégsa nye le a yônôs jam a nkal. Ngéda mut a bé a ti likak, i bé wengoñle niñ yé ‘i bé i édi ni mbônga u,’ hala wee, ibale a bé yônôs bé mbônga u, a bé lama wo. (Ñañga bôt 30:2; béñge yak Rôma 1:31, 32.) Kiki niñ i bééna maada ni mbônga, ilole mut a mboñ mbônga a bé lama tibil ôt mahoñol inyu yi too a ga yônôs bibuk gwé tole heeni. Mbén i bé kal le: “Ngéda u nti Yéhôva Nyambe woñ likak, . . . inyule Yéhôva Nyambe woñ a bédél yaga we jo, hala a ba we béba. Ndi ibale u ngwés bé ti likak, wee hala a ta bé we béba.”—Ndiimba Mbén 23:21, 22.
it-2 1164
Mbônga
Likak li bé ngim mbônga mut a bé ti inyu i ti nyemede nkikip yak Yéhôva, i gwel ngim nson, tole i tjél boñ mam mbén i bé sôña bé. Likak li bé i pohol i boñ ngim jam wemede. Kiki likak li bé bé jam li minjôha, jon Bibel i nhégha jo ni i kum soñ. (Ñañga bôt 30:2; Matéô 5:33) “Mbônga” u yé i yom mut nyemede a mpohol i boñ ki le hok ngéda ba mbéna “kum soñ” bisu bi bangomin. Ba mbéna kum soñ i mbus le ba mboñ malômbla.—Bibôdle 26:28; 31:44, 53.
w04 1/8 27 § 3
Balôm ba matode ba kaat Ñañga bôt
30:6-8—Baa kristen i nla tjél le nwaa a yônôs likak a mboñ? I len ini, hiki wada wés nyen a mbôn Yéhôva ngim yom, kiki hihéga, mut nyemede nyen a mbôn Yéhôva le a ga sélél nye. (Galatia 6:5) Mut nye ki nye a nla bé bôk mbônga u. Ndi muda nu a yé mbiibaga, a ga boñ bé ngim mbônga u u nkiha bé ni lipôdôl li Djob, tole u u nkéñ nye i yônôs minson nwé ikété ndap libii.
Tik ngok i mbuu
it-2 1203 § 4
Yéfta
Behee, ba bé ba ti ngim bôt inyu boñ le ba sélél Yéhôva niñ yap yosôna i lap. Bagwal ba bééna kunde i boñ hala. Ilole Samuel a ngwéé, nyañ Hana a bi bôn Yéhôva le ibale a nti nye man munlôm, i man nu a bé lama sélél nye niñ yé yosôna. Yak nlô wé Elkana a bi neebe mbônga u. Ngéda a bi tjilis Samuel méé, a bi yônôs mbônga wé. Hana a bi kena yak binuga inyu sem kiki bisesema. (1 Samuel 1:11, 22-28; 2:11) Samsôn a bé man numpe nu a bé lama ti niñ yé yosôna inyu sélél Yéhôva kiki Nazir.—Bakéés 13:2-5, 11-14; béñge yak Ñañga bôt 30:3-5, 16 inyu tehe i kunde isañ man a bé a bana i ngii ngond yé.
17-23 MPUYE
MASÔÔ MA NKUS MA BIBEL | ÑAÑGA BÔT 32-33
“Buñga bôt bobasôna ba yé mu loñ”
Baa u yik laa?
Kii i bé “bahoma ba nyôgi” kaat Lôk Héber i mbéna sima?
Ngéda bon ba Israel ba bé bebee ni jôp i Hisi hi Likak, Yéhôva a bi kal bo le ba héya bahoma ba bibégés ba bon ba Kanaan ba ba bé niñ mu. Djob a bi kal le: “Ni ôbôs ki mintjok nwap mi bisat, yak ni miñôôk nwap mi biôngba, ni nyugut yaga ki bahoma bap ba nyôgi bobasôna.” (Ñañga bôt 33:52) I bahoma ba bibégés ba, ba bé le ba bahoma ba néhi kiki i ngii dikôa, bahoma ba yé ñoñok, isi bie, tole ikété tison. (1 Bikiñe 14:23; 2 Bikiñe 17:29; Ézékiel 6:3) Ba bé le ba koba gwom mu, kiki bo mintjok mi biôñgba, bititii, hitjo ni gwom bipe inyu bibégés.
w08 15/2 27 § 5-6
Biniigana di nla ôt mu dihôha di bon ba Israel
I len ini, yak bés di mboma minlélém mi mandutu kiki bon ba Israel. Yak i len ini, di gwé ngandak bisat. Kiki hihéga, di nla sima moni, batuk sinima, bet ba ntuk bol, baéga ba mam ma pôlitik, baéga ba bibase, ngim mangéda yak bôt bés ba lihaa. Ibale di mbok mis mu mam ma, ma nla yila jam li bisu i niñ yés. Jon i yila liwanda li ñem nyuu li bôt ba nsélél bé Yéhôva, li nla ôbôs maada més ni Yéhôva.
Malal ma nyega ma bé ipôla mam ma bé tinde bon ba Israel i bégés Baal. Yak bagwélél ba Yéhôva ba nke ni bisu i kwo mu nlélém hiandi. Kiki hihéga, kristen i i gwé ordinater ndi i nyoñ bé yihe, i ngéda a yé nyetama i mbai yé a nla jôp ngim homa mu internet nu a ta bé loñge, hala a mboñ le kiññem yé i mbôdol kéés nye. Kinje ngoo ibale kristen i nwas le internet i nyilha nye nkol u malal ma nyega!
it-1 392 § 4
Kanaan
Ni pék, Yôsua “a bi boñ yaga i mam momasôna Yéhôva a bi kal Môsi” inyu tjé bon ba Kanaan. (Yôsua 11:15, MN.) Ndi bon ba Israel ba bi noñ bé ndémbél yé i nya i yôni. Ba bi héya bé gwom bi nyega mukété loñ. Kiki bon ba Kanaan ba bé ba ngi yii ipôla yap, hala a bi tinde bon ba Israel i bôdôl boñ bibéba bi mam kiki bo. I jam li, li bi boñ le ngandak ikété yap i wo (ba bi yila yak bôt ba manola, bôt ba ndéñg ni babégés bisat) iloo kiki hala a bé le a bôña ibale ba tjé bon ba Kanaan bobasôna kiki Yéhôva a bi bat. (Ñañga bôt 33:55, 56; Bakéés 2:1-3, 11-23; Tjémbi 106:34-43) Yéhôva a bi kal bon ba Israel le a bé lama bé bañ bo, ni le a bé lama kogse bo ibale ba bôdôl bana maada ni bon ba Kanaan, hala wee ibale ba bôdôl biiba ni bo, ba bôdôl bégés mop map, ba bôdôl ki nigle bilem gwap bibe. Nlélém kogse bon ba Kanaan ba bi kôhna won u bé lama kwél bo. ‘Hisi hi bé lama lo bo.’—Manyodi 32, 33; 34:12-17; Lôk Lévi 18:26-30; Ndiimba mbén 7:2-5, 25, 26.
Tik ngok i mbuu
it-1 933 § 6
Minwaa mi nkoñ mi libôga
I mbus le ba bé ba leñ mbam inyu yi imbe pes litén li bé lama yééne, i bé béda le ba téé minwaa mi libôga inoñnaga ni nsoñgi u bôt ba yé i hiki litén. “Ndi n’a kôdôl hisi kikii mbam i nkwél bilôk binan; lôk i gwé ngandak bôt yon n’a kéñbaha ngababum yap; i i gwé ndék bôt w’a tigbaha ngababum yap; to imbe pes mbam i nkwél mut, yon a’ kôdôl; n’a kôdôl kingéda matén ma basôgôl banan.” (Ñañga bôt 33:54) Ngéda mbam i bé i éba imbe pes litén li nlama yééne, to mut a bé bé le a héñha makidik ma, ndi ba bé le ba héñha bikeñi bi ngababum. Kiki hihéga, ngéda ba bi léba le ngababum i bon ba Yuda i bé keñi ngandak, ba bi héya disi mu inyu kébha tjo bon ba Siméôn.—Yôsua 19:9.
24-30 MPUYE
MASÔÔ MA NKUS MA BIBEL | ÑAÑGA BÔT 34-36
“Yilha Yéhôva lisolbene joñ”
Baa u nsolbene yak Yéhôva?
4 Lelaa bon ba Israel ba bé boñ ni mut nu a bé nol numpe ngi kôôba? Tolakii a bi kôôba bé i boñ hala, i nya mut i, i bééna pil matjél. (Bibôdle 9:5) Ndi, ni konangoo, a bééna kunde i ke mpun matjél ngwéé. Minkoñ mi lisolbene mi bé minsamal, a bé le a tep wada mu, inyu solop. Nnol mut nu a bé lama yén nyoo i tison i lisolbene, letee ni nyemb i prisi ikeñi.—Ñanga bôt 35:15, 28.
Baa u nsolbene yak Yéhôva?
6 Mbus a bi nol mut ngi kôôba, nke ngwéé a bé lama ndugi “añal hop wé maôô ma mañ mi bôt mi nkoñ u,” ha lijubul li nwemel nkoñ i het a bi ke ngwéé. (Yôsua 20:4) Mbus ngim ngéda, ba bé ba timbis nye i nkoñ wé, i het matjél ma bi kuba, inyu boñ le mimañ mi mi bé nyoo, mi pémés mbagi. (Añ Ñanga bôt 35:24, 25.) A bé a témb ndigi i nkoñ lisolbene, ngéda ba nléba le a nkôôba bé nol nye.
Baa u nsolbene yak Yéhôva?
13 Ngéda a bé a bol i tison i lisolbene, nke ngwéé a bé nwee. Yéhôva a kal inyu minkoñ mi le: “Nwon nw’a bane bé lisolbene.” (Yôsua 20:2, 3) Yéhôva a bé bat bé le ba tiimba kéés nnol mut inyu nlélém jam; yak mpun matjél a bééna bé kunde i jôp i tison lisolbene inyu nol nke ngwéé. Jon nke ngwéé a bé kon ha bé mapuna woñi. Mu kii a bé mu tison, a bé nwee i si bipapai bi Yéhôva, ibabé i kon yom yo ki yo woñi. Lisolbene li, li bééne bé nye kiki mok. A bé la sal mu tison, hôla bôt bape, ni gwélél Yéhôva ikété nsañ. Ñ, a bé le a bana niñ maséé ni i i yôni!
Tik ngok i mbuu
w91 15/2 13 § 13
Binoñ bi bi kôli inyu bôt bobasôna
13 Adam bo Éva ba ga kôhna bé bisai bi bi nlôl ni binoñ. Mbén i Môsi i bééna litiñ lini le: “N’a leege bé binoñ gwo ki gwo inyu niñ nnol bôt, nu a nkéña ni libua li nyemp; a’ nôla ndigi.” (Ñañga bôt 35:31) Adam a bi luga bé, ndi a bi kôôba boñ béba yé. (1 Timôtéô 2:14) I bé wengoñle a bi kôôba nol bon bé, a bi lôôhe bo libak jé li kwéha ni nyemb, jon Adam a bé a kôli ni nyemb. A bé peles, a bi pohol i tjél nôgôl mbén Djob. Ibale Djob a boñ le Adam a kôdôl bisai bi bi nlôl ni binoñ, ki a bi kolba telepsép yé nyemede. Ndi kiki Adam a bi wo a saa inyu béba yé, ba bé le ba nwas i mbagi nôgôs i bé i ngii bon bé! (Rôma 5:16) Inoñnaga ni mbén, di nla kal le ba bi héya i béba i bi lona kogse. I nwet a bi saa binoñ ‘a bi wo inyu bon ba Adam bobasôna,’ a nihbe ki bikuu bi bi nlôl i béba.—Lôk Héber 2:9; 2 Korintô 5:21; 1 Pétrô 2:24.
31 MPUYE –6 HILÔNDE
MASÔÔ MA NKUS MA BIBEL | NDIIMBA MBÉN 1-2
“Bikééhene bi yé bi Djob”
w96 15/3 23 § 1
Yéhôva a ngwés telepsép
Mimañ nwon mi nlama kéés i bet ba mboñ bibéba bikeñi. (1 Korintô 5:12, 13) Ngéda ba nkéés, ba nlama bigda le telepsép i Yéhôva i nkiha ni konañgoo yé ngéda pôla i nene. Ndi ngéda mboñbéba a ntjél tam béba yé, ba ñéba bé nye konañgoo. Ndi mimañ mi nlama bé pémés mut i ntôñ inyule a mpôdôs bo béba ngéda ba kééhak nye. Ba gwé botñem le bikodlene ba nti nye bi ga hôla nye i tam béba yé. (Hégha ni Ézékiel 18:23.) Mimañ mi mi noñ ndémbél i telepsép i Kristô mi yé kiki “lisolbene ikolba béba mbebi.” (Yésaya 32:1, 2) Jon ba nlama bana yi bagal mam, to todol bôt ba nlama bé todol.—Ndiimba mbén 1:16, 17.
w02 1/8 9 § 4
Suhus wemede isi bôt Djob a ntéé
4 Inyu ba loñge nkéés, bakéés ba bé lama ndik bé yi Mbén. Kiki ba bé bikwéha bi bôt, bakéés ba bé lama yoñ yihe ni bilem kiki bo i tôñ ndigi bomede, i todol bôt, ni i hép nkus. Bilem bi, bi bé le bi boñ le ba kôde mbagi. Môsi a bi kal bo le: “Ni todlak bañ bôt mu mbagi nan. N’a emble batitigi ni bakeñi kayada; ni konok bañ mut woñi, inyule mbagi i yé i Nyambe.” I Israel, bakéés ba bé boñ bôlô yap ni kunde i Yéhôva. Kinje nsima!—Ndiimba mbén 1:16, 17.
Tik ngok i mbuu
w13 15/9 9 § 9
I mam Yéhôva a mbigdaha bôt bé ma yé ntiik
9 Ngéda bon ba Israel ba bi bôdôl liké jap li 40 ma nwii mu “soso ñoñ nyensôna a nkônha woñi,” Yéhôva a bi kal bé bo i bisu bi ngéda lelaa a bé lama éga bo, tat bo, ni yoñ ndun ni bo. Ndi Yéhôva a bi éba bo ngandak ngélé le ba nla bôdôl nye ni mabéhna mé ñem. Kiki Yéhôva a bé gwélél jél li ond binjamuha ni li hié juu, hala a bé hôñlaha bon ba Israel le nyen a bé éga bo mu ñoñ. (Ndiimba mbén 1:19; Manyodi 40:36-38) Nyen a bé ti ki bo mam momasôna ma bé sômbla bo mu ñoñ. “Mbot yap i un bé, to makôô map ma pop bé.” Ni ki le, “yom yo ki yo i héñél bé bo.”—Néhémia 9:19-21.
7-13 HILÔNDE
MASÔÔ MA NKUS MA BIBEL | NDIIMBA MBÉN 3-4
“Mambén ma Yéhôva ma gwé pék, ma téé ki sép”
it-1 1199 § 2
Yi
Ibale mut a nigil a boñok biliya i bii mam a nigil bisélél, a ga bana yi iloo balét bé, a bana ki pék iloo mimañ mi bôt. (Tjémbi 119:99, 100, 130; hégha ni Lukas 2:46, 47.) Hala a yé maliga inyule pék ni yi bi umne i ngii mambén ma téé sép ma Yéhôva. Ngéda bon ba Israel ba bé nôgôl mambén ma, matén ma bé kéña bo ma bé tehe le ba bé ‘loñ keñi ba bak bôt ba pék.’ (Ndiimba mbén 4:5-8; Tjémbi 111:7, 8, 10; hégha ni 1 Bikiñe 2:3.) Mut yi a neebe le Bibel i yé Bañga i Djob, a nsômbôl ki niñ inoñnaga ni yo, a soohege ki Djob le a hôla nye i boñ hala. (Tjémbi 119:169) A nwas le Bañga i Djob i tihba nye i kétékété (Matéô 13:19-23), a ntila yo ikété ñem wé (Bingéngén 3:3-6; 7:1-4), a mpam i oo “hi njel i yé nkoda” (Tjémbi 119:104). Ngéda Yésu a bé hana ’isi, a bi éba le a bééna i nya yi i, a neebe wo i ngii kék inyu boñ sômbôl Isañ.—Matéô 26:51-54.
w99 1/11 20 § 6-7
Di ba bôt ba likap
I yom kiñemuda i bi tehe ni nok i bi hélés nye, hala a tinde nye i kal le: “Bôt boñ ba yé bokimasoda, minkol nwoñ mi yé bokimasoda, mi mi ntelep bisu gwoñ ngéda yosôna, mi nogok pék yoñ!” (1 Bikiñe 10:4-8) A bé kal bé le minkol mi Salômô mi bé nsaibak inyule mi bé niñ ikété lingwañ, ndi a bé kal hala inyule minkol mi mi bééna masoda i emble pék Djob a bi ti Salômô. Kiñemuda i Séba i yé loñge ndémbél inyu bagwélél ba Yéhôva i len ini inyule ba nkon maséé i bana pék i Nhek nyemede ni i Man wé, Yésu Kristô!
Di béñge ki jam lipe kiñemuda i bi kal Salômô: “Yéhôva Nyambe woñ a ba nsaibak.” (1 Bikiñe 10:9) A bi tehe le Yéhôva nyen a bé ti nye pék ni lingwañ. Yéhôva a bi kal litén jé le: ‘Ni tééda matéñ ni matéak mem inyule mon ma yé pék nan ni yi nan i mis ma biloñ bi. Ngéda b’a nok matéñ mana momasôna, b’a kal le ‘Hodo, loñ keñi ini i yé bôt ba pék ni ba ba gwé yi.”—Ndiimba mbén 4:5-7.
w07 1/8 29 § 13
Baa u yé “ngwañ i pes mbuu”?
13 Yéhôva a nsayap ndik bé bagwélél bé, ndi a nti bo i yom i nlôôha ba ilam. (Yakôbô 1:17) Kiki hihéga, hisi Yéhôva a bi ti litén li Israel hi bé “loñ i nkuli wéi ni manyuñ.” Ba bé le ba kal nlélém ni loñ Égiptô, ndi i loñ Yéhôva a bi ti litén jé i bé loo loñ Égiptô huum. Môsi a bi kal bon ba Israel le i bé “loñ Yéhôva a bé béñge ngéda yosôna.” Ba bééna bisai bi inyule Yéhôva a bé tôñ bo. Ntel ngéda nu bon ba Israel ba bé nôgôl Yéhôva, Yéhôva a bé sayap bo kayéle ba bééna niñ ilam iloo biloñ gwobisôna bi bé kéña bo. Ñ, bisai bi Yéhôva “gwon bi ngwéñbaha”!—Ñañga bôt 16:13; Ndiimba mbén 4:5-8; 11:8-15.
Tik ngok i mbuu
w04 15/9 25 § 3
Balôm ba matode ba kaat Ndiimba mbén
4:15-20, 23, 24—Kiki Bibel i nsôña le di ôô bisat ni biôñgba, baa hala a nkobla le i yé béba i bana biôñgba inyu lémés ngim homa? To. I mbén i, i bé sôña ndik le ba bañ ‘biôñgba inyu bégés gwo.’ Bibel i nsôña bé le di bañ ngim biôñgba inyu lémés ngim bahoma.—1 Bikiñe 7:18, 25.
14-20 HILÔNDE
MASÔÔ MA NKUS MA BIBEL | NDIIMBA MBÉN 5-6
“Hôla bon boñ i gwés Yéhôva”
w05 15/6 20 § 11
A bagwal ni tibil tééda lihaa linan
11 Ngéda Bibel i nkal le bagwal ba nlama tôñ bon bap, ba mbéna gwélél kaat Ndiimba mbén 6:5-7. Soho di yibil pes kaat i. Kiki jam li bisu, bagwal bomede ba nlama bana lem i nigil Bibel, ba nlama bana loñge ntjega inyu añ Bibel ni i soñda yo. Hala a ga hôla bon bap i gwés matiñ ma Yéhôva ni i bii mo bisélél. Ba ga ke ni bisu i gwés Yéhôva, ba ba ki maséé. I mam ma momasôna ma ga hôla bo i tibil hôla bon bap i gwés Yéhôva.—Lukas 6:45.
w07 15/5 15-16
Lelaa me nla tibil niiga bon bem?
I mam u ngwés, njômbi yoñ, bi nene ikété bipôdôl ni maboñok moñ. (Rôma 2:21, 22) Ngéda boñge ba yii dipéda, ba mbéñge maboñok ma bagwal bap ngandak. Boñge ba mbéñge kii bagwal ba mbii kiki jam li bisu i niñ yap. Ngéda ba ga nañ, yak bo hala nyen ba ga boñ. Ibale u ngwés toi Yéhôva b’a yi hala. Boñge ba ga tehe too u ngwés u nigil Bibel, ibale u mbii mam ma mbuu kiki jam li bisu i niñ yoñ, ba ga yimbe hala. (Matéô 6:33) Ibale u gwé lem i kôôba makoda, i timbhe ngéda u yé makoda ni i téé likalô, ba ga yimbe ki hala.—Matéô 28:19, 20; Lôk Héber 10:24, 25.
w05 15/6 21 § 14
A bagwal, tina lihaa linan i mam ma mbéda bo
14 Inoñnaga ni Ndiimba mbén 6:7, a bagwal, ni nla gwélél hiki pôla i nene inyu niiga bon banan mam ma mbuu. Kiki hihéga, ngéda ni nhiôm ni bo, ngéda ni mboñ bibôlô bi ndap tole ngéda ni ntuk; ni nla gwélél mangéda ma, ndi hala a nsômbôl bé kal le “ndik Bibel” yotama yon ni nlama kwélés bon banan. Ndi ni nla bana biloñge bi minkwel mimpe. Kiki hihéga, ni nla gwélél mbamble unu le Tôde ’ilo! u u mpôdôl ngandak mam. Mbamble u, u nla hôla bé le ni laa pôdôl bon banan gwom kii bo binuga Yéhôva a bi hek, bo bahoma balam di nléba munu hisi ni bilem bi bôt ba biloñ bipe ni liniñik jap. I nya minkwel i, i nla ti bon banan makénd i ke ni bisu i añ bikaat bi ntôñ.—Matéô 24:45-47.
Tik ngok i mbuu
Gwéha ni telepsép i nlômbi Israel
11 Biniigana: Yéhôva a mbéñge mut kétékété he bé nu a nene bitéé bi mis. A ntehe njee di yé toi ikétékété, i ñem wés. (1 Samuel 16:7) Yom yo ki yo i sôli bé bisu gwé, a nyi i yom di nhoñol, i yom di nôgda ni maboñok més. A mbéñge i mam malam ma yé bés ikété, a nti ki bés makénd i bii mo bisélél. Ndi a ngwés le di yimbe mahoñol mabe, mbus di yémbél mo ilole ma nyila maboñok mabe.—2 Miñañ 16:9; Matéô 5:27-30.
21-27 HILÔNDE
MASÔÔ MA NKUS MA BIBEL | NDIIMBA MBÉN 7-8
“U biiba bañ ni bo”
w12 1/7 29 § 2
Inyuki Yéhôva a bi kal bagwélél bé le ba biiba ndigi bo ni bo?
Yéhôva a bé yi le njômbi Satan i yé le bagwélél bé ba ke nye haa. Jon a bi kal bo le ba biiba bañ lôñni bôt ba ngwélél bé nye inyule kiki Bibel i nkal, ‘ba ga tinde bon boñ bôlôm le ba kôm me mbus, ba gwélél ki banyambe bape.’ Ba bé lama yoñ yihe ngandak. Ibale litén li Yéhôva li bôdôl bégés bisat, ki Yéhôva a bi waa tat bo kayéle ba bé lama ba isi énél i baoo bap. Ibale hala a bôña, ki lelaa ba bé le ba tééda ndaye i i bé lama kena bo ipam yak Mésia? Di nok inyuki Satan a bé tinde bagwélél ba Yéhôva i biiba ni bôt ba matén mape.
w15 15/3 30-31
I biiba “ikété Nwet,” baa hala a ngi yii nseñ?
Ikété Bibel, Yéhôva a nti bés maéba le di biiba ndik ikété Nwet. Inyuki? Inyule a nyi yom i nlôôha ba nseñ inyu litén jé. A ngwés bé le di pohol njel i i ga lona bés bikuu ni ngandak njôghe. I ngéda Néhémia, bon ba Israel ba bi bii bôda ba ba bé sélél bé Yéhôva. Néhémia a nti bés hihéga hi kiñe Salômô “nu Nyambe wé a ba gwés, . . . ndi to hala, bôda ba biloñ bipe ba bôñha nye béba.” (Néhémia 13:23-26) Nyambe a nyi kii i yé loñge inyu yés, jon a bat bés le di biiba ndigi bés ni bés bagwélél bé. (Tjémbi 19:8-11; Yésaya 48:17, 18) Bañga bikristen bi nkon maséé bi tinak Yéhôva mayéga inyu maéba mé malam, bi mbôdôl ki nye ñem. Ngéda di neebe le Yéhôva a éga bés, di ñéba le nyen a kôli ba Ñane ngiinda yosôna.—Bingéngén 1:5.
w15 15/8 26 § 12
Yoñ yihe ni bilôñ bibe munu dilo di nsôk
12 Kristen i i nsômbôl biiba i nlama yoñ yihe i bana ngim minkwel ni bôt ba ba nsélél bé Yéhôva. Bibel i nti bés maéba mana le: “Ni adba bañ ni bangitophémle. Inyule mambe maada ma yé ipôla telepsép ni liyanmbén? Tole imbe ngaba mapubi ma gwé lôñni jiibe?” (2 Korintô 6:14) Bibel i nti bés maéba le di nlama ndik biiba “ikété Nwet,” hala wee ni ngwélél Yéhôva nu a yé nsôblege ni nu a nke ni bisu i bii matiñ ma Yéhôva bisélél. (1 Korintô 7:39) Ibale kristen i noñ maéba mana, i ga bana sobiina nu a ga hôla nye i ke ni bisu i téñbe ni Yéhôva.
Tik ngok i mbuu
w04 1/2 13 § 4
Yéhôva a nti bés mam ma mbéda bés hiki kel
4 Ngéda di nsoohe Yéhôva inyu bat nye likala li kel, hala a nhôñlaha bés le di nlama yak yônôs ngôñ i je i pes mbuu. To hala kiki a bi yén ngandak dilo ibabé le a je, Yésu a bi pam i kolba manoodana ma Satan nu a bé bat nye le a yilha ngok bret. Yésu a bi kal nye le: “I yé ntilga le: ‘Mut binam a nlama ndik bé niñil i je koga, ndi i nôgôl hiki bañga i mpémél i nyo u Yéhôva.’” (Matéô 4:4) Yésu a bé sima bibuk bi Môsi nu a kal bon ba Israel le: “[Yéhôva] a suhus we, a kônha we njal, a jés ki we lôñni Mana, ma u ba yi bé, to bosoñ ba ba yi bé; le ndi a niiga we le mut a niñil bé inyu koga yotama. Ndi ndik inyu hi jam li mpémél nyo Yéhôva jon mut a niñil.” (Ndiimba mbén 8:3) Ngéda Yéhôva a bi ti bon ba Israel mana, a bé jés ndik bé bo i pes minsôn, ndi a bé ti yak bo biniigana i pes mbuu. Ba bé lama “bada ngaba inyu hilo hiada.” Ngéda ba bé ba bada ngaba inyu dilo diba, bi bé bi bol, bitômb bi bé bi jôp ki mu. (Manyodi 16:4, 20) Ndi hilo hi nyônôs hisamal hi bé mahéñha. I hilo hi, ba bé lama bada mana inyu dilo diba inyule i kel i bé noñ i bé kel Sabat. (Manyodi 16:5, 23, 24) Likébla li mana li bé niiga bon ba Israel le ba bé lama nôgôl nye, ni ki le mut a nlama ndik bé niñil i je koga ndi i nôgôl “hiki bañga i mpémél i nyo u Yéhôva.”
28 HILÔNDE –4 NJÉBA
MASÔÔ MA NKUS MA BIBEL | NDIIMBA MBÉN 9-10
“Kii Yéhôva Nyambe woñ a mbédél we?”
w09 1/10 10 § 3-4
Kii Yéhôva a mbémél bés?
Kii i nla tinde bés i nôgôl mambén ma Djob? Môsi a nsima jam jada i (minlôñ 12), a kal le: “U kon Yéhôva Nyambe woñ woñi.” Di nkon bé Djob woñi inyule a ga nôgôs bés, ndi di nkon nye woñi inyule di nsômbôl unda nye le di ti nye njôôñ lipém, ni le di diihe matiñ mé. Ibale di ngwés toi Djob, d’a yoñ yihe i ndogbene nye.
Limbe jam li tôbôtôbô li ga tinde bés i nôgôl Djob? Môsi a bi kal le: ‘Gwés Yéhôva . . . gwélél ki Yéhôva Nyambe woñ ni ñem woñ wonsôna ni niñ yoñ yosôna.’ (Nlôñ 12, MN.) I hoñol le di ngwés Djob, hala a kôli bé. Kaat i ndoñi bibuk yada i nkal le: “I buk ni hop Lôk Héber ini le i hoñol i ngwés i pôdôl mahoñol momede ndi yak bibôñôl.” I nlélém kaat i ndoñi i, i nkônde le i gwés Djob i nkobla le di unda hala “ikété bibôñôl gwés.” Ibale di ngwés toi Djob, d’a boñ sômbôl yé.—Bingéngén 27:11.
w09 1/10 10 § 6
Kii Yéhôva a mbémél bés?
Ngéda di nôgôl Yéhôva hala a yé ndik inyu loñge yés. Môsi a kal le: “I tééda matiñ ma Yéhôva . . . ma me nkal we i len ini, inyu loñge yoñ.” (Nlôñ 13) Hiki yom Yéhôva a mbat bés le di boñ i yé inyu loñge yés. Hala a nhélés bé bés. Bibel i nkal le “Djob a yé gwéha.” (1 Yôhanes 4:8) I maliga, mambén ma Yéhôva ma yé toi inyu loñge yés. (Yésaya 48:17) I nôgôl mambén ma Yéhôva i ga hôla bés i keñgle ngandak bikuu, i ga hôla ki bés i bana bisai i boga ni boga isi énél yé.
cl 16 § 2
Baa u nla toi “kôôge Djob bebee”?
2 Abraham a bé mut kôba nu Yéhôva a bi sébél le “liwanda jem.” (Yésaya 41:8) Ñ, Yéhôva nyemede nyen a bi pohol nye kiki liwanda. Ibale Abraham a bi yila liwanda li Yéhôva, i bé ndik inyule Abraham “a bi hémle Yéhôva.” (Yakôbô 2:23) Yak i len ini, Yéhôva a ngwés ba liwanda li bôt ba ngwés nye, ba séélak ki nye. (Ndiimba mbén 10:15) Ikété Bibel, Djob a nti bés makénd mana le: “Kôôgana bebee ni Nyambe, ndi yak nye a’ kôôge bé bebee.” (Yakôbô 4:8) Jon, hala a yé ngim nsébla a bak ki ngim mbônga.
Tik ngok i mbuu
it-1 115
Anak
Lôk Anak i bé mimpémba mi bôt i yéénege i ngii dikôa, yak i ngwañ tuye i nwelmbok i Kanaan. Ha ngéda i, i bon ba Anak baa bana le Ahiman, Sésai, ni Talmai, ba bé yééne i Hébrôn. (Ñañga bôt 13:22) Nyoo nyen i 12 bôt ba mbep Môsi a bi ep ba bi tehe Lôk Anak inyu ngélé bisu. Ipôla i 12 bôt ba mbep bana, 10 ba bi ti ñañga mbe, ba kalak le ba ntehe bon ba Néfilim, b’a la bé yoñ i loñ i inyule ba yé kiki “bitandi” i mis map. (Ñañga bôt 13:28-33; Ndiimba mbén 1:28) Ba bé sébél yak bôt ba Émim ni ba Réfaim le bon ba Anak inyule ba bééna mimbôñgô mi mintel. Bebek inyule ba bééna ngui jon ba bi pot bibañga bini le: “Njee a nla telep i bisu bi bon ba Anak?”—Ndiimba mbén 2:10, 11, 20, 21; 9:1-3.