I tégbaha makoda ni njel internet (vidéôconférence)

I nkoñ ’isi wonsôna, ikété ngandak biloñ, ngomin a bi sôña le bôt ba kodba bañ ngandak i nlélém homa, a tééne ki bôt ngim minwaa le ba tihbana bañ. Mbôgi Yéhôva i mboñ biliya i noñ i bitelbene bi ngomin bi, ndi, i nlélém ngéda, i kenek ni bisu i tébgbaha makoda map ni yihe. Lelaa? Ba ngwélél bisélél bi internet kiki bo Zoom, inyu kodba.

Inyu boñ le di kee ni bisu i tégbaha makoda més ngi ndutu yo ki yo, Juu li bakena ntôñ li bi ti kunde le ba ngwélél moni mi makébla inyu boñ le makoda ma bana compte Zoom. Hala a bé mahôla makeñi inyu ngim makoda i i bé bé le i laa bana moni mi mbéda inyu gwélél i sélél i, hala wee ipôla 10 000 ni 11 000 FCFA tole iloo ha. I makoda ma, ma bé béna gwélél bisélél ba nyoñ yañga, ndi ndutu i bak le bi nleege bé ngandak bôt, bi bak ki bisélél mut a nla bé bôdôl ñem. Ndi, i makoda ma ngwélél i Zoom ntôñ u nsaa, ma gwé sélél ba nla bôdôl ñem, i i ntomb i gwélél, i lak ki leege ngandak bôt. I len ini, iloo 65 000 makoda ikété iloo 170 biloñ ma ngwélél i compte Zoom i.

Likoda li Kairagi, i libôga li Manado, i Sulawesi Ñombok, i loñ i Indônésia, li bi waa gwélél bisélél bipe inyu gwélél i Zoom ntôñ u nsaa. Mankéé Hadi Santoso a ntoñol le: “Yak i lôk kéé i bôlôm ni i bôda i i nyi bé gwélél bikei bi mondo, i tégbaha makoda ni maséé, téntén inyule i sélél ini i nkit ha bé bo likoda i mbus ngim ngéda.”

Lester Jijón, Jr., mañ wada i likoda li Guayacanes Oeste i libôga li Guayaquil, i loñ i Iqwatôria, a nkal le: “Kiki ngandak lôk kéé i bôlôm ni i bôda i nyep, hala a bé boñ le ngim makoda i bé bé le i laa somb compte Zoom kayéle likoda jolisôna li laa kodba. Di nti ntôñ mayéga inyule nano, di gwé compte Zoom ntôñ u nsaa i i nleege ngandak bôt, di nla yak naña bôt bape i makoda, ibabé i kon woñi le likoda li ntelep.”

Johnson Mwanza, mañ wada i likoda li Ngwerere Ñombok, i tison Lusaka, i loñ Sambia, a ntila le: “Ngandak lôk kéé i bôlôm ni i bôda i mbéna kal le, ‘i bitelbene ntôñ u bi yoñ i somb compte Zoom bi mboñ le di tehe le di yé toi lihaa jada lôñni bilôk bikéé gwés gwobisôna, di nôgda ki le Yéhôva a ngwés toi bés a tôñôk ki bés.’”

I moni ntôñ u bi gwélél inyu somb i compte ini, mi bi yôña i moni mi bi téédana inyu hôla i bôt bikuu bi nkwél. I moni mi, mi yé makébla ma njômbi ñem ma ma ntiba inyu nit nson Ane i nkoñ ’isi wonsôna. Ngandak bôt i nti i makébla ma ni njel donate.jw.org. Di nti bé mayéga inyu makébla manan, ma ma nlo i kôndba i biliya lôk kéé ipe i nkoñ ’isi i mboñ inyu hôla i bôt bikuu bi nkwél.​—2 Korintô 8:14.