Kinje ndutu bôda ba nôgda kiki ba ñada le soñ i yé hôlô! Maria Magdaléna a nke ngwéé i boma “Simôn Pétrô bo nuu nnigil numpe Yésu a bé gwés” le ñôma Yôhanes. (Yôhanes 20:2) Bôda bape ba ntehe añgel yada, ba ntehe ki ipe i “hééba mbôñgô puba mbot” ikété soñ.​—Markô 16:5.

Añgel yada i nkal bo le: “Ni kon bañ woñi, inyule me nyi le ni yé i yéñ Yésu nu ba bi nol i kék. A ta bé hana inyule a ntuge, ndik kiki a bi kal. Lona, béñgnana homa mim wé u bak u niñi. Ndi ni pala ke, ni kal banigil bé le a ntuge ikété bawoga, ndi nuna-ki! A yé bôk bé i bisu i Galiléa.” (Matéô 28:5-7) Jon bôba ba nke ngwéé i añle banigil hala, “ba sehlaga, ba bak nhelek.”​—Markô 16:8.

Kiki Maria a nkoba Pétrô bo Yôhanes, a hébék makeñi, a nkal bo le: “Ba nhéya mim u Nwet ikété soñ, di nyi bé hee ba niñne wo.” (Yôhanes 20:2) Pétrô bo Yôhanes ba ñôt ngwéé. Yôhanes nu makôô ma nhoo a mbôk pam i soñ. A yé a pôôbege bañ, a ntehe bibandas, ndi a njôp bé i soñ.

Kiki Pétrô a mbol, a njôp ngélé yada i soñ, a tehe mboñ ba bi gwélél inyu lép ño u Yésu, ni mboñ ipe. Yôhanes a noñ nye. Ha nyen a nhémle yom Maria a nkal bo. To hala kii Yésu a bi bôk a kal hala, mut to wada ikété yap a nok bé le Yésu a ntuge. (Matéô 16:21) Nhelek, ba nhuu. Ndi Maria a ntémb i soñ, a nyégle nyoo.

Nlélém ngéda, bana bôda bape ba yé njel inyu ke legel banigil le Yésu a ntuge. Kiki ba yé ke ngwéé, Yésu a mboma bo, a kal le: “Me nyéga bé!” Ba ñôm maboñ isi makôô mé, “ba ti ki nye lipém.” I mbus, Yésu a nkal bo le: “Ni kon bañ woñi! Kena, ni legel lôktata nwin le ba ke i Galiléa, nyoo nyen d’a tehna.”​—Matéô 28:9, 10.

I bisu bi ngéda, kiki hisi hi bi nyeñg, biañgel bi pam, bisônda bi bé tat soñ bi bi kon woñi ngandak, “bi sehla, bi yila kiki minwok mi bôt.” I mbus le yi i lôl bo, ba nke i tison inyu “añle baéga biprisi mam momasôna ma bi tagbe.” Biprisi bi naña boma ni mimañ mi Lôk Yuda. Ba nkit le ba nti bisônda moni inyu boñ le ba pot bañ jam li, le ba nlama kal le: “Banigil bé ba bi lo ni juu, ba nip mim wé ngéda di bé ke ilo.”​—Matéô 28:4, 11, 13.

Bisônda bi Rôma bi nla nôla ibale ba nke hilo ngéda ba yé tat. Ndi biprisi bi mbôn bo le: “Ibale jam lini [mu kii ba nlama tembee le ba bé ke ilo] li mpam i maôô ma ngomin keñi, ni tôñ bañ, d’a kwélés nye.” (Matéô 28:14) Bisônda bi nyoñ moni, bi boñ ki yom biprisi bi nkal. Hala nyen béba ñañ le ba bi nip mim u Yésu u ntjama ikété nkoñ u Yuda wonsôna.

Maria Magdaléna a ngi yii i soñ, a eek. Kiki a nhôdôp inyu béñge ikété soñ, a ntehe biañgel biba ni bipuba bi mambot. Wada a nyii het ño u Yésu u bé u niñne, numpe makôô. Ba mbat nye le: “A muda, inyuki u ñee?” Maria a ntimbhe bo le: “Ba nkena mim u Nwet wem, me nyi bé hee ba niñne wo.” Kiki a nhielba, Maria a ntehe ki mut numpe nu a ntiimba bat nye mbadga añgel i mbat nye, i mbus a kônde le: “Njee u yé i yéñ?” Mu kiki a yé hoñol le nsalwom nu, a nkal le: “A isañ mbai, ibale wen u nhéya mim, kal me hee u mbiine wo le me ke me yoñ wo.”​—Yôhanes 20:13-15.

I pot maliga, Maria a yé pot ni Yésu nu a ntuge. Ndi a ta bé yimbe le Yésu nu. Ndi kiki mut a nkal le “A Maria!” a nyi le Yésu nu, inyule hala nyen Yésu a bééna lem i sébél nye. Ni maséé, Maria a ntimbhe le: “Rabôni!” (hala a nkobla le: “A Lét!”). Mu kiki a nkon woñi le Yésu a mbet i ngii, Maria a nkabda nye. Ndi Yésu a nkal nye le: “Waa kabda me inyule me yé ngi bet yak Tata. Ndi ke yak lôktata, kal bo le: ‘Me yé i bet yak Tata wem ni Isoñ nan, yak Nyambe wem ni Nyambe nan.’”​—Yôhanes 20:16, 17.

Maria a nke ngwéé homa baôma ni banigil bape ba kôdi inyu kal bo le: “Me ntehe Nwet!” Mbôgi yé i nyigye yom bana bôda bape ba nkal. (Yôhanes 20:18) Ndi bibañga gwé bi “nene bijôñ inyu baôma.”​—Lukas 24:11.

I kel Sonde, hilo 16 hi sôñ Nisan, banigil ba yé nhelek. Ba nyi bé inyuki soñ i yé hôlô. (Matéô 28:9, 10; Lukas 24:11) I mbus ngéda i nlélém kel, Kléôpa ni nnigil numpe ba nyodi i Yérusalem inyu ke i Émaus nu a yé i 11 kilôméta.

Mu njel, ba mpôdôl inyu mam ma ntagbe. Nkén mut a nkoba bo, a mbôdôl bat bo le: “Mambe mam ni yé i kwélél hala i njel?” Ndi Kléôpa a ntimbhe nye le: “Baa u yé nkén mut? Lelaa ni u niñ i Yérusalem ndi u nyi bé i mam ma ntagbe munu dilo dini?” Nkén mut a bat bo le: “Mambe mam?”​—Lukas 24:17-19.

Ba ntimbhe nye le: “I mam ma mbéñge Yésu mut Nasaret,  . . . Di bééna botñem le i mut nu nyen a lam-ga tohol Israel.”​—Lukas 24:19-21.

Kléôpa ni nuu nigil numpe ba mbôdôl toñle nye mam ma ntagbe kel i. Ba nkal le bôda iba ba bak i soñ, ba nkoba yo hôlô, ba ntehe ki bihélha bi mam: Biañgel bi mpémél bo, bi nkal bo le Yésu a yé niñ. Banigil ba nyigye le bôt bape ba bé ki i soñ, “ba koba yo kiki bôda ba bak ba kal.”​—Lukas 24:24.

I pot maliga, banigil ba nyi bé kii hala a nkobla. Ni ngandak makénd, nkén mut a nkodol litehge jap libe li li nlona bo ndutu ñem. A nkal bo le: “A bé ba ni nyéñ bé hek pék, miñem minan mi tiñhaga ki hémle mam momasôna bapôdôl ba bi pot! Baa i bé bé nseñ le Kristô a nok ndutu inyu mam mana le ndi a jôp i lipém jé?” (Lukas 24:25, 26) I mbus, a ntoñle bo ngandak minlôñ mi Bitilna mi mi mpôdôl inyu Kristô.

I mbus ngéda, bo baa ba mbol bebee ni Émaus. Banigil boba ba nsômbôl kônde emble nkén mut, jon ba mbat nye le: “Yén ni bés, inyule kôkôa i nkwo, yak u u yé bebee ni sude.” A neebe yén, ni i je ni bo. Ngéda nkén mut a nsoohe, a bôk bret, a ti bo, ha nyen ba nyi le Yésu nu, ndi Yésu a nyoi kunda yada. (Lukas 24:29-31) Nano ba yé nkwoog nkaa le Yésu a ntuge!

Ni maséé, banigil ba nkalna bo ni bo le: “Baa hala a bak nga a tihba miñem nwés ngéda a pôdhak bés mu nloñ, a tiblak toñle bés Bitilna?” (Lukas 24:32) Ba mpala témb i Yérusalem i het ba nkoba baôma ni bôt bape ba ba kôdi. Ilole Kléôpa ni mut bo nye ba nkiha ba laa toñol jam li mpémél bo, i bôt ba yé ha ba nkal bo le: “Ibabé pééna, Nwet a ntuge, a mpémél Simôn!” (Lukas 24:34) I mbus, yak banigil bo iba ba ntoñol kiki Yésu a mpémél bo. Ñ, yak bomede ba yé mbôgi.

Kunda yada, Yésu a mpémél bo mu ndap! Bobasôna ba yé nhelek inyule mu kiki ba nkon Lôk Yuda woñi, makôga ma yé nkwéhék. Ndi nano, Yésu a yé ha i ñemkété wap. Ni nwee nyensôna, a nkal bo le: “Nsañ u ba ni bé.” Ndi ba nkon woñi. Kiki ba bi boñ nwii i bi tagbe, ‘ba nhoñol le ba yé i tehe añgel.’​—Lukas 24:36, 37; Matéô 14:25-27.

Inyu kwés bo nkaa le ba ta bé tehe yiinda, tole ba ta bé emel, ndi, le nyemede nu ni nyuu yé minsôn, Yésu a ñunda bo moo mé ni makôô mé, a kal bo le: “Inyuki ni nkon woñi? Inyuki ni mpééna mu miñem minan? Ni béñge moo mem ni makôô mem, memede nu; tihbana me inyu tehe, inyule añgel i gwé bé minsôn to bihés kiki ni yé i tehe i meeni.” (Lukas 24:36-39) Maséé ma nlo nol banigil, ba yé ki nhelek, ndi bahogi ba nginda gwé pééna.

Inyu kônde hôla bo i tehe le nye toi nu, Yésu a mbat bo le: “Baa ni gwé yom je hana?” A nyoñ két mbômôk hiobi a je yo. I mbus, a kal le: “Bibañga gwem bini gwon me bi kal bé ngéda me bé me ngi yii lôñni bé, le i mam momasôna ma yé ntilga ikété Mbén Môsi ni Bapôdôl ni Tjémbi ma nlama yon.”​—Lukas 24:41-44.

Yésu a nhôla Kléôpa ni mut bo nye ba bé kiha i tibil nok Bitilna, nano a mboñ nlélém inyu ba bobasôna ba kôdi ha, a nkal bo le: “I yé ntilga le: Kristô a nlama nok ndutu, a tuge ikété bawoga i hilo hi nyônôs daa, ni le b’a añal ki ikété biloñ gwobisôna le bôt ba nlama tam bibéba inyu kôhna nwéhél i jôl jé; nson unu w’a bôdle i Yésusalem. Ni nlama ba mbôñ i mam mana.”​—Lukas 24:46-48.

Inyu ngim njom i di nyi bé, ñôma Tômas a ta bé ha. I dilo di noñ, ni maséé ba nkal nye le: “Di ntehe Nwet!” Di Tômas a ntimbhe le: “Ibale me ntehe bé ndôndôô i batone i moo mé, me ha bé to hinoo hiem mu ndôndôô i batone, me ha bé to woo wem i mbai yé, me yé mbén i hémle.”​—Yôhanes 20:25.

I mbus dilo juem, banigil ba ntiimba kodba, makôga nkwéhék, ndi yak Tômas a yé ha. Yésu a mpam ipôla yap ni nyuu minsôn, a nyéga bo, a kal le: “Nsañ u ba ni bé.” Yésu a mbéñge Tômas, a kal nye le: “Ha hinoo hioñ hana, béñge yak moo mem, sambal ki woo woñ, u ha wo hana mbai yem le ndi u waa pééna, u hémle.” Tômas a timbhe nye le: “A Nwet wem, ni Nyambe wem!” (Yôhanes 20:26-28) Jon, Tômas a gwé ha bé pééna yo ki yo le Yésu a yé niñ. A nkal le “Nyambe wem,” inyu kal le Yésu a yé “ngim nyambe,” hala wee nu bañga Nyambe le Yéhôva a ñom.

Yésu a nkal le: “Baa u nhémle inyule u ntehe me? Maséé ma yé ni ba ba nhémle bo ngi tehe.”​—Yôhanes 20:29.