Yésu ni banigil bé ba ntégbaha mau maa i Bétania ibôdôl nu ba bi nyodi i Yérikô. Nano, kegla tutu i Ngwa njañgumba, i hilo 10 hi sôñ Nisan ba yé ke i Yérusalem. Njal i gwé Yésu, jon kiki a ntehe e faigé, a nke nyoo. Baa matam ma yé mu?

Sôñ Matumb i yé bebee ni mamélél, e faige i num ndigi i sôñ Hilônde. Ndi tjai di nhoo too, jon Yésu a nhoñol le a nla koba matam ma faigé mu, ndi litam to jada li ta bé mu. Tjai tjon di mboñ le e faigé i nene wengoñle matam ma yé mu. Hala a ntinde Yésu i kal le: “Mut to wada a jek ha bañ matam moñ kekikel.” (Markô 11:14) Kunda yada, e faigé i mbôdôl wo, ndoñi i jam li i ga yiba i kel i noñ.

Ndék ngéda i mbus, Yésu ni banigil bé ba mbol i Yérusalem. A nke i témpel i het a bé i kel i bi tagbe. Ndi len, a ta ndik bé ha inyu béñge, a mboñ nlélém jam a bi bôk a boñ hala a yé nwii maa i ngand Pasa i nwii 30 N.Y. (Yôhanes 2:14-16) Lini lisañ Yésu a nluhul ‘bôt ba nuñul, ba sombok ikété témpel.’ A nkwéha yak “bitéblé bi bahéñha moni ni bibeñgi bi banuñul dibeñ isi.” (Markô 11:15) A nwas bé to le bôt ba yoñ manjel ma sem kwep ma témpel inyu kena manyuñga map homa numpe.

Inyuki Yésu a nyoñ makidik ma ngui inyu bet ba nhéñha moni, ni inyu bet ba nuñul binuga ikété témpel? A nkal le: “Baa i ta bé ntilga le: ‘Ndap yem y’a séblana le ndap masoohe inyu matén momasôna’? Ndi bé ni nyilha yo hôk i mintonba.” (Markô 11:17) I jam li ntinde Yésu i sébél i bôt ba le mintonba li yé le ba mbat i bet ba nlo i somb binuga inyu ti i sesema ndamba i nlôôha diye. Inyu Yésu, hala a yé wip ni ngadla.

Baéga biprisi, bayimbén, ni baane ba litén ba nok bañ yom Yésu a mboñ, ba mbôdôl ki yéñ njel inyu nol nye. Ndi hala a ta bé bo jam li ntomb, ba nyi bé lelaa ba boñ inyule ngandak bôt i nkéña Yésu inyu emble nye.

Lôk Yuda yomede, yak mbôn Lôk Yuda hala wee bet ba bi jôp i base i Lôk Yuda, ba bi lo i tégbaha Pasa. Ikété yap, yak bon ba Grikia ba nlo i lôôs ngand Pasa. Ba nkôôge Filipô bebee, bebek inyule a gwé jôl li man Grikia, ba nkal nye le ba gwé ngôñ i tehe Yésu. Filipô a nyi bé ibale hala a yé loñge jam le ba boma Yésu, jon a nkwélés Andréa. Bo iba ba nke tehe Yésu, bebek i témpel.

Yésu a nyi le a nlama wo i mbus ndék dilo, jon ngéda ha bé ini le a yônôs ngôñ bôt tole i yéñ le ngandak bôt i yi nye. A ngwélél hihéga hiada inyu timbhe baôma bo iba, a nkal le: “Ngeñ i nkola le Man mut a kôhna lipém. Me nkal yaga bé maliga le: Ibale jis li blé li nkwo bé isi, le ndi li wo, li nyégle ndik jis li blé jada; ndi ibale li nwo, ha nyen li nti ngandak mis ma blé.”​—Yôhanes 12:23, 24.

I bitéé bi mis, ba nla yan jis li blé. Ndi ibale ba nha jo isi, i mbus li “wo,” kiki mbôô, li ntoo, li nañ, li yila bebela i i num ngandak matam. Nlélém, Yésu a yé peles. Ni ndéñbe yé ipañ Djob letee ni nyemb, a ga yila nwet Djob a mpohol inyu ti ngandak i i mboñ minlélém mi bisesema kiki nye niñ boga. Jon a nkal le: “Nu ni nu a ngwés niñ yé, a’ nimis yo; ndi nu ni nu a ñoo niñ yé munu nkoñ isi unu, a’ tééda yo inyu niñ boga.”​—Yôhanes 12:25.

Yésu a ta ndik bé pôdôl inyu nyemede, a nkal le: “Ibale mut a nyéñ gwélél me, a noñ me; i homa me yé, ha nyen yak ngwélél wem a’ ba. Ibale mut a nyéñ gwélél me, Tata a’ ti nye lipém.” (Yôhanes 12:26) Kinje loñge nsaa! I bet Tata a’ ti lipém, b’a ba lôñ yada ni Yésu mu Ane.

Mu kiki Yésu a nhoñol ndutu keñi ni béba nyemb bi mbem nye, a nkal le: “Hanano nduña i yé me i ñem, kii me nla kal? A Ta, tohol me le me tehe bañ i ngeñ ini.” Ndi Yésu a nsômbôl bé kal le a gwé bé ngôñ i yônôs nson u Djob. A nkônde le: “Ndi me bi lo inyu hônba i ngeñ ini.” (Yôhanes 12:27) Yésu a neebe bitelbene gwobisôna Djob a bi yoñ, yak le a ti niñ yé kiki sesema.

I Ngwa njañgumba i hilo 10 hi sôñ Nisan, i témpel, Yésu a yé pôdôl nyemb yé i i yé bebee. Mu kiki a ntôñ le jôl li Isañ li ga hooba mahindi, Yésu a nkal le: “A Ta, ti jôl joñ lipém.” Ni kiñ keñi i i nlôl i ngii i timbhe le: “Me mal ti jo lipém, m’a kônde ki ti jo lipém.” ​—Yôhanes 12:27, 28.

I bet ba yé mbôgi i jam li ba nyôm. Bape ba nhoñol le mbambat yon ba nok. Bahogi ba nkal le: “Añgel yon i mpôdôs nye.” (Yôhanes 12:29) Ndi Yéhôva nyemede nyen ba nok a mpot! Ngélé bisu bé i le bôt ba binam ba nok kiñ Djob i nkwélés Yésu.

Nwii maa ni pes bisu bi ngéda, i sôble i Yésu, Yôhanes Nsôble a bi nok Djob a nkal Yésu le: “Man wem nunu, nugwéha wem, a nlémél me.” I mbus ngéda, Pasa i nwii 32 N.Y. i mal bañ tagbe, Yakôbô, Yôhanes ni Pétrô ba bi tehe yiinda i Yésu. I bôt ba bo baa ba bi nok Djob a nkal le: “Man wem nunu, man wem nu gwéha, nyen a nlémél me. Emblana nye.” (Matéô 3:17; 17:5) Ndi nano, hala a yé ngélé nyônôs aa le Yéhôva a mpot kayéle ngandak bôt i nla nok!

Yésu a nkal le: “I kiñ ini ni nok i ta bé inyu yem, ndi inyu nan.” (Yôhanes 12:30) Hala a ñunda toi le Yésu a yé Man Nyambe, Mésia nu likak.

Jam lipe li yé le, niñ i telepsép i Yésu i ñéba lelaa bôt ba binam ba nlama niñ, i nkwés ki bés nkaa le Satan Nsohop nu a nkena nkoñ isi a kôli toi tjiba. Yésu a nkal le: “Nano i nkoñ isi unu u yé ikété bikééhene; nano ñane nkoñ isi unu a’ léña i mbégdé.” Iloole hala a tômbôs nye, a’ yémbél ni nyemb yé. Lelaa? Nyemede a ntoñol le: “Ndi ngéda b’a péni me i kék, m’a ôt mintén mi bôt nwominsôna i meeni.” (Yôhanes 12:31, 32) Ni nyemb yé, Yésu a ga ôt bôt bape i nyeni, a yiblene ki bo njel inyu niñ boga.

Inyu timbhe bibuk bi Yésu kiki a nkal le a nlama “bédhana,” limut li nkal le: “Di bi nok ikété mbén Môsi le Man mut a niñ i boga ni boga. Lelaa u nla kal le b’a péni Man mut i kék? Njee a yé i Man mut nu?” (Yôhanes 12:34) To hala kiki ba ntehe bihélha bi mam ba nok ki kiñ i Djob, ngandak ipôla yap i ntjél neebe le Yésu a yé toi Man mut, Mésia nu likak.

Kiki a bi bôk a boñ bisu bi ngéda, Yésu a mpôdôl nyemede kiki “mapubi.” (Yôhanes 8:12; 9:5) Jon a nkal limut le: “Mapubi m’a ba ipôla nan inyu ndék ngéda . . . I ngéda ni ngi gwé mapubi, undnana le ni nhémle mapubi le ndi ni yila bon ba mapubi.” (Yôhanes 12:35, 36) I mbus a nyodi, inyule i hilo 10 hi sôñ Nisan bé nyen a bé lama wo. Ndi hilo 14 hi sôñ Nisan nyen a nlama “bédhana”, hala wee ba ntômôl nye i ngii kék.​—Galatia 3:13.

Mu nson u Yésu wonsôna, i yé maliga le ngim mbañ i bé lama yon mu kiki bon ba Lôk Yuda ba bi hémle bé nye. Yésaya a bi legel le bôt ba ga ba ndim ba ban-ga ki miñem mi nlet kayéle ba ga tjél hielba inyu kôhna mbôô i pes mbuu. Ñ, ngandak ikété bon ba Lôk Yuda i bi ke ni bisu i tjél neebe biyimbne bi bé unda le Yésu a yé Ntohol wap nu likak, njel inyu kôhna niñ.

Nikôdémô, Yôsep nu Arimatia, ni ngandak baéga ipe i ‘nhémle’ Yésu. Ndi baa, ba ga unda hémle ni bibôñôl tole ba ga tjél boñ hala, inyule ba nkon woñi le b’a luhul bo i ndap bibégés tole inyule ba ‘ngwés lipém li bôt ba binam’?​—Yôhanes 12:42, 43.

Yésu nyemede a ntoñol kii i hémle nye i kobla, a nkal le: “Nu ni nu a nhémle me, wee a nhémle ndik bé metama, ndi yak nu a bi ep me; yak nu ni nu a ntehe me, wee a ntehe yak Nu a bi ep me.” Maliga Djob a bi kal Yésu le a niiga ni le a kee ni bisu i tjam ma ntina niñ, jon a nla kal le: “Nu ni nu a ntjél me, nu a nleege bé to bibañga gwem, a gwé nu a nkéés nye. I bañga me bi pot yon y’a kéés nye i hilo hi nsôk.”​—Yôhanes 12:44, 45, 48.

Yésu a nsôk kal le: “Me bi pot bé ni memede, ndi Tata nu a bi ep me, nyemede nyen a bi ti me mbén inyu jam me nlama kal ni jam me nlama pot. Me nyi le mbén yé i nkena i niñ boga.” (Yôhanes 12:49, 50). Yésu a nyi le ndék ngéda, wee a nti niñ yé i sesema inyu ba bobasôna ba ga hémle nye.​—Rôma 5:8, 9.