Isak a bééna 40 ma nwii i ngéda a bi bii Rébéka. A bé gwés nye ngandak. Ba bi bana bon bôlôm iba​—mahas.

Man nu bisu, jôl jé li bé le Ésau, nu sôkmbus jôl jé li bé le Yakôb. Ésau a bé a ngwés a yén i mbédgé, a bé yi ki jañgô ngandak. Ndi Yakôb a bé gwés a nyén i ndap.

Ha ngéda i, i bé le, ibale isañ mbai a nwo, man wé nu mañ nyen a nkôs nkoñ nkeñi ni libim li moni. I mam ma, mon ba bé sébél le ngababum. Mimbônga Yéhôva a bi bôn Abraham, yak nwo mi bé ikété ngababum i lihaa li Isak. Ésau a bé diihe bé mimbônga mi, ndi Yakôb nye a bé yi le mi yé nseñ iloo héga.

Kel yada, ngéda Ésau a bé huu i jañgô, nwaak kiyaga, a ma tégbaha ngim kel bikai. A nok njiñ ilam i bijek Yakôb a bé lamb, a kal nye le: ‘Njal i nlo nol me! Ti ndik me kôyôp yoñ mpele!’ Yakôb a timbhe nye le: ‘M’a ti we, ndi bôn ndugi me le u nti me ngababum yoñ.’ Ésau a timbhe le: ‘Me mbôñôl kii ngababum yem! U nla yoñ yo. We ti ndigi me bijek.’ Baa u nhoñol le Ésau a bi tibil ôt pék ilole a ntimbhe manyañ? To jam. Ésau a bi yan jam li nlôôha ba mahee ndik inyu pan i mpele.

Kiki Isak a bé ñunuk ngandak, ngéda i bi kola le a sayap man wé nu mañ. Ndi Rébéka a bi hôla Yakôb, man nu sôkmbus, i kôhna bisai. I ngéda Ésau a bi yi hala, a unup ngandak, a kit ikété ñem wé le a nol manyañ. Isak bo Rébéka ba bé gwés sôñ Yakôb, jon ba bi kal nye le: ‘Kee, u yén ni manyañ nyuñ le Laban, letee hiun hi manyuñ hi sôs.’ Yakôb a bi nôgôl maéba ma bagwal bé, a ôt ngwéé inyu péyés niñ yé.

Yéhôva a bi bôn Yakôb le a ga sôñ nye kiki a bi sôñ Abraham bo Isak. Yakôb a bé yééne i homa ba nsébél le Haran, nyoo nyen a bi bii, a bana lihaa likeñi, a yila ki ngwañ ngandak.

Yéhôva a bi kal Yakôb le: ‘Témb i Lôk yoñ.’ Jon Yakôb ni lihaa jé ba bi ke ntandaa liké. Mu njel, bôt ba lo i kal Yakôb le: ‘Manyuñ Ésau a yé lo lôñni 400 i bôt!’ Yakôb a kon woñi le Ésau a nsômbôl boñ nye ni lihaa jé béba. A soohe Yéhôva le: ‘Soho sôñ me i moo ma mankéé.’ Hilo hi bé noñ ha, Yakôb a ômle Ésau ngandak mintômba, kembee, nyaga, kamél, ni magas.

I u u, ngéda Yakôb a bé nyetama, a tehe añgel yada! Añgel i bôdôl jôs nye. Ba bi jo ipam bikegla. To lakii Yakôb a bé nok njôghe, a bi waa bé jo. Añgel i kal nye le: ‘Nwas me.’ Ndi Yakôb a timbhe le: ‘To, me nwas bé me we letee u sayap me.’

Añgel i sôk sayap Yakôb. Ha nyen Yakôb a bi yi le Yéhôva a ga nwas bé le Ésau a boñ nye béba.

Bikegla bi, Yakôb a béñge haa, a tehe Ésau ni 400 i bôt. Yakôb a bi bôk i bisu bi lihaa jé, a ôôp bisu bi manyañ ngélé isaambok. Ndi Ésau a bi ôt ngwéé i boma Yakôb, a sambla nye. Boba ba bôô maéa, ba kôp nsañ. Ni nhoñol le Yéhôva a bi nôgda lelaa ngéda a bi tehe kiki Yakôb a bi sañgal ndañ u bé ipôla nye ni Ésau?

Mbus, Ésau a témb i mbai yé, yak Yakôb a huu. Yakôb a bééna 12 bon bôlôm. Môl map ma bé le Ruben, Siméôn, Lévi, Yuda, Dan, Naftali, Gad, Aser, Isakar, Zébulôn, Yôsep, ni Benyamin. Yéhôva a bi gwélél man Yakôb wada le Yôsep inyu péyés litén jé. Baa u nyi lelaa? Di béñge lelaa.